This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കല്‌പന
സര്‍വ്വവിജ്ഞാനകോശം സംരംഭത്തില്‍ നിന്ന്
കല്‌പന
ഒരു ഹിന്ദി ചലച്ചിത്രം. വിശ്വവിഖ്യാതനായ ഭാരതീയ നര്‍ത്തകന്‍ ഉദയശങ്കര്‍ സംവിധാനം നടത്തിയും കെ. രാംനാഥ്‌ ഛായാഗ്രഹണം ചെയ്‌തും തയ്യാറാക്കിയ ഈ ചിത്രത്തിന്റെ നിര്‍മാണം 1948ല്‍ മദ്രാസിലെ ജെമിനി സ്റ്റുഡിയോവില്‍ വച്ചാണ്‌ നടന്നത്‌. സുമിത്രാനന്ദന്‍ പന്ത്‌ ഗാനരചയിതാവും, വിഷ്‌ണുദാസ്‌ ഷിറാലി സംഗീതസംവിധായകനും ഉദയശങ്കറും അദ്ദേഹത്തിന്റെ പത്‌നി അമലാശങ്കറും പ്രധാന അഭിനേതാക്കളും ആയിരുന്നു.
മുതലാളിവര്‍ഗത്തിന്റെ ചൂഷണങ്ങള്‍ക്കു വിധേയരാകുന്ന തൊഴിലാളിവര്‍ഗത്തെയും യന്ത്രശക്തിക്കടിമപ്പെടുന്ന മനുഷ്യജീവിതത്തെയും ആധാരമാക്കിക്കൊണ്ടുള്ള ഈ ചലച്ചിത്രത്തില്‍ ഭാരതീയ നൃത്തരൂപങ്ങള്‍ക്ക്‌ പ്രാമുഖ്യം നല്‌കിയിട്ടുണ്ട്‌. ഉദയശങ്കര്‍ ഈ ചലച്ചിത്രത്തില്‍ ഭാവോജ്വലങ്ങളായ ചില നൃത്തനാടകങ്ങളും അവതരിപ്പിക്കുകയുണ്ടായി. സാധാരണജനങ്ങള്‍ക്ക്‌ ഗ്രഹിക്കത്തക്ക രീതിയിലുള്ള കഥാപാത്രാവിഷ്‌കരണവും, തുടര്‍ച്ചയായുള്ള കഥാഗതിയും ഇല്ലാതിരുന്ന ഈ ചിത്രം സാമ്പത്തികമായി പരാജയപ്പെടുകയാണുണ്ടായത്‌.
സാംസ്‌കാരിക രംഗത്തും ലോകസിനിമാരംഗത്തും ജനശ്രദ്ധയാകര്‍ഷിച്ച കല്‌പന യൂറോപ്പില്‍ ബ്രസല്‍സ്‌ നഗരത്തില്‍ സംഘടിപ്പിക്കപ്പെട്ട "വേള്‍ഡ്‌ ഫെസ്റ്റിവല്‍ ഒഫ്‌ ഫിലിംസ്‌ ആന്‍ഡ്‌ ഫൈന്‍ ആര്‍ട്ട്‌സി'ല്‍ പ്രദര്‍ശിപ്പിക്കപ്പെടുകയും സമ്മാനാര്‍ഹമാവുകയും ചെയ്‌തു. തികച്ചും ഭാരതീയ നൃത്തരൂപങ്ങളെ അവലംബമാക്കി നിര്‍മിക്കപ്പെട്ട ഈ ചലച്ചിത്രം ഉദയശങ്കറിന്റെ സ്വതന്ത്രചിന്താഗതി, ഭാവനാവൈഭവം, നൃത്തകലാവൈദഗ്‌ധ്യം എന്നിവ തെളിയിക്കുന്ന ഒരു ഉന്നത കലാസൃഷ്ടിയാണ്‌. നോ: ഉദയശങ്കര്‍
(പി.ആര്‍.എസ്‌. പിള്ള)
