This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഇമാം
സര്‍വ്വവിജ്ഞാനകോശം സംരംഭത്തില്‍ നിന്ന്
ഇമാം
മാര്‍ഗദര്‍ശകന്‍, നേതാവ്‌ എന്നീ അര്‍ഥമുള്ള അറബിപദം. ഖുര്‍ ആനില്‍ ഇമാം എന്ന പദം പരാമര്‍ശിക്കപ്പെടുന്നുണ്ട്‌. ഇസ്‌ലാമിക ചരിത്രത്തില്‍ മൂന്ന്‌ വ്യത്യസ്‌ത രീതികളിലാണ്‌ ഈ പദം വിവക്ഷിക്കപ്പെടുന്നത്‌. മുസ്‌ലിം പള്ളിയില്‍ നടക്കുന്ന പ്രാര്‍ഥനയ്‌ക്ക്‌ നേതൃത്വം നല്‌കുന്ന വ്യക്തിയെ പൊതുവില്‍ ഇമാം എന്നു ബഹുമാനത്തോടെ അഭിസംബോധന ചെയ്യുന്നു. ഇതുകൂടാതെ, ഇസ്‌ലാമിലെ സുന്നി വിഭാഗക്കാര്‍ ബഹുമതി ബിരുദമായി ഈ പദം ഉപയോഗിച്ചുവരുന്നു; പ്രഗല്‌ഭരായ ദൈവശാസ്‌ത്രജ്ഞന്മാര്‍ക്കും പണ്ഡിതന്മാര്‍ക്കും ഈ പേരു നല്‌കി അവര്‍ ബഹുമാനിക്കുന്നു. അബുഹനീഫ, അല്‍ -ഷാഫി മാലിക്‌ ഇബ്‌നു അനാസ്‌, അഹമ്മദ്‌ ഇബ്‌നു ഹംബന്‍, ഗസ്സാലി തുടങ്ങിയവര്‍ ഈ ബിരുദം ലഭിച്ചവരാണ്‌. മനുഷ്യരാണ്‌ ഇമാമിനെ നിയമിക്കുന്നതെന്നും ഇമാം തെറ്റുകള്‍ക്കതീതനല്ലെന്നും സുന്നികള്‍ വിശ്വസിക്കുന്നു. മുകളില്‍ പ്രതിപാദിച്ച രണ്ടു വ്യാഖ്യാനങ്ങള്‍ക്കു പുറമേ, ഷിയാ വിഭാഗക്കാര്‍, മുസ്‌ലീം സമുദായത്തിന്റെ മേധാവി എന്ന നിലയ്‌ക്ക്‌ മുഹമ്മദിന്റെ പിന്‍ഗാമികളായി അവര്‍ വിശ്വസിക്കുന്ന 12 പേര്‍ക്കാണ്‌ ഈ പേര്‌ നല്‌കിയിട്ടുള്ളത്‌. ഷിയാ വിഭാഗം ഖലിഫാമാരുടേതിനു തുല്യമായാണ്‌ ഇമാമിന്റെ പദവിയെ കാണുന്നത്‌. പ്രവാചകന്റെ മരുമകനായ അലിയായിരുന്നു ആദ്യത്തെ ഇമാം. ഈശ്വരനാണ്‌ ഇമാമിനെ തെരഞ്ഞെടുക്കുന്നതെന്നും ഇമാം തെറ്റുകള്‍ക്ക്‌ അതീതനാണെന്നും ആണ്‌ ഷിയകളുടെ വിശ്വാസം.
