This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
എം.ആർ.ഐ. സ്‌കാനിങ്‌
സര്‍വ്വവിജ്ഞാനകോശം സംരംഭത്തില്‍ നിന്ന്
എം.ആർ.ഐ. സ്‌കാനിങ്‌
MRI Scanning
കാന്തികശക്തിയുപയോഗിച്ച്‌, അണുവികിരണമില്ലാതെ നടത്തുന്ന സ്‌കാനിങ്ങാണ്‌ എം.ആർ.ഐ. സ്‌കാനിങ്‌. മാഗ്നറ്റിക്‌ റെസോണന്‍സ്‌ ഇമേജിങ്‌ എന്നാണ്‌ എം.ആർ.ഐ.യുടെ പൂർണരൂപം. 1981-ലാണ്‌ എം.ആർ.ഐ. സ്‌കാന്‍ വികസിപ്പിച്ചെടുത്തത്‌. ആന്തരികാവയവങ്ങളുടെ സുവ്യക്തചിത്രം ലഭിക്കുന്നതിനുള്ള ഏറ്റവും നല്ല സാങ്കേതികവിദ്യയാണ്‌ എം.ആർ.ഐ.
ചെലവേറിയതും കൂടുതൽ സമയം ആവശ്യമുള്ള പരിശോധനയാണിതെങ്കിലും പ്രതിബിംബങ്ങള്‍ കൂടുതൽ വ്യക്തതയോടെ ലഭിക്കുന്നതിനാൽ, സാധാരണ കലകളിൽനിന്നും ട്യൂമർകലകളെ തിരിച്ചറിയാന്‍ സാധിക്കും. ശരീരത്തിന്റെ വിവിധ തലങ്ങളിൽനിന്നും കോണുകളിൽനിന്നുമുള്ള ചിത്രങ്ങള്‍ എടുക്കാന്‍ കഴിയുന്നതിനാൽ ഏതവയവത്തിന്റെ രോഗവും നിർണയിക്കാന്‍ ഇതുപയോഗിക്കാം. റേഡിയേഷന്‍ ഇല്ലാത്ത പരിശോധനയായതിനാൽ ഏറ്റവും സുരക്ഷിതമായ രോഗനിർണയോപാധിയാണ്‌. എം.ആർ.ഐ. മസ്‌തിഷ്‌കത്തിന്റെ പരിശോധന നടത്താന്‍ എം.ആർ.ഐ. ആണ്‌ ഏറ്റവുമനുയോജ്യം. എല്ലാവസ്‌തുക്കളിലും എന്നതുപോലെ മനുഷ്യശരീരത്തിലും ആറ്റങ്ങളുണ്ട്‌ എന്നതും അത്‌ ഒരു കാന്തികവലയത്തിന്റെ സ്വാധീനത്തിൽ എങ്ങനെ പ്രതികരിക്കുന്നുവെന്നതുമാണ്‌ എം.ആർ.ഐ. സ്‌കാനിങ്ങിന്റെ പ്രവർത്തനതത്ത്വത്തിൽ ഉള്ളത്‌. പരിശോധനാവിധേയമാക്കേണ്ട ശരീരഭാഗം ശക്തിയേറിയ കാന്തികവലയത്തിനുള്ളിലാക്കുമ്പോള്‍ അതിലെ ആറ്റങ്ങള്‍ സമാന്തരമായി അണിനിരക്കുന്നു. അതിലേക്ക്‌ ഒരു റേഡിയോ തരംഗം കടത്തിവിട്ട്‌ അണിചേർന്നുള്ള ആറ്റങ്ങളെ ഈ ക്രമീകൃതസംവിധാനത്തിൽ നിന്നു പുറത്തുചാടിക്കാന്‍ ശ്രമിക്കുന്നു. തിരികെ അവ വീണ്ടും അണിചേരുമ്പോള്‍ വളരെ ലഘുവായ സിഗ്നൽ പുറപ്പെടുവിക്കും. ഇത്‌ മറ്റൊരു കാന്തികസ്രാതസ്സ്‌ ആഗിരണം ചെയ്യും. പുറത്തുവന്ന ഈ സിഗ്നലുകള്‍ ഒരു കംപ്യൂട്ടർ ഉപയോഗിച്ച്‌ അപഗ്രഥിക്കുമ്പോള്‍ സാധാരണ കോശങ്ങളും രോഗബാധിതകോശങ്ങളും തമ്മിലുള്ള വ്യത്യാസം മനസ്സിലാക്കാനും അങ്ങനെ രോഗനിർണയം നടത്താനും സാധിക്കും. കൂടുതൽ വ്യക്തതയും കൃത്യതയുമുള്ള ചിത്രങ്ങള്‍ ലഭിക്കുന്നതിനായി സ്‌കാനിങ്ങിനുമുമ്പ്‌ "കോണ്‍ട്രാസ്റ്റ്‌' വിഭാഗത്തിൽപ്പെട്ട വസ്‌തുക്കള്‍ കുത്തിവയ്‌ക്കാറുണ്ട്‌. ട്യൂമർ, രക്തക്കുഴലുകള്‍ എന്നിവ ശരിയായി അപഗ്രഥിക്കാന്‍ ഈ കോണ്‍ട്രാസ്റ്റ്‌ മാധ്യമം സഹായിക്കുന്നു. മസ്‌തിഷ്‌കം, നട്ടെല്ല്‌, സന്ധികള്‍, സ്‌തനങ്ങള്‍, ആന്തരികാവയവങ്ങള്‍ എന്നിവയിലുള്ള തകരാറുകളും ക്ഷതങ്ങളും ട്യൂമറുകളുമൊക്കെ അതീവകൃത്യതയോടെ പാർശ്വഫലങ്ങള്‍ ഇല്ലാതെ കണ്ടുപിടിക്കാന്‍ കഴിയുന്ന ഈ പരിശോധനയ്‌ക്ക്‌ ഏകദേശം ഒരു മണിക്കൂർ വേണ്ടിവരും.
എം.ആർ.ഐ. സ്‌കാന്‍ ഉപയോഗപ്പെടുത്തിക്കൊണ്ടുള്ള മറ്റൊരു നൂതനസങ്കേതമാണ്‌ മാഗ്നറ്റിക്‌ റെസൊണന്‍സ്‌ ആന്‍ജിയോഗ്രാഫി (MRA). ശരീരത്തിലെ പേശികളിൽനിന്നുള്ള സിഗ്നലുകളും ഒഴുകിക്കൊണ്ടിരിക്കുന്ന രക്തത്തിൽനിന്നുള്ള സിഗ്നലുകളും താരതമ്യംചെയ്‌ത്‌ രോഗനിർണയം നടത്തുന്ന സംവിധാനമാണിത്‌. കോണ്‍ട്രാസ്റ്റ്‌ മാധ്യമം ഇല്ലാതെതന്നെ ഈ പരിശോധന നടത്താമെന്നതാണ്‌ മെച്ചം. എക്‌സ്‌റേ ഉപയോഗിച്ചുള്ള ആന്‍ജിയോഗ്രാഫിയെക്കാള്‍ സുരക്ഷിതവും സുവ്യക്തവുമാണ്‌ ഈ മാഗ്നറ്റിക്‌ റെസോണന്‍സ്‌ ആന്‍ജിയോഗ്രാഫി.
സ്‌കാനിങ്ങിനുമുമ്പ്‌ ശരീരത്തിലുള്ള ലോഹവസ്‌തുക്കള്‍ മാറ്റേണ്ടതാണ്‌. ലോഹനിർമിതമായ ഇംപ്ലാന്റുകള്‍ ശരീരത്തിൽ നിക്ഷേപിച്ചിട്ടുണ്ടെങ്കിൽ സ്‌കാനിങ്ങിനുമുന്‍പ്‌ അക്കാര്യം വെളിപ്പെടുത്തേണ്ടതാണ്‌. കാന്തികവലയത്തിന്റെ ശക്തിമൂലം, ശരീരത്തിൽ സ്ഥാപിച്ചിട്ടുള്ള ഇംപ്ലാന്റിന്‌ സ്ഥാനഭ്രംശം വരാന്‍ സാധ്യതയുള്ളതുകൊണ്ടാണ്‌ ഈ മുന്‍കരുതൽ ആവശ്യമുള്ളത്‌.
(സുരേന്ദ്രന്‍ ചുനക്കര)
