This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ചക്രി രാജവംശം
സര്‍വ്വവിജ്ഞാനകോശം സംരംഭത്തില്‍ നിന്ന്
(പുതിയ താള്‍: ==ചക്രി രാജവംശം== 1782 മുതല്‍ തായ്ലന്‍ഡ് ഭരിക്കുന്ന രാജവംശം. ബാങ്...) |
(പുതിയ താള്‍: ==ചക്രി രാജവംശം== 1782 മുതല്‍ തായ്ലന്‍ഡ് ഭരിക്കുന്ന രാജവംശം. ബാങ്...) |
Current revision as of 09:12, 11 ജനുവരി 2016
ചക്രി രാജവംശം
1782 മുതല്‍ തായ്ലന്‍ഡ് ഭരിക്കുന്ന രാജവംശം. ബാങ്കോക്ക് ആസ്ഥാനമാക്കി ഭരണം നടത്തിയിരുന്നതിനാല്‍ ബാങ്കോക്ക് രാജവംശം എന്നും പേരുണ്ട്. ഈ വംശത്തിലെ രാജാക്കന്മാര്‍ രാമന്‍ എന്ന പേരില്‍ അറിയപ്പെടുന്നു. ചാവോ ഫ്യാ ചക്രി എന്ന രാമന്‍ I (1737-1809) ആണ് ഈ രാജവംശം സ്ഥാപിച്ചത്. ഇദ്ദേഹം 1782 മുതല്‍ 1809 വരെ രാജ്യം ഭരിച്ചു. അന്നു തുടങ്ങി ഈ വംശത്തിലെ രാജാക്കന്മാര്‍ ആണ് തുടര്‍ച്ചയായി തായ്ലന്‍ഡു ഭരിക്കുന്നത്. രാമന്‍ I-നു ശേഷം പുത്രനായ രാമന്‍ II (1768-1824) 1809 മുതല്‍ 1824 വരെ ഭരണം നടത്തി. രാമന്‍ II-ന്റെ മരണശേഷം പുത്രനായ രാമന്‍ III (1788-1851) 1824-ല്‍ അധികാരം ഏറ്റെടുത്തു. ഇദ്ദേഹം ബ്രിട്ടനുമായും യു.എസ്സുമായും വ്യാപാര ഉടമ്പടി ഉണ്ടാക്കി. 1851 വരെയായിരുന്നു ഇദ്ദേഹത്തിന്റെ ഭരണകാലം. തുടര്‍ന്ന് മോങ്കുത് (Mongkut) എന്ന രാമന്‍ IV (1804-68) ഭരിച്ചു. ഇദ്ദേഹം ബ്രിട്ടനുമായും മറ്റു പാശ്ചാത്യ രാജ്യങ്ങളുമായും ബന്ധം സ്ഥാപിച്ചു. 1868 വരെയായിരുന്നു ഇദ്ദേഹത്തിന്റെ ഭരണകാലം. അതിനുശേഷം ചുലാലോങ്കോണ്‍ (Chulalongkon) എന്ന രാമന്‍ V (1853-1910) രാജാവായി. 1868 മുതല്‍ 1910 വരെ രാജ്യം ഭരിച്ച ഇദ്ദേഹമാണ് ആധുനിക തായ്ലന്‍ഡിന്റെ സ്രഷ്ടാവായി അറിയപ്പെടുന്നത്. ഇദ്ദേഹത്തിന്റെ പുത്രന്‍ മഹാ വജ്രവുത് എന്ന രാമന്‍ VI (1881-1925) ആയിരുന്നു അടുത്ത രാജാവ്. 1910 മുതല്‍ 25 വരെ ഇദ്ദേഹം അധികാരത്തിലിരുന്നു. ഇദ്ദേഹത്തിന്റെ സഹോദരനായ പ്രജാധിപകന്‍ (1893-1941) എന്ന രാമന്‍ VII 1925-ല്‍ രാജാവായി. ഇദ്ദേഹത്തിന്റെ കാലത്ത് 1932-ല്‍ നടന്ന വിപ്ളവത്തെത്തുടര്‍ന്ന് തായ്ലന്‍ഡില്‍ ഭരണഘടനാപരമായ പരിമിത രാജവാഴ്ച മാത്രമായി. 1935 വരെ ഇദ്ദേഹം ഭരണത്തിലിരുന്നു. ഇദ്ദേഹത്തിന്റെ പുത്രനായ ആനന്ദ മഹീദല്‍ (1925-46) എന്ന രാമന്‍ VIII ആയിരുന്നു അടുത്ത രാജാവ്. 1946-ല്‍ വധിക്കപ്പെടുന്നതുവരെ ഇദ്ദേഹം അധികാരത്തിലായിരുന്നു. 1946 മുതല്‍ ഭൂമിബല്‍ അതുല്യതേജ് (1927-) എന്ന രാമന്‍ IX ആണ് തായ്ലന്‍ഡിലെ രാജാവ്.
