This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കൊട്ടുംപുറം
സര്‍വ്വവിജ്ഞാനകോശം സംരംഭത്തില്‍ നിന്ന്
കൊട്ടുംപുറം
കലാകാരന്മാര്‍ക്കും നിര്‍മാണവിദഗ്ധര്‍ക്കും ആചാരം നല്‍കുവാന്‍ തളിപ്പറമ്പ് (പെരുംചെല്ലൂര്) ശിവക്ഷേത്രത്തിലുള്ള പ്രത്യേക മണ്ഡപപ്പുര. രാജാക്കന്മാരും നാടുവാഴികളും കലാകാരന്മാര്‍ക്കും മറ്റും പട്ടും വളയും ചുരികയും നല്‍കുന്ന പതിവുണ്ടായിരുന്നു. അതിനെ 'ആചാരപ്പെടല്‍' എന്നാണു പറയുന്നത്. ആചാരപ്പെട്ടവരെ വിളിക്കുവാന്‍ ആചാരപ്പേരുകളുണ്ട്. തെയ്യം-തിറകള്‍ കെട്ടുന്ന കലാകാരന്മാര്‍ക്ക് പണിക്കര്‍, പെരുമലയന്‍, പടത്രോന്‍, പെരുവണ്ണാന്‍, തേണിക്കം, കരുണമൂര്‍ത്തി, കുറ്റുരന്‍, പുല്ലുരന്‍, അള്ളോടന്‍, ചിങ്കം എന്നിങ്ങനെയാണ് സ്ഥാനപ്പേരുകള്‍ നല്‍കിയിരുന്നത്. മറ്റു കലാകാരന്മാര്‍ക്കും നിര്‍മാണവിദഗ്ധര്‍ക്കും 'പണിക്കര്‍' എന്ന ആചാരപ്പേരു നല്‍കാറുണ്ട്.
ഒരു നാടുവാഴിയില്‍ നിന്നും പട്ടും വളയും വാങ്ങി 'ആചാരപ്പെട്ടാല്‍' ആ നാടുവാഴിയുടെ രാജ്യാതിര്‍ത്തിക്കുള്ളിലേ ആ ആചാരത്തിനു വിലയുള്ളൂ. അതിനാല്‍ സര്‍വത്ര ബഹുമാന്യരായിത്തീരുവാന്‍ 'കൊട്ടുംപുറ'ത്തു വച്ച് ആചാരം നല്‍കിവരുന്ന സമ്പ്രദായം ഉണ്ടായി. മേല്‍ശാന്തിയാണു 'കൊട്ടും പുറ'ത്തു നിന്ന് ആചാരം നല്‍കേണ്ടത്. ഇന്നും അത്യുത്തര കേരളത്തില്‍ ഈ ആചാരം നിലവിലുണ്ട്.
(ഡോ.എം.വി. വിഷ്ണുനമ്പൂതിരി)
