This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
എരണ്ട
സര്‍വ്വവിജ്ഞാനകോശം സംരംഭത്തില്‍ നിന്ന്
Mksol (സംവാദം | സംഭാവനകള്‍)
(പുതിയ താള്‍: == എരണ്ട == == Teal == അന്‍സരിഫോർമിസ്‌ വർഗത്തിലെ ആന്‍സരിഡേ കുടുംബത്...)
അടുത്ത വ്യത്യാസം →
10:38, 18 ഏപ്രില്‍ 2014-നു നിലവിലുണ്ടായിരുന്ന രൂപം
എരണ്ട
Teal
അന്‍സരിഫോർമിസ്‌ വർഗത്തിലെ ആന്‍സരിഡേ കുടുംബത്തിൽപ്പെട്ട ഒരു പക്ഷി. താറാവുകളും അരയന്നങ്ങളും ഉള്‍ക്കൊള്ളുന്ന കുടുംബത്തിലെ ഒരംഗമാണിത്‌. നെറ്റോപ്പസ്‌ (Nettopus)എന്ന ശാസ്‌ത്രനാമത്തിലാണ്‌ ഇന്ത്യന്‍ എരണ്ട അറിയപ്പെടുന്നത്‌. വിവിധതരം ഭക്ഷണം അകത്താക്കാന്‍ പറ്റിയ വീതിയുള്ള പരന്ന ചുണ്ടാണിതിനുള്ളത്‌. കാലിലെ മൂന്ന്‌ മുന്‍വിരലുകള്‍ ചർമപടലംകൊണ്ട്‌ പരസ്‌പരം ബന്ധിക്കപ്പെട്ടിരിക്കുന്നു. നാക്ക്‌ തടിച്ചതും മാംസളവുമാണ്‌. പുറത്തേക്കു വലിയുന്ന ഒരു ശിശ്‌നം എരണ്ടകളുടെ ഒരു പ്രത്യേകതയാണ്‌.
വേഗത്തിൽ പറക്കാന്‍ കഴിവുള്ള ഈ പക്ഷി ഒരു മുങ്ങൽ വിദഗ്‌ധന്‍ കൂടിയാണ്‌. പ്രതികൂല കാലാവസ്ഥകളിൽ ഇര തേടാനും ഇണ ചേരാനും വേണ്ടി അവ ബഹുദൂരം കൂട്ടമായി ദേശാടനം നടത്തുന്നു. ചില പ്രത്യേക കാലങ്ങളിൽ കേരളത്തിലെ കുട്ടനാടന്‍ പാടശേഖരങ്ങളിലും ഉള്‍നാടന്‍ ജലാശയങ്ങളിലും എരണ്ടകള്‍ സംഘമായി വന്നണയുന്നു. വലിയ ചങ്ങാടം പോലെ അവ ജലോപരിതലത്ത്‌ പൊങ്ങിക്കിടന്ന്‌ ആഹാരസമ്പാദനം നടത്തുന്നു. യൂറോപ്പിൽനിന്ന്‌ കാലാകാലങ്ങളിൽ നമ്മുടെ നാട്ടിൽ വന്നണയുന്ന അനാസ്‌ ക്രക്ക എന്ന എരണ്ട താരതമ്യേന ചെറുതാണ്‌. തലമുതൽ വാലുവരെയുള്ള മൊത്തം വലുപ്പം ശരാശരി 38 സെ.മീ. ആണ്‌. ആണിനും പെണ്ണിനും തമ്മിൽ പ്രകടമായ വർണ വ്യത്യാസമുണ്ട്‌. ആണ്‍പക്ഷിക്ക്‌ ചാരനിറവും പെണ്ണിന്‌ പൊട്ടോടു കൂടിയ തവിട്ടുനിറവുമാണുള്ളത്‌. ആണിന്റെ കണ്ണിനു ചുറ്റും ഒരു കറുത്ത വരയുണ്ട്‌. ആണ്‍പക്ഷിയുടെ ചിറകിന്റെ തൂവലുകള്‍ക്ക്‌ കറുപ്പും വെളുപ്പും ഇടകലർന്ന വരകളുണ്ട്‌; ചുണ്ടിന്‌ കറുപ്പുനിറവും.
എരണ്ടകളുടെ മുഖ്യമായ ഭക്ഷണം ആഴം കുറഞ്ഞ ശുദ്ധജലാശയങ്ങളിൽ വളരുന്ന ചെടികളാണ്‌ (ലെമ്‌ന). ചിറകുകള്‍ വിടർത്തി തല വെള്ളത്തിനടിയിലേക്കു മുക്കി ആഹാരം തേടുന്ന എരണ്ടകളുടെ ദൃശ്യം മനോഹരമായ ഒരു കാഴ്‌ചയാണ്‌. വെള്ളത്തിലൂടെ വേഗത്തിൽ നീന്തിയും ചിറകുകളടിച്ച്‌ ശബ്‌ദമുണ്ടാക്കി ചാടിയും അവ ഇരതേടുന്നു. ചിലപ്പോള്‍ കടൽത്തീരങ്ങളിലും അവയെ കാണാം. ഷഡ്‌പദങ്ങളും ധാന്യമണികളും ആഹരിച്ച്‌ തീരപ്രദേശങ്ങളിൽ അവ കഴിഞ്ഞുകൂടുന്നതായും കാണാറുണ്ട്‌.
ജലാശയങ്ങള്‍ക്കു സമീപമുള്ള കരയോര പ്രദേശങ്ങളിൽ എരണ്ടകള്‍ കൂടുവയ്‌ക്കുന്നു. അതിനുവേണ്ടി പുല്ലുകളും തൂവലുകളുമാണ്‌ ഉപയോഗപ്പെടുത്തുന്നത്‌. കുട്ടയുടെ ആകൃതിയിലുള്ള കൂടു നിർമിക്കുന്നത്‌ പെണ്‍പക്ഷികളാണ്‌. പെണ്‍പക്ഷി വർഷത്തിൽ 5 മുതൽ 16 മുട്ടകള്‍വരെ കൂട്ടിനുള്ളിൽ നിക്ഷേപിക്കും. അടയിരിക്കുന്നത്‌ പെണ്‍പക്ഷിയാണ്‌. മുട്ട വിരിഞ്ഞു കുഞ്ഞുങ്ങള്‍ പുറത്തുവരാന്‍ 21 മുതൽ 35 വരെ ദിവസങ്ങള്‍ വേണ്ടിവരും. എരണ്ടകളുടെ ഇണചേരൽ സ്വഭാവവും ശിശു സംരക്ഷണവും വൈചിത്യ്രമുള്ള പ്രതിഭാസങ്ങളാണ്‌. മുട്ടവിരിഞ്ഞു കുഞ്ഞുങ്ങള്‍ പുറത്തുവരാന്‍ സമയമാകുന്നതോടുകൂടി പെണ്‍പക്ഷി ഒരു പ്രത്യേകതരം ശബ്‌ദം (കൂക്കിങ്‌) പുറപ്പെടുവിക്കുന്നു. കൂടുവിട്ടു പുറത്തുവരാന്‍ കുഞ്ഞുങ്ങളെ പ്രരിപ്പിക്കുകയും ഉത്തേജിപ്പിക്കുകയും ചെയ്യുകയെന്നുള്ളതാണ്‌ ഈ ശബ്‌ദത്തിന്റെ ലക്ഷ്യം.
ഉത്തരാർധഗോളത്തിലെമ്പാടും എരണ്ടകളെ സുലഭമായി കാണാം. ചതുപ്പുപ്രദേശങ്ങളിലും നദികളിലും കായലുകളിലും ശുദ്ധജലതാടകങ്ങളിലുമൊക്കെ അവയെ കാണാം. യൂറോപ്യന്‍ എരണ്ടകള്‍ ബ്രിട്ടന്‍ മുതൽ ജപ്പാന്‍വരെ വ്യാപിച്ചിരിക്കുന്നു. വടക്കേ അമേരിക്കയിൽ മൂന്ന്‌ സ്‌പീഷീസ്‌ എരണ്ടകളുണ്ട്‌; പച്ചനിറമുള്ള തൂവലുള്ള ചിറകുകളോടുകൂടിയ അനാസ്‌ സി. കരോളിനെന്‍ സിസ, നീല നിറമുള്ള ചിറകുകളോടുകൂടിയ അനാസ്‌ഡി കോർസ്‌, കൂടാതെ അനാസ്‌ പ്‌ളാറ്റിറിങ്കോസ്‌. അവസാനത്തേത്‌ വടക്കേ അമേരിക്കയിലും യൂറോപ്പിലും ഏഷ്യയിലും കണ്ടുവരുന്നു. ഉത്തരപസിഫിക്കിലുള്ള അലൂഷ്യാ ഉള്‍നാടുകളിൽ അനാസി നിമിയാ എന്നറിയപ്പെടുന്ന മറ്റൊരു സ്‌പീഷീസുണ്ട്‌. ഉത്തര പൂർവേഷ്യയിൽ അനാസ്‌ പെർമോസാ, അനാസ്‌ ഫൽക്കേറ്റാ എന്നിങ്ങനെ രണ്ട്‌ സ്‌പീഷീസ്‌ എരണ്ടകളുമുണ്ട്‌. വസന്തകാലത്ത്‌ അമേരിക്കന്‍ എരണ്ടകള്‍ കരീബിയന്‍ പ്രദേശത്തേക്ക്‌ കൂട്ടമായി ദേശാടനം നടത്തുന്നു. ഇന്ത്യന്‍ എരണ്ടകളുടെ ജീവശാസ്‌ത്രത്തെക്കുറിച്ചോ ദേശാടനത്തെക്കുറിച്ചോ കാര്യമായി അറിവൊന്നുമില്ല.
(എം. സ്റ്റീഫന്‍)
