This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
എക്കർമന്‍, യോഹന്‍ പീറ്റർ (1792-1854)
സര്‍വ്വവിജ്ഞാനകോശം സംരംഭത്തില്‍ നിന്ന്
എക്കർമന്‍, യോഹന്‍ പീറ്റർ (1792-1854)
Eckermann, Johann Peter
ജർമന്‍ സാഹിത്യകാരനും നിരൂപകനും. 1792 സെപ്‌. 21-ന്‌ ഹാനോവറിൽ ജനിച്ചു. ഗെയ്‌ഥെയുടെ സുഹൃത്തും സെക്രട്ടറിയും സഹായിയുമെന്ന നിലയിൽ അറിയപ്പെട്ടു. ചെറുപ്പത്തിൽ നെപോളിയോണിക്‌ സമരങ്ങളിൽ സജീവമായി പങ്കെടുക്കുകയും ഹാനോവറിൽ സേനാവിഭാഗത്തിൽ ക്ലാർക്കായി സേവനമനുഷ്‌ഠിക്കുകയും ചെയ്‌തു. അതേസമയം പഠനവും തുടർന്നുപോന്നു. 1821-ൽ ആദ്യത്തെ ഗ്രന്ഥം (കവിതാസമാഹാരം) പ്രസിദ്ധപ്പെടുത്തി. ഗെയ്‌ഥെയുടെ കവിതകളെക്കുറിച്ചുള്ള ബീയിട്രാഗെ സ്യുർ പോയസിയെ മിറ്റ്‌ ബിസൊണ്ടറർ ഹിന്‍വെയ്‌സുങ്‌ ഔഫ്‌ ഗെയ്‌ഥെ എന്ന പഠനഗ്രന്ഥം തയ്യാറാക്കി ഗെയ്‌ഥെക്ക്‌ അയച്ചുകൊടുത്തതോടെ ഇവർ തമ്മിലുള്ള സൗഹൃദം ആരംഭിച്ചു. ഈ ഗ്രന്ഥം 1823-ൽ പ്രസിദ്ധപ്പെടുത്തി. ഗെയ്‌ഥെയുടെ ക്ഷണമനുസരിച്ച്‌ വെയ്‌മറിൽ (Weimer) എത്തിയ എക്കർമന്‍ ഗെയ്‌ഥെയുടെ സെക്രട്ടറിയായി പ്രവർത്തിച്ചുവന്നു. യേന യൂണിവേഴ്‌സിറ്റിയിൽ ഇംഗ്ലീഷ്‌-ജർമന്‍ സാഹിത്യങ്ങളുടെ പ്രാഫസറായി കുറച്ചുനാള്‍ ജോലിനോക്കി. പിന്നീട്‌ വെയ്‌മറിൽ 1836-ൽ ലൈബ്രറിയനായി ജോലി സ്വീകരിച്ചു. ഗെയ്‌ഥെയുടെ ഔസ്‌ഗാബെ ലെറ്റ്‌ സ്റ്റെർ ഹാന്‍ഡ്‌ എന്ന കൃതിയുടെ പ്രസിദ്ധീകരണത്തിന്‌ എക്കർമന്‍ ആണ്‌ മുന്‍കൈയെടുത്തത്‌. ഗെയ്‌ഥെയുമായുള്ള ബന്ധത്തെ അടിസ്ഥാനമാക്കി ഗസ്‌പ്രാഹെ മിറ്റ്‌ ഗെയ്‌ഥെ ഇന്‍ഡെന്‍ ലെറ്റ്‌സ്‌ റ്റന്‍ യാറന്‍ സെയ്‌നസ്‌ ലെബെന്‍സ്‌ എന്ന കൃതി മൂന്നു വാല്യങ്ങളിലായി പ്രസിദ്ധീകരിച്ചു. ആദ്യത്തെ രണ്ടു വാല്യങ്ങള്‍ 1837-ലും മൂന്നാമത്തെ വാല്യം 1848-ലുമാണ്‌ പ്രസിദ്ധീകൃതമായത്‌. ഇംഗ്ലീഷിൽ കോണ്‍വർസേഷന്‍ വിത്ത്‌ ഗെയ്‌ഥെ (Conversation With Goethe) എന്ന ശീർഷകത്തിൽ എസ്‌.എം. ഫുള്ളർ (1839), ജെ. ഓക്‌സന്‍ഫോർഡ്‌(1850), ആർ.ഒ. മൂന്‍ (1951) എന്നിവർ ഇത്‌ പരിഭാഷപ്പെടുത്തിയിട്ടുണ്ട്‌. എഫ്‌. ഡബ്ല്യൂ. റീമറിന്റെ സഹകരണത്തോടെ ഗെയ്‌ഥെയുടെ സമ്പൂർണ കൃതികള്‍ പ്രസിദ്ധീകരിച്ചു. എക്കർമന്‍ 1854-ൽ വെയ്‌മറിൽ (Weimar) അന്തരിച്ചു.
