This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കൃഷ്ണമൂര്‍ത്തി, പുതുക്കോട് (1923 - 85)
സര്‍വ്വവിജ്ഞാനകോശം സംരംഭത്തില്‍ നിന്ന്
കൃഷ്ണമൂര്‍ത്തി, പുതുക്കോട് (1923 - 85)
കര്‍ണാടക സംഗീതവിദ്വാന്‍. കൃഷ്ണ ശാസ്ത്രികളുടെയും പാര്‍വതി അമ്മാളുടെയും മകനായി 1923 ഫെ. 28-ന് പാലക്കാട്ടു ജില്ലയിലെ പുതുക്കോടിയില്‍ ജനിച്ചു. മാതാവില്‍ നിന്നും സംഗീതത്തില്‍ പ്രാഥമിക ശിക്ഷണം നേടിയശേഷം ശേഷ ഭാഗവതര്‍, കൃഷ്ണ ഭാഗവതര്‍ എന്നിവരില്‍ നിന്ന് സംഗീതം അഭ്യസിച്ചു. പാലക്കാട്ട് രാമ ഭാഗവതരുടെ കീഴില്‍ എട്ടു വര്‍ഷത്തോളം സംഗീതത്തില്‍ ഉപരിപഠനം നടത്തി. ഡല്‍ഹിയിലെ ഗന്ധര്‍വ മഹാവിദ്യാലയത്തില്‍ നിന്നും ഹിന്ദുസ്ഥാനി സംഗീതത്തിന്റെ അടിസ്ഥാന പാഠങ്ങളും ഗ്രഹിച്ചു. സമ്പ്രദായ ശുദ്ധമായി സംഗീതം കൈകാര്യം ചെയ്യുന്നതില്‍ പ്രത്യേക നിഷ്കര്‍ഷ പുലര്‍ത്തിയിരുന്ന ഇദ്ദേഹം ആകാശവാണിയുടെ ദേശീയ സംഗീത പരിപാടി,സംഗീത സമ്മേളനം, തിരുവനന്തപുരം നവരാത്രി സംഗീത സദസ്സ് തുടങ്ങിയ സദസ്സുകളില്‍ പാടിയിട്ടുണ്ട്. 1974-ല്‍ കേരള സംഗീത നാടക അക്കാദമിയുടെ അവാര്‍ഡ് ലഭിച്ചു. 1982-ല്‍ മദ്രാസ് മ്യൂസിക് അക്കാദമിയുടെ അന്‍പത്തിയാറാം സമ്മേളനത്തിന്റെ 'അവാര്‍ഡ് ഒഫ് മെരിറ്റി'ന് അര്‍ഹനായി. കുറേക്കാലം തിരുവനന്തപുരം സ്വാതിതിരുനാള്‍ സംഗീത കോളജില്‍ പ്രൊഫസറായും പാലക്കാട്ട് ചെമ്പൈ സ്മാരക സംഗീതകോളജിന്റെ പ്രിന്‍സിപ്പലായും സേവനമനുഷ്ഠിച്ചിട്ടുണ്ട്. വിരമിച്ചതിനു ശേഷം അഡയാറിലുള്ള 'കലാക്ഷേത്ര' ത്തിലെ സംഗീത വിഭാഗത്തില്‍ പ്രൊഫസറായി സേവനമനുഷ്ഠിക്കവേ 1985 ആഗ. 23-ന് തിരുവനന്തപുരത്ത് വച്ച് അന്തരിച്ചു.
(പി. രവികുമാര്‍; സ.പ.)
