This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഉണ്ണിക്കേരളവർമ
സര്‍വ്വവിജ്ഞാനകോശം സംരംഭത്തില്‍ നിന്ന്
ഉണ്ണിക്കേരളവർമ
1. എ.ഡി. 1535-ൽ (കൊ.വ. 710) ചിറവാമൂപ്പ്‌ ഏറ്റ വേണാട്ടു രാജാവ്‌. പാണ്ടിനാട്ടിൽ കളക്കാട്ടു കോയിക്കൽവച്ച്‌ രാമമാർത്താണ്ഡവർമ അന്തരിച്ചപ്പോള്‍ ഉണ്ണിക്കേരളവർമയ്‌ക്ക്‌ മൂപ്പു കിട്ടി. ചിറവാമൂപ്പ്‌ എന്ന സ്ഥാനം മുന്‍കാലങ്ങളിൽ വേണാട്ടു (തിരുവിതാംകൂർ) രാജാവിനുള്ളതായിരുന്നു. ഇദ്ദേഹം എത്രകാലം ഭരിച്ചു എന്ന്‌ നിശ്ചയമില്ല. ശുചീന്ദ്രം ക്ഷേത്രത്തിലെ ഒരു ശിലാരേഖയിൽ നിന്ന് 1537-ൽ ജയസിംഹനാട്ട്‌ ചെന്റുമണ്‍കൊണ്ട ഭൂതലവീര രവിവർമയായിരുന്നു രാജാവ്‌ എന്നു കാണാം. ഉണ്ണിക്കേരളവർമ അതിനുമുമ്പ്‌ ചരമം പ്രാപിച്ചോ, അതോ 1537-ൽ അദ്ദേഹവും രവിവർമയും കൂട്ടായി ഭരിച്ചിരുന്നോ എന്നു നിർണയിക്കാവതല്ല.
2. കൊ.വ. 9-ാം നൂറ്റാണ്ടിന്റെ പൂർവാർധത്തിൽ വേണാട്‌ ഭരിച്ചിരുന്ന ഒരു രാജാവ്‌. കൊച്ചിയിലെ വെള്ളാരപ്പള്ളിയിൽ നിന്നു വേണാട്ടു രാജകുടുംബത്തിലേക്കു ദത്തെടുക്കപ്പെട്ട ഇദ്ദേഹം രവിവർമ ചിറവാ മൂത്ത തിരുവടിയുമൊത്ത്‌ ഭരണം നടത്തിയതായി കരുതാം. 1630-ൽ ഉണ്ണിക്കേരളവർമ സ്വന്തം മൂലകുടുംബമായ വെള്ളാരപ്പള്ളിയിൽ നിന്ന് ഭാഗിനേയരായ രാമവർമയെയും ആദിത്യവർമയെയും ദത്തെടുത്തു. ഈ ദത്ത്‌ വേണാട്ടു രാജകുടുംബത്തിലെ ചില ശാഖക്കാർക്കു സമ്മതമായില്ല. എ.ഡി. 1632-ൽ രവിവർമയും ഉണ്ണിക്കേരളവർമയും ചേർന്ന്‌ പദ്‌മനാഭസ്വാമിക്ഷേത്രത്തിലേക്ക്‌ ചില പ്രായശ്ചിത്തങ്ങള്‍ ചെയ്‌തതായി രേഖകളുണ്ട്‌. അക്കാലത്തെ പ്രധാനപ്പെട്ട ഒരു സംഭവം മധുരയിൽനിന്ന്‌ തിരുമലനായ്‌ക്കന്‍ നടത്തിയ ആക്രമണമായിരുന്നു. നായ്‌ക്കന്റെ പടത്തലവന്‍ രാമപ്പയ്യർ 1635-ൽ നാഞ്ചിനാട്ടിൽ കടന്ന്‌ കൊള്ള നടത്തി. വേണാട്ടു സൈന്യത്തിന്റെ പടത്തലവന്‍ ഇരവിക്കുട്ടിപ്പിള്ള എന്ന വീരയോദ്ധാവായിരുന്നു. പിള്ളയുടെ നേതൃത്വത്തിൽ നടന്ന കണിയാംകുളം യുദ്ധത്തിൽ സ്വപക്ഷത്തിൽപ്പെട്ട ചിലരുടെ ചതിപ്രയോഗംകൊണ്ട്‌ പിള്ളയ്‌ക്കു ജീവഹാനി സംഭവിച്ചു. ഇരവിക്കുട്ടിപ്പിള്ളപ്പോര്‌ അഥവാ കണിയാംകുളം പോര്‌ എന്ന തെക്കന്‍പാട്ടിൽ ഈ കഥ വർണിക്കുന്നു. നോ. ഇരവിക്കുട്ടിപ്പിള്ള ഉച്ചിക്കേരളവർമ കൊ.വ. 826 വരെ ജീവിച്ചിരുന്നതായി കരുതാം.
3. എ.ഡി. 1688-ൽ (കൊ.വ.863) ഉമയമ്മറാണിയും രവിവർമയും കൂടി കോലത്തുനാട്ടിൽ നിന്ന് വേണാട്ടു രാജവംശത്തിലേക്ക്‌ ദത്തുകൊണ്ട നാലുപേരിൽ ഒരാള്‍. രവിവർമയ്‌ക്കു ശേഷം 1718 മുതൽ 24 വരെ ഉച്ചിക്കേരളവർമയായിരുന്നു വേണാട്ടു മൂത്ത തിരുവടി എന്ന്‌ ചില ചരിത്രകാരന്മാർ പറയുന്നു. ഇദ്ദേഹത്തിന്‌ വേണാട്ടുമൂപ്പു വാഴ്‌ച കിട്ടിയില്ലെന്നും, ദേശിങ്ങനാട്ടു ശാഖയിലെ മൂപ്പുവാഴ്‌ച മാത്രമേ ഉണ്ടായിരുന്നുള്ളൂവെന്നും മറ്റു ചിലർ വാദിക്കുന്നു. 1718 മുതൽ 24 വരെ (കൊ.വ. 893-99 വരെ) ആദിത്യവർമയും 1724 മുതൽ 29 വരെ രാമവർമയും ആയിരുന്നു വേണാട്‌ വാണിരുന്നതെന്ന്‌ രേഖകളിൽ കാണുന്നു. ഉച്ചിക്കേരളവർമ ദേശിങ്ങനാട്ടു മൂത്ത തിരുവടി മാത്രമായിരുന്നുവെങ്കിലും വേണാട്ടു ഭരണത്തിൽ അന്നത്തെ നിലയ്‌ക്ക്‌ അദ്ദേഹത്തിനും ഭാഗഭാഗിത്വമുണ്ടായിരുന്നെന്ന്‌ അനുമാനിക്കാം. 1729-ൽ രാമവർമ മഹാരാജാവ്‌ അന്തരിച്ചപ്പോള്‍ വേണാട്ടുവാഴ്‌ചയ്‌ക്കുവേണ്ടി മാർത്താണ്ഡവർമയോട്‌ യുദ്ധം ചെയ്‌ത ദേശിങ്ങനാട്ടു മൂത്ത തിരുവടി ഇദ്ദേഹമായിരുന്നുവെന്ന്‌ ഊഹിക്കാന്‍ ന്യായമുണ്ട്‌.
(ശൂരനാട്ടു കുഞ്ഞന്‍പിള്ള)
