This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
എംഗിള്‍, റോബർട്ട്‌. എഫ്‌ (1924- )
സര്‍വ്വവിജ്ഞാനകോശം സംരംഭത്തില്‍ നിന്ന്
എംഗിള്‍, റോബർട്ട്‌. എഫ്‌ (1924- )
Engle, Robert. F.
അമേരിക്കന്‍ ധനതത്ത്വശാസ്‌ത്രജ്ഞന്‍. 2003-ലെ ധനതത്ത്വശാസ്‌ത്രത്തിനുള്ള നോബൽസമ്മാനം നേടിയ വ്യക്തിയാണ്‌ ഇദ്ദേഹം. 1942 ന. 10-ന്‌ ന്യൂയോർക്കിലെ സൈറാകൂസിലാണ്‌ എംഗിളിന്റെ ജനനം. റോബർട്ട്‌ ഫ്ര എംഗിള്‍ പിതാവും, മേരിസ്റ്റാർ മാതാവുമായിരുന്നു. മനഃശാസ്‌ത്രജ്ഞയായ മരിയാന്‍ എഗെർ സഹധർമ്മിണിയുമാണ്‌. ഒരു പുത്രനും ഒരു പുത്രിയുമാണ്‌ ഈ ദമ്പതികള്‍ക്കുള്ളത്‌.
വില്യംസ്‌ കോളജിലായിരുന്നു എംഗിള്‍ വിദ്യാഭ്യാസം നിർവഹിച്ചത്‌. ഊർജതന്ത്രത്തിൽ ബിരുദം നേടിയശേഷം കോർണെൽ സർവകലാശാലയിൽനിന്നും അതേ വിഷയത്തിൽ മാസ്റ്റർ ബിരുദവും ധനതത്ത്വശാസ്‌ത്രത്തിൽ ഡോക്‌ടറേറ്റും സമ്പാദിക്കുകയുണ്ടായി. അർഥശാസ്‌ത്രവസ്‌തുതകളും അവയുടെ പരസ്‌പര ബന്ധങ്ങളും ഗണിതശാസ്‌ത്രപരമായി അപഗ്രഥിക്കുന്ന വിജ്ഞാനശാഖയായ "ഇക്കണോമെട്രിക്‌സ്‌' ആയിരുന്നു ഇദ്ദേഹത്തിനു പ്രിയപ്പെട്ട വിഷയം. 1969 മുതൽ 77 വരെ എംഗിള്‍, മാസച്യുസെറ്റ്‌സ്‌ ഇന്‍സ്റ്റിറ്റ്യൂട്ട്‌ ഒഫ്‌ ടെക്‌നോളജിയിൽ ധനതത്ത്വശാസ്‌ത്ര വിഭാഗത്തിൽ പ്രാഫസറായി സേവനമനുഷ്‌ഠിച്ചിരുന്നു. 1975-ൽ സാന്റിയാഗോയിലെ, യൂണിവേഴ്‌സിറ്റി ഒഫ്‌ കാലിഫോർണിയയിൽ ചേരുകയും 2003-ൽ വിരമിക്കുന്നതുവരെ തത്‌സ്ഥാനത്തു തുടരുകയും ചെയ്‌തു.
കമ്പോള നിലവാരവും പലിശനിരക്കുകളും തമ്മിലുള്ള പ്രവചനാതീതമായ ഗതിവിഗതികളെ പഠനവിധേയമാക്കുന്നതിനുള്ള ഒരു പദ്ധതി ആസൂത്രണം ചെയ്‌തതാണ്‌ സാമ്പത്തിക ശാസ്‌ത്രമേഖലയിൽ പുതിയൊരു പന്ഥാവു തുറന്ന മഹത്‌ സംഭാവനയായി വിലയിരുത്തപ്പെടുന്നത്‌. അസ്ഥിരമായ ഗതിമാറ്റത്തിന്റെ സൂചന നൽകലും കൃത്യമായ സ്വഭാവവിശേഷഗണനയും നിർവഹണപ്രക്രിയയ്‌ക്കു സഹായകമാകുമെന്നതിനാൽ പ്രാധാന്യമർഹിക്കുന്നതാണെന്ന്‌ ഇദ്ദേഹം കണ്ടെത്തുകയായിരുന്നു. ഉദാഹരണമായി, ഒരു വസ്‌തുവിന്റെ വില നിശ്ചയിക്കുന്നതിലും സാമ്പത്തിക വ്യുത്‌പന്നം നിർണയിക്കുന്നതിലും അപകട സാധ്യതകളുടെ വിലയിരുത്തൽ പ്രധാന പങ്കുവഹിക്കുന്നുണ്ട്‌. മുന്‍കാല ഗവേഷകർ ഇടയ്‌ക്കിടെയുള്ള അസ്ഥിരതയിൽ ശ്രദ്ധ പതിപ്പിക്കുകയോ ഉപായങ്ങളിലൂടെ ഏകദേശ സാദൃശ്യം കല്‌പിക്കുകയോ ആയിരുന്നു പതിവ്‌. എന്നാൽ, അസ്ഥിരതയ്‌ക്കു പുതിയൊരു സ്ഥിതിവിവര മാനദണ്ഡ മാതൃക കണ്ടെത്തുകയെന്ന ദൗത്യമാണ്‌ എംഗിള്‍ ഏറ്റെടുത്തത്‌. ഇത്തരത്തിലുള്ള സ്ഥിതിവിവര മാതൃകകള്‍ ആധുനിക മാധ്യസ്ഥ്യ തത്ത്വത്തിന്റെയും പ്രായോഗികതയുടെയും അവശ്യഘടകങ്ങളായി പരിണമിക്കുകയുണ്ടായി. അടുത്തകാലത്ത്‌ സൊസൈറ്റി ഫോർ ഇക്കണോമെട്രിക്‌സ്‌ എന്ന സംഘടനയുടെ സഹനേതൃത്വപദവി എംഗിളിൽ നിക്ഷിപ്‌തമാക്കുകയും തുടർ പ്രവർത്തനങ്ങള്‍ക്ക്‌ ഇദ്ദേഹം താത്‌പര്യം പ്രകടിപ്പിക്കുകയും ചെയ്‌തു. ഇക്കണോമെട്രിക്‌സ്‌ സൊസൈറ്റിഫെലോ (1981), എന്‍.ബി.ഇ. ആർ റിസർച്ച്‌ അസോസ്സിയേറ്റ്‌ (1987), ഇക്കണോമെട്രിക്‌ സൊസൈറ്റി കൗണ്‍സിൽ ഭാരവാഹി (1994), അമേരിക്കന്‍ അക്കാദമി ഒഫ്‌ ആർട്‌സ്‌ ആന്‍ഡ്‌ സയന്‍സിന്റെ ഫെലോ പദവി (1995) തുടങ്ങിയ ഔദ്യോഗിക സ്ഥാനങ്ങളിൽ എംഗിള്‍ സേവനമനുഷ്‌ഠിച്ചിട്ടുണ്ട്‌. ഇപ്പോള്‍, ഇദ്ദേഹം യു.സി.എസ്‌.ഡിയിലെ ഗവേഷണ പ്രാഫസർ എമിററ്റസ്‌ സ്ഥാനം വഹിക്കുന്നു.
