This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഐസ്‌ലന്‍ഡ്‌
സര്‍വ്വവിജ്ഞാനകോശം സംരംഭത്തില്‍ നിന്ന്
ഉള്ളടക്കം |
ഐസ്‌ലന്‍ഡ്‌
Island
ഉത്തര അത്‌ലാന്തിക്‌ സമുദ്രത്തിന്റെ മധ്യത്തിൽ ആർട്ടിക്‌ വൃത്തത്തിനു തൊട്ടുതെക്കായി സ്ഥിതിചെയ്യുന്ന ദ്വീപരാഷ്‌ട്രം. ഗ്രറ്റ്‌ബ്രിട്ടന്‍ കഴിഞ്ഞാൽ യൂറോപ്പിലെ ഏറ്റവും വലിയ ദ്വീപായ ഐസ്‌ലന്‍ഡ്‌ വന്‍കരയിലെ ഉത്തരധ്രുവത്തോട്‌ ഏറ്റവും അടുത്തുള്ള കരഭാഗംകൂടിയാണ്‌. വടക്ക്‌ അക്ഷാംശം 630 24' മുതൽ 660 32' വരെ 306 കിലോമീറ്ററും പടിഞ്ഞാറ്‌ രേഖാശം 130 28' മുതൽ 240 32' വരെ 483 കിലോമീറ്ററും വ്യാപിച്ചിട്ടുള്ള ഐസ്‌ലന്‍ഡിന്റെ വിസ്‌തൃതി 1,03,000 ച.കി.മീ. ആണ്‌. ഗ്രീന്‍ലന്‍ഡിനു 300 കി.മീ. കിഴക്കും നോർവേക്ക്‌ 1,050 കി.മീ. പടിഞ്ഞാറുമായി ഇത്‌ ഒറ്റപ്പെട്ടുകിടക്കുന്നു. വന്യമനോഹരവും നിമ്‌നോന്നതവുമായ ദ്വീപ്‌ അഗ്നിപർവതങ്ങളുടെയും ഹിമാനികളുടെയും കൂട്ടായ പ്രവർത്തനഫലമായാണ്‌ ഇന്നത്തെ പ്രകൃതി കൈവരിച്ചിട്ടുള്ളത്‌.
ഐസ്‌ലാന്‍ഡിക്‌ ഭാഷയിൽ "ലിധ്‌വെൽ' എന്നാണ്‌ രാജ്യത്തിന്റെ പേര്‌. അതായത്‌ "ഹിമപ്രദേശം' എന്നർഥം. സ്‌കാന്‍ഡിനേവിയയിൽനിന്ന്‌ ദ്വീപിലെത്തിയ ആദ്യകാല വൈക്കിങ്ങുകളിലൊരാളായ ഫ്‌ളോക്കി ഉത്തരതീരത്താകെ ഹിമാനികള്‍കണ്ട്‌ ദ്വീപ്‌ മുഴുവനും മഞ്ഞുമൂടിക്കിടക്കുന്നുവെന്നു ധരിച്ച്‌ ഈ പുതുദ്വീപിന്‌ ഐസ്‌ലന്‍ഡ്‌ (ഹിമഭൂമി) എന്നു പേർ നല്‌കി. ദ്വീപിൽ ബൃഹത്തായ ഹിമാനികള്‍ ഉണ്ടെങ്കിൽ കൂടിയും സമീപസ്ഥ കടലിൽ ഐസ്‌ബർഗുകള്‍ കുറവാണ്‌. ഈ ദ്വീപിൽ സ്ഥിരമായ ഹിമബാധയില്ല. ജൂണ്‍മാസ ദിവസങ്ങളിൽ 24 മണിക്കൂറും(midninght sun) ശീതകാല ദിനങ്ങളിൽ 4-6 മണിക്കൂർ മാത്രവും സൂര്യപ്രകാശം ലഭിക്കുന്ന ഈ ദ്വീപിൽ താരതമേ്യന സമീകൃത കാലാവസ്ഥയാണുള്ളത്‌. ഈ സ്വതന്ത്ര ജനാധിപത്യ രാഷ്‌ട്രത്തിലെ ജനങ്ങളിലധികവും (74 ശതമാനവും) തീരപ്രദേശത്ത്‌ മാത്രമായുള്ള പട്ടണങ്ങളിലാണ്‌ വസിക്കുന്നത്‌. ഇവരിലധികവും രാഷ്‌ട്രത്തിന്റെ സമ്പദ്‌വ്യവസ്ഥയുടെ നട്ടെല്ലായ മത്സ്യബന്ധന-സംസ്‌കരണ പ്രക്രിയയിലേർപ്പെട്ടിരിക്കുന്നു. എ.ഡി. 9-ാം ശതകത്തിന്റെ 8-ാം ദശകത്തിൽ ദ്വീപ്‌ കൂടിയേറ്റത്തിനു വിധേയമാവാന്‍ തുടങ്ങി. ജനസംഖ്യ: 318,452 (2011). ഐസ്‌ലന്‍ഡിലെ ഏറ്റവും വലിയ പട്ടണം കൂടിയായ റെയ്‌ക്യവിക്‌ (ഞല്യസഷമ്‌ശസ) ആണ്‌ രാജ്യതലസ്ഥാനം.
ഭൗതിക ഭൂമിശാസ്‌ത്രം
ഭൂപ്രകൃതി
യൂറോപ്പിലെ രണ്ടാമത്തെ വലിയ ദ്വീപ്‌. ഭൂമിശാസ്‌ത്രപരമായി ഈ ദ്വീപ്‌ അഗ്നിപർവതജന്യമായ ഒരു പീഠഭൂമിയാണ്‌. ഏതാണ്ട്‌ അണ്ഡാകൃതിയിലുള്ള ദ്വീപിന്റെ 5,950 കി.മീ. ദൂരം വരുന്ന തീരപ്രദേശം മിക്കവാറും ഫിയോഡു(fjord)കളും ഉള്‍ക്കടലുകളും നിറഞ്ഞ്‌ സങ്കീർണമായിരിക്കുന്നു. തെക്കന്‍ തീരം മാത്രമാണ്‌ താരതമേ്യന ഋജുവായിട്ടുള്ളത്‌. സമുദ്രനിരപ്പിൽനിന്നുള്ള ദ്വീപിന്റെ ശരാശരി ഉയരം 500 മീ. ആണ്‌. നിരന്ന തീരപ്രദേശംപോലും ജലനിരപ്പിന്‌ നന്നെ ഉയർന്നാണ്‌ സ്ഥിതിചെയ്യുന്നത്‌. ദ്വീപിന്റെ ഉള്‍ഭാഗത്ത്‌ ധാരാളമായുള്ള ഉയർന്ന പർവതങ്ങളിൽ ഏറ്റവും വലുതായ വത്‌ന യോകുലി(Vatna jokull)ലെ കൊടുമുടിക്ക്‌ 2,119 മീ. ഉയരമുണ്ട്‌. ഇവയൊക്കെ തന്നെ ഹിമാച്ഛാദിതമാണ്‌, വത്‌ന യോകുൽ, ഹോഫ്‌സ്‌ യോകുൽ, ലാങ്‌ യോകുൽ തുടങ്ങി ഹിമാനികള്‍ ഒട്ടനവധിയുണ്ട്‌. ഫിയോഡുകള്‍, ഉള്‍ക്കടലുകള്‍ തുടങ്ങിയവയുടെ തലപ്പത്ത്‌ പ്രകൃതിദത്തമായ ഒട്ടനവധി തുറമുഖങ്ങളുണ്ട്‌. ഈ ഭാഗങ്ങളിലാണ്‌ പട്ടണങ്ങള്‍ വികസിച്ചുവരുന്നത്‌. എന്നാൽ തെക്കും തെക്കുകിഴക്കും തീരങ്ങള്‍ ഋജുവായ മണൽപ്പരപ്പുകളാകയാൽ ഇതിനപവാദമാണ്‌.
ഭൂവിജ്ഞാനം
ഭൂവിജ്ഞാനപരമായി അടുത്തകാലത്തുണ്ടായ അഗ്നിപർവതസ്‌ഫോടനങ്ങളുടെ ഫലമായാണ്‌ ഈ ദ്വീപുണ്ടായത്‌. ടെർഷ്യറി, ക്വാട്ടെർനറി കല്‌പങ്ങളിലായി ഉദ്ദേശം 6.5 കോടി ആണ്ടുകള്‍ക്കിപ്പുറം ശിലീഭവിച്ച ബസാള്‍ട്ട്‌ പീഠഭൂമിയാണിത്‌. സമുദ്രാന്തരിതമായി ഈ പീഠഭൂമി കിഴക്കും വടക്ക്‌ പടിഞ്ഞാറും കൂടുതൽ ഭാഗങ്ങളിൽ വ്യാപിച്ചിരിക്കുന്നു. അത്‌ലാന്തിക്‌ സമുദ്രത്തിലാകമാനവും നീണ്ടുകിടക്കുന്ന സമുദ്രമധ്യവരമ്പിൽ (Mid oceanic ridge) ആണ്‌ ഐസ്‌ലന്‍ഡ്‌ രൂപംകൊണ്ടിരിക്കുന്നത്‌; ഇതിന്റെ ഭാഗമാണ്‌ ദ്വീപിന്റെ മധ്യത്തിലൂടെ തെക്ക്‌ പടിഞ്ഞാറ്‌, വടക്ക്‌ കിഴക്ക്‌ ദിശയിൽ സജീവമായിത്തുടരുന്ന ഭ്രംശ താഴ്‌വര. ഹെക്‌ല തുടങ്ങിയ സജീവ അഗ്നിപർവതങ്ങളും അൽമന്നഗ്യ (Almannagia)തുടങ്ങി ഭൂവൽക്കത്തിലെ അറിയപ്പെടുന്ന പ്രമുഖ വിള്ളലുകളും ഈ ബൃഹത്‌ താഴ്‌വാരത്ത്‌ തന്നെയാണ്‌ സ്ഥിതിചെയ്യുന്നത്‌. ഇതേ മേഖലയിൽ ബസാള്‍ട്ട്‌ ശിലാവ്യൂഹത്തിനുമേൽ കനത്ത ഹിമാനീകൃത നിക്ഷേപങ്ങളും അവസ്ഥിതമായിട്ടുണ്ട്‌. മോബെഗ്‌ എന്ന്‌ വിളിക്കപ്പെടുന്ന മധ്യമേഖല ഫലപുഷ്‌ടിയുള്ള ചെറുതാഴ്‌വരകള്‍ നിറഞ്ഞതാണ്‌. കടലോരത്ത്‌ ബസാള്‍ട്ട്‌ ആധാരശിലകളിന്മേൽ ഹിമാനികള്‍ കാർന്നെടുത്ത ഫിയോഡുകളും ഉള്‍ക്കടലുകളും ചെങ്കുത്തായ വശങ്ങളോടുകൂടിയവയാണ്‌.
അഗ്നിപർവതങ്ങളും ചൂടുറവകളും. ദ്വീപിലെമ്പാടും കാണപ്പെടുന്ന പ്രതിഭാസങ്ങളാണിവ. അഗ്നിപർവതസ്‌ഫോടനം പുതുദ്വീപുകളുടെ സൃഷ്‌ടി തുടരുന്നു. അറിയപ്പെടുന്ന എല്ലായിനം അഗ്നിപർവതങ്ങള്‍ക്കും ഉദാഹരണം ഇവിടെ കണ്ടെത്താം. ഇവയിൽ സവിശേഷമായത്‌ വിദര സ്‌ഫോടനം(fissure eruption)സൃഷ്‌ടിക്കുന്ന വക്‌ത്രനിരയാണ്‌. ദ്വീപിലുള്ള മൊത്തം 200-ഓളം അഗ്നിപർവതങ്ങളിൽ സജീവമായ 20-ൽ ഒന്നായ ഹെക്‌ലയാണ്‌ ഏറ്റവും ഭയാനകവും വിപത്‌കാരിയുമായത്‌. ജനങ്ങള്‍ക്കു പലവിധ ദുരിതങ്ങളുളവാക്കുന്ന ഇതിനെ "നരകത്തിന്റെ പടിവാതിലിൽ' എന്നാണ്‌ പൂർവികർ വിശേഷിപ്പിച്ചിരിക്കുന്നത്‌. 1783-ൽ വത്‌ന യോകുലിന്‌ തെക്ക്‌ പടിഞ്ഞാറുള്ള ലാകി പൊട്ടിത്തെറിച്ചപ്പോള്‍ മാനവചരിത്രത്തിൽ രേഖപ്പെടുത്തിയിട്ടുള്ളതിൽ ഏറ്റവും വലിയ ലാവാ പ്രളയമാണ്‌ ഉണ്ടായത്‌. 570 ച.കി.മീ. പ്രദേശവും ദ്വീപവാസികളിൽ 20 ശതമാനവും ലാവയ്‌ക്കടിയിൽപ്പെട്ടു: 30 കിലോ മീറ്ററിനിടയിലായി 100-ഓളം വിലമുഖങ്ങളും രൂപംകൊണ്ടു. 1947-ൽ ഉണ്ടായ സ്‌ഫോടനത്തെത്തുടർന്ന്‌ ഹെക്‌ല 13 മാസക്കാലം തുടർച്ചയായി ഉദ്‌ഗമിക്കുകയുണ്ടായി. അയ്യഞ്ചു വർഷങ്ങള്‍ക്കിടയിൽ ആവർത്തിച്ച്‌ സ്‌ഫോടനവിധേയമാകുന്ന അഗ്നിപർവതങ്ങളും ഇവിടെയുണ്ട്‌. ഹിമബാധിത മേഖലകളിൽ സ്‌ഫോടനംമൂലം മഞ്ഞുരുകി ആമസോണ്‍ നദിയെക്കാള്‍ വ്യാപ്‌തിയിൽ ജലം പ്രവഹിക്കുന്നത്‌ സാധാരണമാണ്‌. 1963-67 കാലത്തിനിടയ്‌ക്ക്‌ ഒരു അഗ്നിപർവതം അനേകം പ്രാവശ്യം സ്‌ഫോടനം ചെയ്‌തതിന്റെ ഫലമായാണ്‌ ഐസ്‌ലന്‍ഡിന്‌ തെക്ക്‌ കരയോരത്ത്‌ സർട്ട്‌ സി ദ്വീപ്‌ പൊന്തി വന്നിട്ടുള്ളത്‌. ഇതിനടുത്തുള്ള മറ്റൊരു ചെറുദ്വീപ്‌ (Heimaey)ഇതേപോലുള്ള ഒരഗ്നിപർവത ശിഖരമാണ്‌. 1973-ൽ ഇത്‌ പൊട്ടിത്തെറിച്ചതിന്റെ ഫലമായി ദ്വീപിലെ ഏകപട്ടണം നാമാവശേഷമായി. 2000-ത്തിലും തുടർച്ചയായി ഭൂകമ്പങ്ങള്‍ ഉണ്ടായിട്ടുണ്ട്‌.
2010 മാ. 21-ന്‌ ഭൂഗർഭത്തിൽനിന്നുണ്ടായ ലാവാപ്രവാഹത്തിൽ തെക്കന്‍ ഐസ്‌ലന്‍ഡിലെ 600-ഓളം കുടുംബങ്ങള്‍ ഭവനരഹിതരായി. മാത്രമല്ല, ഈ അഗ്നിപർവത സ്‌ഫോടനത്തിലെ പുക യൂറോപ്പിലെ വ്യോമഗതാഗതത്തെ താറുമാറാക്കുകയും ചെയ്‌തു. എന്നാൽ 2011 മേയ്‌ 21-ന്‌ ഉണ്ടായ അഗ്നിപർവതസ്‌ഫോടനം 2010 മാ. 21-ലെ അഗ്നിപർവതസ്‌ഫോടനത്തെക്കാള്‍ ഭയാനകമായ നാശനഷ്‌ടങ്ങള്‍ ഉണ്ടാക്കി.
അഗ്നിപർവത വിസ്‌ഫോടന പ്രക്രിയയോടു ബന്ധപ്പെട്ട മറ്റു പ്രതിഭാസങ്ങളാണ്‌ ചൂടുറവ(geyser)കളും സോൽഫറ്റാര(solfatara)യും. രാജ്യത്താകെ 250-ഓളം ചൂടുറവകളുണ്ട്‌. സജീവ അഗ്നിപർവത വക്‌ത്രത്തിലൂടെ പുകയും നീരാവിയും മറ്റു വാതകങ്ങളും ഉദ്‌ഗമിക്കുന്ന പ്രതിഭാസമാണ്‌ രണ്ടാമത്തേത്‌. സെക്കന്‍ഡിൽ ആയിരത്തിലധികം ലിറ്റർ ജലം പ്രവഹിക്കുന്ന ഉറവകളുണ്ട്‌. (നോ. താപപ്രസരണം). ദക്ഷിണ സമതലത്തിലുള്ള ഗ്രറ്റ്‌ ഗയ്‌സർ (Great Geisir) 60 മീ. ഉയരത്തിൽ ഉഷ്‌ണജലം ചീറ്റുന്നു. ഇത്‌ ആദ്യമായ കണ്ടെത്തിയ ചൂടുറവയായതിനാൽ താപപ്രസരണത്തിന്‌ ഗയ്‌സർ(geyser)എന്നു ശാസ്‌ത്രനാമവും സിദ്ധിച്ചു. തലസ്ഥാനമുള്‍പ്പെടെ പല പട്ടണങ്ങളിലും താപന സംവിധാനങ്ങള്‍ക്കായി ചൂടുറവകളിലെ ജലം പ്രയോജനപ്പെടുത്തുന്നു. ദ്വീപുവാസികളിൽ കാൽഭാഗവും ഇപ്രകാരം ഊഷ്‌മളമാക്കിയ വീടുകളിലാണ്‌ വസിക്കുന്നത്‌. ഗ്രീന്‍ഹൗസ്‌, നീന്തൽക്കുളം എന്നിവിടങ്ങളിലും ഈ ചൂടുവെള്ളം ഉപയോഗപ്പെടുത്തുന്നു.
അപവാഹം
ഐസ്‌ലന്‍ഡിൽ ഹിമാനീഭവ നദികള്‍ ധാരാളമുണ്ട്‌. ഇവയൊക്കെ നീളം കുറഞ്ഞവയും ഗതാഗതയോഗ്യമല്ലാത്തവയുമാണ്‌. അഗാധചുരങ്ങളിലൂടെ കുത്തിയൊലിക്കുന്ന ഇവയിൽ മനോഹരമായ വെള്ളച്ചാട്ടങ്ങള്‍ ധാരാളമുണ്ട്‌. ഏറ്റവും നീളംകൂടിയ നദി ത്യോർസ (220 കി.മീ.) ആണ്‌. ഹിമാനീകൃത തടാകങ്ങളും ഇവിടെ ധാരാളമായുണ്ട്‌. നയന മനോഹരങ്ങളായ ഇവയിൽ ചിലത്‌ ധാതുനിക്ഷേപങ്ങള്‍ ഉള്‍ക്കൊള്ളുന്നു.
കാലാവസ്ഥ
ദ്വീപ്‌ എന്ന നിലയിൽ കാലാവസ്ഥയിൽ ഗണ്യമായ സമുദ്രസ്വാധീനത ദൃശ്യമാണ്‌. തണുത്ത ഉഷ്‌ണകാലവും ശൈത്യം കുറഞ്ഞ്‌ സമീകൃതമായ ശീതകാലവുമാണ്‌ ഐസ്‌ലന്‍ഡിലെ കാലാവസ്ഥയുടെ പ്രതേ്യകതകള്‍. താപനിലയിലും വർഷണത്തിലും പ്രാദേശികമായ ഏറ്റക്കുറച്ചിൽ കാണാം. പൊതുവേ ശീതകാലത്താണ്‌ കൂടുതൽ വർഷണം നടക്കുന്നത്‌; ഏറിയകൂറും ഹിമപാതവുമാണ്‌. ശീതക്കാറ്റുകളാണ്‌ ഐസ്‌ലന്‍ഡിലെ കാലാവസ്ഥാപ്രതിഭാസങ്ങളിൽ ദുസ്സഹമായിട്ടുള്ളത്‌.
സസ്യജാലവും ജന്തുവർഗങ്ങളും
ദ്വീപിന്റെ നാലിലൊരു ഭാഗത്തുമാത്രമേ സ്ഥിരമായ സസ്യാവരണമുള്ളൂ. വൃക്ഷങ്ങള്‍ ഇല്ലെന്നുതന്നെ പറയാം. മുരടിച്ചുവളരുന്ന ഹിതർ, വില്ലോ, ബെർച്ച തുടങ്ങിയ കുറ്റിച്ചെടികളും സാധാരണമാണ്‌; ചതുപ്പുകളിലും നദീതീരങ്ങളിലുമാണ്‌ ഇവ സമൃദ്ധമായുള്ളത്‌. നിരപ്പുള്ള പ്രദേശങ്ങള്‍ വള്ളിപ്പടർപ്പുകളും പുൽമേടുകളും നിറഞ്ഞു കാണുന്നു.
ഐസ്‌ലന്‍ഡിൽ നൈസർഗികമായുണ്ടായിരുന്ന കരജീവിയായ ഏകസസ്‌തനി ആർട്ടിക്‌ കുറുനരിയാണ്‌. റെയിന്‍ഡിയർ, മിങ്ക്‌ തുടങ്ങിയവ ഇവിടേക്കു കുടിയേറപ്പെട്ടിട്ടുണ്ട്‌. മിങ്ക്‌, എലി തുടങ്ങിയവ ഇപ്പോള്‍ കർഷകർക്കു ബാധയായിത്തീർന്നിരിക്കുന്നു. തീരപ്രദേശത്തെ ജലാശയങ്ങളിൽ നീർനായ്‌, തിമിംഗലം തുടങ്ങിയവ സാധാരണമാണ്‌; ധ്രുവക്കരടിയും ഇടയ്‌ക്കിടെ ദ്വീപു സന്ദർശിക്കാറുണ്ട്‌. ഐസ്‌ലന്‍ഡിൽ നിരവധി ഇനം പക്ഷികളുണ്ട്‌. ജലചാരിയിനങ്ങളാണ്‌ കൂടുതൽ. വെള്ളവാലുള്ള വിദേശയിനം കഴുകനെയും ഐസ്‌ലന്‍ഡിൽ കാണാം.
ഐസ്‌ലന്‍ഡിലെ ജലാശയങ്ങളിൽ സാൽമണ്‍, ട്രൗട്ട്‌, ചാർ തുടങ്ങിയ സാമ്പത്തിക പ്രധാന്യമുള്ള മത്സ്യങ്ങള്‍ സമൃദ്ധമായുണ്ട്‌; തീരത്തോടടുത്ത കടലുകളിലെ മത്സ്യശേഖരം ഹെറിങ്‌, കോഡ്‌, ഹാഡോക്‌ തുടങ്ങിയവയെ ഉള്‍ക്കൊള്ളുന്നു.
ജനങ്ങള്‍
ഐസ്‌ലന്‍ഡിലെ ആദ്യകാല കുടിയേറ്റക്കാർ സ്‌കാന്‍ഡിനേവിയന്‍ ജനവിഭാഗങ്ങ(Norsemen)ളായിരുന്നു. സ്‌കോട്ട്‌ലന്‍ഡ്‌-അയർലണ്ട്‌ ഭാഗങ്ങളിൽ പാർപ്പുറപ്പിച്ചിരിക്കുന്ന വൈക്കിങ്ങുകളുടെ അനന്തരഗാമികളായ കെൽട്ടിക്‌ വിഭാഗക്കാരും ആദ്യകാലത്തുതന്നെ ഐസ്‌ലന്‍ഡിൽ നിവസിച്ചിരുന്നു. മേല്‌പറഞ്ഞ രണ്ടു ജനവിഭാഗങ്ങളും സമഞ്‌ജസമായ സങ്കരത്തിലൂടെ പുതിയ വർഗത്തിന്‌ ജന്മം നല്‌കിയിരിക്കുന്നു. ചരിത്രപരമായും ഭാഷാപരമായും സാംസ്‌കാരിക പാരമ്പര്യം കൊണ്ടും ഐസ്‌ലന്‍ഡ്‌ സ്‌കാന്‍ഡിനേവിയന്‍ രാജ്യങ്ങളുമായി ബന്ധപ്പെട്ടു നില്‌ക്കുന്നു.
മതം. എ.ഡി. 1000 മുതല്‌ക്കേ ഐസ്‌ലന്‍ഡിൽ ക്രിസ്‌തുമതം വ്യാപിക്കുകയുണ്ടായി. 1550-ൽ ഡാനിഷ്‌ രാജാവിന്റെ ശാസനത്തിലൂടെ ഇവാന്‍ജലിക്കൽ ലൂഥറന്‍ വിശ്വാസത്തിന്‌ ഔദേ്യാഗികാംഗീകാരം ലഭിക്കുകയുണ്ടായി. എവിടെവച്ചും പ്രാർഥന നടത്താന്‍ സ്വാതന്ത്ര്യമുള്ള ഫ്രീചർച്ചുകളും ഇവിടെ ധാരാളമുണ്ട്‌. ലൂഥറന്‍കാർ കഴിഞ്ഞാൽ ഫ്രീചർച്ചുകാരാണ്‌ ഇവിടെ അധികവും. റോമന്‍കത്തോലിക്കർ, പെന്തക്കോസ്‌ത്‌, സെവന്‍ത്‌ഡേ അഡ്‌വെന്റിസ്റ്റ്‌ തുടങ്ങിയ അവാന്തര വിഭാഗങ്ങളും ഉണ്ട്‌. എന്നാൽ പൊതുജീവിതത്തിൽ മതസഭകള്‍ക്ക്‌ കാര്യമായ സ്വാധീനതയില്ലാത്ത സ്ഥിതിയാണുള്ളത്‌.
സംസ്‌കാരം. ഉയർന്ന ജീവിതനിലവാരവും ആയുർദൈർഘ്യവുംകൊണ്ട്‌ അനുഗൃഹീതരാണ്‌ ഐസ്‌ലന്‍ഡുകാർ. കഠിനാധ്വാനം സുഖജീവിതത്തിന്‌ അത്യന്താപേക്ഷിതമാണെന്ന സാമൂഹികബോധം പരക്കെ നിലനില്‌ക്കുന്നു. 1940-നുശേഷം പാരമ്പര്യക്രമങ്ങളുടെ കാർക്കശ്യത്തിന്‌ അയവുവന്നിട്ടുണ്ട്‌. ഗണ്യമായൊരു വിഭാഗം (80 ശതമാനം) നഗരജീവിതത്തിലേക്ക്‌ ആകൃഷ്‌ടരായിത്തീർന്നിരിക്കുന്നു. എന്നാൽ സഞ്ചാരസൗകര്യത്തിന്റെ അപര്യാപ്‌തതമൂലം മിക്ക പട്ടണങ്ങളിലും ഗ്രാമ്യമായ അന്തരീക്ഷം തുടരുന്നതായി കാണാം. സംഗീത-സാഹിത്യാദികളിലുള്‍പ്പെടെ കലാഭിരുചി ഏറെയുള്ള ഒരു ജനതയാണ്‌ ഐസ്‌ലന്‍ഡുകാർ. ബ്യോർക്ക്‌ (Bjork) സംഗീതം, വിചിത്രമായ ഭക്ഷണം, സ്‌കീയിങ്‌, സെക്‌സ്‌ ബാറുകള്‍ എന്നിവകൊണ്ട്‌ പ്രസിദ്ധമാണിവിടം. എന്നാൽ ഇവർ സുഖലോലുപരാണെന്നു പറഞ്ഞുകൂടാ.
ചരിത്രം
എ.ഡി. എട്ടാം ശതകത്തിന്റെ അവസാനദശകത്തിൽ അയർലണ്ടുകാരും 85 കൊല്ലങ്ങള്‍ക്കുശേഷം നോർവേക്കാരും ദ്വീപിൽ കുടിേയറ്റമാരംഭിച്ചു. ഇവർ ഭൂവുടമകളും പുരോഹിതരും കൂടിയായ നാടുവാഴി(ഗോർ)കളുടെ ഭരണത്തിന്‍കീഴിൽ കഴിഞ്ഞുവന്നു. നോർവേയെ അനുകരിച്ച്‌ 927-ൽ ദ്വീപിലൊരു നിയമസംഹിത നടപ്പാക്കി. മൂന്ന്‌ കൊല്ലത്തിനുശേഷം പുതിയ ഭരണസമ്പ്രദായവും സ്ഥാപിതമായി. യൂറോപ്പിലെ ആദ്യത്തെ ദേശീയനിയമസഭയെന്നു കരുതപ്പെടുന്ന "ആൽത്തിങ്‌' ഐസ്‌ലന്‍ഡിൽ നിലവിൽവന്നു. കുടിപ്പകകള്‍ക്ക്‌ അറുതിവരുത്താനും നിയാമകഭരണം ഏർപ്പെടുത്താനും ഈ സഭ സഹായിച്ചു. പക്ഷേ നാടുവാഴികളും അവരുടെ ഉപദേശകരും ചേർന്നുള്ള "ലോഗ്രറ്റ' എന്ന നിയമസഭയ്‌ക്കാണ്‌ സ്വാധീനത കൂടുതലായുണ്ടായിരുന്നത്‌.
ഐസ്‌ലന്‍ഡിലെ വൈക്കിങ്ങുകളുടെ സാഹസിക സമുദ്രസഞ്ചാരങ്ങളും അതിലൂടെ നടത്തിയ കണ്ടുപിടിത്തങ്ങളും സവിശേഷ ശ്രദ്ധയാകർഷിക്കുന്നു (Icelandic Sagas). 10-ാം ശതകത്തിന്റെ അന്ത്യപാദത്തിൽ നോർവേയിലെ രാജാവായ ഒലാഫ്‌ ട്രി ഗ്വിസന്‍ ക ആണ്‌ ഇവിടെ ക്രിസ്‌തുമതം പ്രചരിപ്പിച്ചത്‌. എ.ഡി. 1000-ത്തിൽ ആൽത്തിങ്‌ സമ്മേളിച്ച്‌ ക്രിസ്‌തുമതത്തെ ഔദേ്യാഗികമായംഗീകരിച്ചു. ക്രമേണ പാഗനിസം (Paganism)ഇല്ലാതായി. മതാധിപതികളായ നാടുവാഴികള്‍ ക്രിസ്‌തുമത തത്ത്വങ്ങള്‍ പഠിച്ച്‌ പുരോഹിതന്മാരായി അധികാരം നിലനിർത്തിയതിനാൽ രാഷ്‌ട്രീയ പരിണാമം ഉണ്ടായില്ല.
13-ാം ശ. ആയപ്പോഴേക്കും ആഭ്യന്തരക്കുഴപ്പംമൂലം രാജ്യത്തെ സമ്പദ്‌വ്യവസ്ഥ തകർന്നു. നോർവേയിലെ രാജാവായ ഹാക്കോണ്‍ കഢ (1204-63) ഈ കുഴപ്പങ്ങളിൽനിന്ന്‌ മുതലെടുത്ത്‌ തന്റെ സ്വാധീനത വർധിപ്പിച്ചു. നാടുവാഴികള്‍ക്കുപകരം രാജാവിന്റെ ഉദ്യോഗസ്ഥന്മാർക്ക്‌ ഭരണാധികാരം നല്‌കി. ആൽത്തിങ്ങിന്റെ സ്വാധീനത ക്രമേണ കുറഞ്ഞ്‌, 1800-43 കാലത്ത്‌ ഇല്ലാതായി.
1831-ൽ നോർവേ ഡെന്മാർക്കിന്റെ ഭാഗമായിത്തീർന്നപ്പോള്‍ ഐസ്‌ലന്‍ഡും ആ രാജ്യത്തിൽ ലയിച്ചു. 1814-ലെ കീൽ സന്ധി പ്രകാരം നോർവേ സ്വീഡന്റെ ഭാഗമായിത്തീർന്നെങ്കിലും ഐസ്‌ലന്‍ഡ്‌ ഡെന്മാർക്കിന്റെ ഭാഗമായി തുടരുന്നു. ഡെന്മാർക്കിന്റെ രാജപ്രതിനിധിയായ ലാന്‍സ്‌ഫൊഗഡ്‌ ആണ്‌ ദ്വീപ്‌ ഭരിച്ചിരുന്നത്‌. 1834-ൽ പ്രാദേശിക കൂടിയാലോചനാ സഭകള്‍ രൂപവത്‌കരിച്ചപ്പോള്‍ റോസ്‌കിൽഡ്‌ എന്ന പ്രവിശ്യയുടെ സഭയിൽ ഐസ്‌ലന്‍ഡിന്‌ രണ്ട്‌ പ്രതിനിധികള്‍ ഉണ്ടായിരുന്നു. 1838-ൽ ഐസ്‌ലന്‍ഡിന്റെ തലസ്ഥാനമായ റെയ്‌ക്യവിക്കിൽ ഒരു പ്രത്യേക സമിതി രൂപവത്‌കരിച്ചു. 1843-ൽ പ്രതേ്യക പ്രവിശ്യസഭയായി ആൽത്തിങ്‌ പുനഃസ്ഥാപിക്കപ്പെട്ടു.
19-ാം ശതകത്തിന്റെ നാലും അഞ്ചും ദശകങ്ങളിൽ ജോന്‍ സിഗുർസ്സന്റെ (Jon Sigursson, 1811-79)നേതൃത്വത്തിൽ ഒരു ദേശീയ പ്രസ്ഥാനം വളർന്നുവന്നു. 1849-ൽ ഐസ്‌ലന്‍ഡ്‌ ആഭ്യന്തര സ്വയംഭരണം ആവശ്യപ്പെട്ടു. 1871-ൽ ആഭ്യന്തരകാര്യങ്ങളിൽ "പ്രതേ്യക അവകാശങ്ങള്‍' അനുവദിക്കപ്പെടുകയും ചെയ്‌തു. പ്രക്ഷോഭം തുടർന്നപ്പോള്‍, 1874-ൽ ഡെന്മാർക്കിലെ ക്രിസ്‌ത്യന്‍ കത, ഐസ്‌ലന്‍ഡിന്‌ ആഭ്യന്തര സ്വയംഭരണാവകാശം നല്‌കുന്ന ഭരണഘടന അനുവദിക്കുകയും ചെയ്‌തു. പക്ഷേ ഡെന്മാർക്കിന്റെ മേൽനോട്ടം തുടർന്നത്‌ ഭിന്നതകള്‍ വർധിക്കാന്‍ കാരണമായി. 1901-ൽ ഡെന്മാർക്കിൽ ജനാധിപത്യം സ്ഥാപിതമായി. 1903-ൽ ഐസ്‌ലന്‍ഡിൽ ഒരു പ്രതേ്യക ദേശീയഭരണകൂടം നിലവിൽവന്നു. 1918 ന. 30-ന്‌ ഡെന്മാർക്കിലെ രാജാവിന്റെ നാമമാത്രമായി അധികാരം അംഗീകരിച്ചുകൊണ്ട്‌ ഐസ്‌ലന്‍ഡ്‌ സ്വതന്ത്രമായി. രണ്ടു രാജ്യങ്ങള്‍ക്കും വിദേശനയത്തിൽ ഐകരൂപ്യമുണ്ടായിരുന്നു.
രണ്ടാം ലോകയുദ്ധകാലത്ത്‌ ജർമന്‍കാർ ഡെന്മാർക്ക്‌ പിടിച്ചെടുത്തു. തുടർന്ന്‌ ഐസ്‌ലന്‍ഡും ഡെന്മാർക്കുമായുള്ള ബന്ധം വിച്ഛേദിക്കപ്പെട്ടു. 1940 മേയിൽ ഐസ്‌ലന്‍ഡിന്റെ നിഷ്‌പക്ഷത വകവയ്‌ക്കാതെ ബ്രിട്ടീഷ്‌ ഭടന്മാർ അവിടെ നിയന്ത്രണം സ്ഥാപിച്ചു. 1941 ജൂല. 7-ന്‌ ഐസ്‌ലന്‍ഡിന്റെ ക്ഷണപ്രകാരം യു.എസ്‌. സൈന്യം തത്‌സ്ഥാനത്തു നിലയുറപ്പിച്ചു താവളങ്ങളുണ്ടാക്കി. 1944 മേയ്‌ 17-ന്‌ ഐസ്‌ലന്‍ഡ്‌ സ്വതന്ത്രപരമാധികാര രാഷ്‌ട്രമായി; ജൂണ്‍ 17-ന്‌ ഇത്‌ ഒരു റിപ്പബ്ലിക്കായി മാറി. രണ്ടാം ലോകയുദ്ധാനന്തരം ഉദേ്യാഗസ്ഥമേധാവിത്വമുള്ള ഭരണംമാറി സോഷ്യലിസ്റ്റ്‌ വ്യവസ്ഥ സ്ഥാപിതമായി. 1946-ൽ സഖ്യകക്ഷികള്‍ ഐസ്‌ലന്‍ഡിൽനിന്ന്‌ പിന്മാറുകയും ആഭ്യന്തരപ്രശ്‌നത്തെ ത്തുടർന്ന്‌ 1949 മാ. 30-ന്‌ നാറ്റോയിൽ ചേരുകയും ചെയ്‌തു. 1951 മേയ്‌ 5-ന്‌ അമേരിക്കയുമായി ഏർപ്പെട്ട കരാർപ്രകാരം 2006 സെപ്‌. 30 വരെ അമേരിക്കന്‍ സൈന്യം ഭാഗികമായി തുടരുകയും ഐസ്‌ലന്‍ഡിൽ അഭ്യന്തരസൈന്യം നിലവിൽവരുകയും ചെയ്‌തു.
ദ്വീപിൽ മനുഷ്യാധിവാസം തുടങ്ങിയതുമുതലുള്ള മുഖ്യ ഉപജീവനമാർഗമായ മത്സ്യബന്ധനം ആധുനികവത്‌കരണത്തിനു വിധേയമായപ്പോള്‍ കടലിൽ സമീപസ്ഥരാജ്യങ്ങളുമായി അതിർത്തിത്തർക്കങ്ങള്‍ ഉയർന്നുവന്നു. 1952-ൽ സമുദ്രാതിർത്തി മൂന്നിൽനിന്നും നാലും 1958-ൽ 20-ഉം കി.മീ. ആയി ഐസ്‌ലന്‍ഡ്‌ നീട്ടി. ബ്രിട്ടന്‍, പടിഞ്ഞാറ്‌ ജർമനി എന്നീ രാജ്യങ്ങളുടെ എതിർപ്പുകളെ അവഗണിച്ച്‌ 1973-ൽ ഇത്‌ 80 കിലോമീറ്ററായും 1974-ൽ ലോകകോടതിയുടെ വിധി വകവയ്‌ക്കാതെ സമുദ്രാതിർത്തി 320 കിലോമീറ്ററായും വർധിപ്പിച്ചു. അടുത്ത വർഷം മത്സ്യബന്ധനത്തെ സംബന്ധിച്ച്‌ ബ്രിട്ടനുമായി സാരമായ ഏറ്റുമുട്ടലുണ്ടായി; സംഘർഷം പിൽക്കാലത്തും തുടർന്നു.
സമ്പദ്‌വ്യവസ്ഥ
കൃഷി
സസ്യവളർച്ചയ്‌ക്ക്‌ അനുയോജ്യമായ ഋതു നന്നേ ഹ്രസ്വമാണെന്നത്‌ ധാന്യവിളകള്‍ക്ക്‌ പ്രാതികൂല്യം സൃഷ്‌ടിച്ചിരിക്കുന്നു. ഉരുളക്കിഴങ്ങ്‌, ടർണിപ്‌ തുടങ്ങിയ കിഴങ്ങുവർഗങ്ങളാണ്‌ പ്രധാന വിളകള്‍. സാങ്കേതിക സംരക്ഷണത്തിലൂടെ തക്കാളി, വെള്ളരി തുടങ്ങിയ പച്ചക്കറികള്‍ വളർത്തുന്ന ഏർപ്പാട്‌ പ്രവൃദ്ധമായിട്ടുണ്ട്‌. കാലിത്തീറ്റയ്‌ക്കുള്ള പുൽവർഗങ്ങള്‍ സമൃദ്ധമായി വളരുന്നു; മാംസാവശ്യത്തിനായി ധാരാളം ആടുകളെയും വളർത്തിവരുന്നു. ആടുകളിൽനിന്ന്‌ രോമം, തുകൽ എന്നിവയും ഉത്‌പാദിപ്പിക്കുന്നു. കോഴിവളർത്തലും പന്നിവളർത്തലും വികസിച്ചിട്ടുണ്ട്‌. കാർഷികോത്‌പന്നവിപണനം മുഖ്യമായും സഹകരണസംഘങ്ങള്‍ മുഖേനയാണ്‌ നടക്കുന്നത്‌. രണ്ടാം ലോകയുദ്ധത്തിനുശേഷം ശാസ്‌ത്രീയ സമ്പ്രദായങ്ങള്‍ ആവിഷ്‌കരിക്കപ്പെട്ടു.
മത്സ്യബന്ധനം
തിമിംഗലവേട്ടയും ആഴക്കടൽ മീന്‍പിടിത്തവും ഉള്‍പ്പെടെ മത്സ്യബന്ധനത്തിന്റെ എല്ലാ ശാഖകളിലും ഐസ്‌ലന്‍ഡ്‌ മുന്‍പന്തിയിലാണ്‌. വിദേശനാണ്യവരുമാനത്തിലെ 90 ശതമാനവും മത്സേ്യാത്‌പന്നങ്ങളിലൂടെയാണ്‌ സമ്പാദിക്കപ്പെടുന്നത്‌. മത്സ്യശീതീകരണത്തിനുള്ള വിപുലമായ സംവിധാനമുണ്ട്‌. അനുബന്ധ വ്യവസായമെന്നനിലയിൽ കാനിങ്ങും അഭിവൃദ്ധിപ്പെട്ടിരിക്കുന്നു.
വ്യവസായം
ഐസ്‌ലന്‍ഡിലെ പ്രവൃത്തിയെടുക്കുന്നവരിൽ 18.3 ശതമാനവും വ്യവസായവുമായി ബന്ധപ്പെട്ടവരാണ്‌. മത്സ്യ-ഭക്ഷ്യ സംസ്‌കരണമാണ്‌ ഏറ്റവും മുന്തിയ വ്യവസായം. അച്ചടിയും പുസ്‌തക പ്രസിദ്ധീകരണവുമാണ്‌ വിപുലമായി വളർന്നിട്ടുള്ള മറ്റൊരു വ്യവസായം. സിമന്റ്‌, രാസവളം എന്നിവയുടെ നിർമാണം, ഡയറ്റമൈറ്റ്‌, അലുമിനിയം എന്നീ ധാതുക്കളുടെ സംസ്‌കരണം എന്നിവയാണ്‌ നിലവിലുള്ള ഘനവ്യവസായങ്ങള്‍. ജ്യോർസാനദിയിലെ ജലമുപയോഗിച്ച്‌ വൈദ്യുതി ഉത്‌പാദിപ്പിക്കുന്ന ബർഫെൽ നിലയമാണ്‌ ഐസ്‌ലന്‍ഡിലെ ഏറ്റവും വലിയ ഉത്‌പാദനശാല. ഇപ്പോള്‍ ആധുനിക ലോകത്തോട്‌ പിടിച്ചുനില്‌ക്കാന്‍ കഴിയുന്ന അത്യാധുനിക വികസനമാർഗങ്ങള്‍ ഐസ്‌ലന്‍ഡിലുണ്ട്‌. സോഫ്‌റ്റ്‌വെയർ, ബയോടെക്‌നോളജി, ബാങ്കിങ്‌ മേഖല എന്നിവയിൽ വന്‍ പുരോഗതി നേടാന്‍ ഈ രാജ്യത്തിനായിട്ടുണ്ട്‌. 2000-ത്തിൽ ബാങ്കിങ്‌ മേഖലയിൽ ഉണ്ടായ തകർച്ചയും 2008-ലെ ആഗോള സാമ്പത്തിക മാന്ദ്യവും ഐസ്‌ലന്‍ഡിനെ ബാധിച്ചെങ്കിലും 2011-ലെ യു.എന്‍. റിപ്പോർട്ടുപ്രകാരം ലോകത്തിലെ 14-ാമത്തെ വികസിതരാഷ്‌ട്രവും പ്രതിശീർഷവരുമാനത്തിന്റെ അടിസ്ഥാനത്തിൽ നാലാം സ്ഥാനത്ത്‌ നില്‌ക്കുന്ന രാജ്യവുമാണ്‌.
വാണിജ്യം
,_Reykjav%C3%ADk.jpg)
ഊർജ-ഇന്ധനങ്ങള്‍, യന്ത്രങ്ങള്‍, വാഹനങ്ങള്‍, ഭക്ഷ്യധാന്യം, തടി, വസ്‌ത്രങ്ങള്‍ എന്നിവയും ഒട്ടനവധി ഉത്‌പാദിത വസ്‌തുക്കളും ഇറക്കുമതി ചെയ്യാതെ നിർവാഹമില്ലാത്ത സ്ഥിതിയാണ്‌ ഐസ്‌ലന്‍ഡിലുള്ളത്‌. മത്സ്യവും മത്സ്യോത്‌പന്നങ്ങളും, ഗവേ്യാത്‌പന്നങ്ങള്‍, ഡയറ്റമൈറ്റ്‌, അലുമിനിയം എന്നിവയുമാണ്‌ പ്രധാന കയറ്റുമതികള്‍. യു.കെ., യു.എസ്‌., പശ്ചിമ-പൂർവജർമനികള്‍, റഷ്യ, നോർവേ എന്നീ രാജ്യങ്ങളാണ്‌ പ്രമുഖ വ്യാപാര പങ്കാളികള്‍. വാണിജ്യരംഗത്ത്‌ സഹകരണപ്രസ്ഥാനത്തിന്‌ വലുതായ പ്രാതിനിധ്യമുള്ള ഒരു രാജ്യമാണ്‌ ഐസ്‌ലന്‍ഡ്‌.
ഗതാഗതം
റെയിൽവേ ഇല്ലാത്ത ചുരുക്കം രാജ്യങ്ങളിൽ ഒന്നാണ്‌ ഐസ്‌ലന്‍ഡ്‌. ദ്വീപിലൊട്ടാകെയായി 13,028 കി.മീ. റോഡുകളുമുണ്ട്‌. തീരദേശകേന്ദ്രങ്ങള്‍ക്കിടയിൽ കപ്പൽഗതാഗതം പ്രാവർത്തികമാക്കിയിരിക്കുന്നു. റെയിക്‌ജാവിക്‌, ഗ്രന്‍ഡർടണ്‍ഗി, ഹാഫ്‌നർ ഫ്യോർദർ എന്നിവയാണ്‌ പ്രധാന തുറമുഖങ്ങള്‍. വ്യോമഗതാഗതരംഗത്ത്‌ ഐസ്‌ലന്‍ഡ്‌ വളരെ മുന്നാക്കം നില്‌ക്കുന്നു. രണ്ട്‌ അന്താരാഷ്‌ട്ര വിമാനക്കമ്പനികള്‍ ഈ രാജ്യത്ത്‌ പ്രവർത്തിക്കുന്നു. ദ്വീപിലെ വ്യോമകേന്ദ്രങ്ങളെ പരസ്‌പരം ബന്ധിപ്പിക്കുന്നവയ്‌ക്കു പുറമേ, നിതേ്യനയുള്ള ആംബുലന്‍സ്‌ സർവീസും ഉള്‍ക്കൊള്ളുന്നതാണ്‌ ഐസ്‌ലന്‍ഡിലെ ആഭ്യന്തരവേ്യാമയാന വ്യവസ്ഥ. തലസ്ഥാനമായ റെയ്‌ക്യവിക്കിൽനിന്ന്‌ 40 കി.മീ. അകലെ കെഫ്‌ലാവിക്കിലാണ്‌ അന്താരാഷ്‌ട്രവിമാനത്താവളം സ്ഥിതിചെയ്യുന്നത്‌.
ടൂറിസം
ഹാള്‍ഗ്രിംസ്‌ കിർകിയ എന്ന പള്ളി, തിമിംഗല നിരീക്ഷണം, ഉഷ്‌ണജലതടാകങ്ങള്‍, ബ്യൂലഗൂണ്‍ ദ്വീപ്‌, സുവർണവൃത്തം, ഹവിറ്റ നദിയിലെ ഇരട്ട വെള്ളച്ചാട്ടം, തിങ്‌മെല്ലിൽ ദേശീയ ഉദ്യാനം, ഗ്രറ്റ്‌ ഗയ്‌സർ എന്ന ഉഷ്‌ണജലപ്രവാഹം എന്നിവയാണ്‌ ഇവിടത്തെ പ്രധാന ടൂറിസ്റ്റ്‌ കേന്ദ്രങ്ങള്‍. ഇവയിൽ ഹാള്‍ഗ്രിംസ്‌ കിർകിയ പള്ളിയിലെ 75 മീ. ഉയരമുള്ള ഗോപുരവും ഹവിറ്റ്‌ നദിയിലെ മഴവില്ലിന്റെ ആകൃതിയിൽ ഒരുക്കുന്ന വെള്ളച്ചാട്ടവും ലോകത്തിലെ ആദ്യ പാർലമെന്റ്‌ സമ്മേളനം (അൽതിങ്‌) കൂടിയ ദേശീയ ഉദ്യാനവും സഞ്ചാരികളെ ഏറെ ആകർഷിക്കുന്നവയാണ്‌.
രാഷ്‌ട്രീയം
1845-ലാണ്‌ ആധുനികരീതിയിലുള്ള "അൽതിങ്‌' ജനപ്രതിനിധിസഭ നിലവിൽവന്നത്‌. 63 സീറ്റുകളുള്ള പാർലമെന്റ്‌ പ്രതിനിധികളെ ജനങ്ങള്‍ തെരഞ്ഞെടുക്കുന്നു. പ്രസിഡന്റാണ്‌ രാഷ്‌ട്രത്തലവന്‍. ഭരണത്തലവന്‍ പ്രധാനമന്ത്രിയാണ്‌, പ്രസിഡന്റ്‌ പദവി ആലങ്കാരികവും സഭാംഗങ്ങളിൽനിന്ന്‌ മന്ത്രിസഭയുണ്ടാക്കുന്നത്‌ പ്രധാനമന്ത്രിയുമാണ്‌. പ്രസിഡന്റിന്റെയും പ്രധാന മന്ത്രിയുടെയും കാലാവധി നാലുവർഷമാണ്‌. രാജ്യത്തെ ജനസംഖ്യയുടെ അടിസ്ഥാനത്തിൽ എട്ട്‌ മേഖലകളായും 23 കൗണ്ടികളായും തിരിച്ചിട്ടുണ്ട്‌. മജിസ്‌ട്രറ്റുകളാണ്‌ കൗണ്ടികളുടെ ചുമതലവഹിക്കുന്നത്‌. കൗണ്ടികളെ 79 മുനിസിപ്പാലിറ്റികളായും വിഭജിച്ചിട്ടുണ്ട്‌. പ്രസിഡന്റിനെ ജനങ്ങള്‍ നേരിട്ടാണ്‌ തെരഞ്ഞെടുക്കുന്നത്‌. ഇന്‍ഡിപെന്‍ഡന്‍സ്‌ പാർട്ടി, ലെഫ്‌റ്റ്‌ ഗ്രീന്‍ മൂവ്‌മെന്റ്‌, ലിബറൽ പാർട്ടി, പ്രാഗ്രസ്സീവ്‌ പാർട്ടി, സോഷ്യൽ ഡെമൊക്രാറ്റിക്‌ അലയന്‍സ്‌ എന്നിവയാണ്‌ ഇവിടത്തെ പ്രധാന രാഷ്‌ട്രീയപാർട്ടികള്‍.
(ഡോ. എന്‍. രാജേന്ദ്രന്‍; സ.പ.)
