This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കാളിദാസ്‌ നാഗ്‌, ഡോ. (1892 - 1966)
സര്‍വ്വവിജ്ഞാനകോശം സംരംഭത്തില്‍ നിന്ന്
കാളിദാസ്‌ നാഗ്‌, ഡോ. (1892 - 1966)
ബംഗാളി പണ്ഡിതനും ഗ്രന്ഥകാരനും. 1892 ജനു. 15-നു കൽക്കത്തയിൽ ജനിച്ചു. വിശ്വമഹാകവി രബീന്ദ്രനാഥ ടാഗൂറിന്റെ കീഴിൽ ശാന്തിനികേതനിലും പിന്നീട്‌ പാരിസ്‌ സർവകലാശാലയിലും ആണ്‌ വിദ്യാഭ്യാസം നിർവഹിച്ചത്‌. കൽക്കത്തയിലെ സ്‌കോട്ടിഷ്‌ ചർച്ച്‌ കോളജിൽ അധ്യാപകനായി ഔദ്യോഗിക ജീവിതം ആരംഭിച്ച നാഗ്‌ പിന്നീട്‌ സിലോണിലെ മഹീന്ദ്രാ കോളജ്‌ (1919-20), കൽക്കത്ത സർവകലാശാല എന്നിവിടങ്ങളിൽ അധ്യാപകനായി സേവനമനുഷ്‌ഠിച്ചു.
1920 മുതൽ 23 വരെ പാരിസിൽ ഗവേഷണപഠനം നടത്തി ഇദ്ദേഹം ഡി.ലിറ്റ്‌. ബിരുദം സമ്പാദിച്ചു. ഇക്കാലത്ത്‌ പ്രസിദ്ധ ഫ്രഞ്ച്‌ സാഹിത്യകാരനായ റൊമെയ്‌ന്‍ റൊളാങുമായി സുഹൃദ്‌ബന്ധം സ്ഥാപിച്ചു. ഭാരതത്തെപ്പറ്റിയും ഭാരതീയരായ മഹാത്മാക്കളെ സംബന്ധിച്ചും പ്രബന്ധം രചിക്കുവാന്‍ റൊളാങ്ങിനെ മുഖ്യമായും സഹായിച്ചത്‌ ഇദ്ദേഹം ആയിരുന്നു.
കൽക്കത്തയിൽ പ്രാഫസറായിരിക്കുമ്പോള്‍ത്തന്നെ ഹാവായ്‌ സർവകലാശാല വിസിറ്റിങ്‌ പ്രാഫസറായും സേവനം അനുഷ്‌ഠിക്കുകയുണ്ടായി. കുറച്ചുകാലം ഏഷ്യാറ്റിക്‌ സൊസൈറ്റിയുടെ അധ്യക്ഷനായും പ്രവർത്തിച്ചു. രാജ്യസഭാംഗമായിരുന്നപ്പോള്‍ ഇദ്ദേഹം ഇംഗ്ലണ്ട്‌, യു.എസ്‌., സോവിയറ്റ്‌ യൂണിയന്‍ എന്നീ രാജ്യങ്ങള്‍ സന്ദർശിച്ചു. ഇദ്ദേഹം ബംഗാളിയിലും ഇംഗ്ലീഷിലും ഫ്രഞ്ചിലും നിരവധി ഗ്രന്ഥങ്ങള്‍ രചിച്ചിട്ടുണ്ട്‌. സ്വദേശ്‌ ഒ സഭ്യത (1940), ആർട്ട്‌ ആന്‍ഡ്‌ ആർക്കിയോളജി എബ്രാഡ്‌ (1936), ഇന്ത്യ ആന്‍ഡ്‌ ദ്‌ പസിഫിക്‌ വേള്‍ഡ്‌ (1941), ടാഗോർ ഇന്‍ ചൈനാ ആന്‍ഡ്‌ സിലോണ്‍ (1944), ടോള്‍സ്റ്റോയ്‌ ആന്‍ഡ്‌ ഗാന്ധി (1950). ഡിസ്‌കവറി ഒഫ്‌ ഏഷ്യ (1958) എന്നിവ ഇവയിൽ പ്രധാനങ്ങളാണ്‌.
മഹാകവി ടാഗൂറിന്റെ ഏതാനും കൃതികള്‍ കാളിദാസ്‌ നാഗ്‌ ഫ്രഞ്ചുഭാഷയിലേക്ക്‌ വിവർത്തനം ചെയ്‌തിട്ടുണ്ട്‌ (ഉദാ.Cygne--1924). അർഥശാസ്‌ത്രത്തിൽ പരാമർശിച്ചിട്ടുള്ള നയതന്ത്രസിദ്ധാന്തങ്ങളെ ആധാരമാക്കി ഒരു ഗ്രന്ഥം ഫ്രഞ്ച്‌ ഭാഷയിലും ഇദ്ദേഹം രചിച്ചിട്ടുണ്ട്‌ (Les Theories Diplomatiqes de I' Inde et L'Arthasathra-1923). 1966 ന. 8-നു കൽക്കത്തയിൽ ഇദ്ദേഹം നിര്യാതനായി.
