സര്‍വ്വവിജ്ഞാനകോശം സംരംഭത്തില്‍ നിന്ന്

ദില്‍റൂബ

ഒരു തന്ത്രിവാദ്യം. ഹിന്ദുസ്ഥാനി സംഗീതത്തിലാണ് ഇത് ഉപയോഗിക്കുന്നത്. വീണയുടെ ഏകദേശരൂപത്തിലുള്ള ഇതില്‍ 26 തന്ത്രികളുണ്ട്. ഇതില്‍ നാല് തന്ത്രികളാണ് പ്രധാനമായും വാദനം ചെയ്യുക. 19 കട്ടകളാണ് ദില്‍റൂബയിലുള്ളത്. അവ വീണയിലെന്ന പോലെ ഉറപ്പിച്ചിട്ടുള്ളവയല്ല. ഏതാണ്ട് മൂന്ന് അടി ദൈര്‍ഘ്യമാണ് ഈ ഉപകരണത്തിനുള്ളത്. തംബുരു വായിക്കുന്നപോലെ ലംബമായി നിര്‍ത്തിയശേഷമാണ് ദില്‍റൂബ വായിക്കുക. തന്ത്രികള്‍ മീട്ടുന്നതിന് വയലിനില്‍ എന്നപോലെ 'ബോ' ഉപയോഗിക്കുന്നു. മന്ദ്രമധുരമായ നാദം പുറപ്പെടുവിക്കുന്ന ഈ ഉപകരണം ഹിന്ദുസ്ഥാനി കച്ചേരികളില്‍ ഉപയോഗിച്ചുവരുന്നു.