This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഇന്റർനാഷണൽ റൈസ്‌ റിസർച്ച്‌ ഇന്‍സ്റ്റിറ്റ്യൂട്ട്‌
സര്‍വ്വവിജ്ഞാനകോശം സംരംഭത്തില്‍ നിന്ന്
ഇന്റര്‍നാഷണല്‍ റൈസ്‌ റിസര്‍ച്ച്‌ ഇന്‍സ്റ്റിറ്റ്യൂട്ട്‌
International Rice Research Institute
നെൽക്കൃഷി ശാസ്‌ത്രീയരീതിയിൽ ചിട്ടപ്പെടുത്തി വിളവു വർധിപ്പിച്ചെടുക്കുക എന്ന ലക്ഷ്യത്തോടെ 1960-ൽ ഫിലിപ്പീന്‍സിൽ മനിലയ്‌ക്കടുത്ത്‌ ലാഗുണയിൽ സ്ഥാപിക്കപ്പെട്ട അന്താരാഷ്‌ട്ര ഗവേഷണസ്ഥാപനം. ഏഷ്യയിലെ തന്നെ ഏറ്റവും വലിയ കാർഷിക ഗവേഷണ കേന്ദ്രങ്ങളിലൊന്നാണിത്‌. നെൽ കർഷകരുടെയും ഉപഭോക്താക്കളുടെയും അഭിവൃദ്ധി ലക്ഷ്യമാക്കുന്ന ഇന്‍സ്റ്റിറ്റ്യൂട്ടിന്റെ പ്രാദേശിക കേന്ദ്രങ്ങള്‍ 16 രാജ്യങ്ങളിലായി വ്യാപിച്ചിരിക്കുന്നു.
നെല്ല്‌ അടിസ്ഥാനമാക്കിയുള്ള വ്യത്യസ്‌ത കൃഷിരീതികള്‍ വിപുലീകരിച്ച്‌ ദാരിദ്ര്യ നിർമാർജനം നടത്തുക, നെല്ല്‌ ഉത്‌പാദനം സുസ്ഥിരവും, പരിസ്ഥിതിസൗഹൃദപരവുമാണെന്ന്‌ ഉറപ്പുവരുത്തുക, നെല്ലിന്റെ ജനിതക വിവരങ്ങള്‍ ഗവേഷകർക്കു കൈമാറുക എന്നിവയാണ്‌ ഇന്റർനാഷണൽ റൈസ്‌ റിസർച്ച്‌ ഇന്‍സ്റ്റിറ്റ്യൂട്ടിന്റെ പ്രധാന ലക്ഷ്യങ്ങള്‍. പുതിയ തരം നെല്ലിനങ്ങള്‍ വികസിപ്പിച്ചെടുക്കുക, നൂതന നെല്ല്‌ സംരക്ഷണ മാർഗങ്ങള്‍ ആവിഷ്‌കരിക്കുക, നെല്ലിന്റെ ഗുണമേന്മയും ഉത്‌പാദനവും വർധിപ്പിക്കുക എന്നിവ ലക്ഷ്യമാക്കി വിവിധ തലങ്ങളിലുള്ള ഗവേഷണ പ്രവർത്തനങ്ങളാണ്‌ ഇവിടെ നടക്കുന്നത്‌. മറ്റു രാജ്യങ്ങളിലെ ശാസ്‌ത്രജ്ഞന്മാരുടെ സഹകരണത്തോടെ പ്രാദേശിക ഗവേഷണപദ്ധതികള്‍ ആസൂത്രണംചെയ്‌തു നടപ്പിലാക്കുക, നെല്ലുത്‌പാദകരാജ്യങ്ങളിൽനിന്നുള്ള ഗവേഷകർക്കും വിജ്ഞാനവ്യാപനപ്രവർത്തകർക്കും വേണ്ടിയുള്ള പരിശീലനപരിപാടികള്‍ സംഘടിപ്പിക്കുക, ഗവേഷകർ തമ്മിൽ അനുഭവജ്ഞാനം പങ്കിടാന്‍ സഹായിക്കുന്നവിധം അന്തർദേശീയ സെമിനാറുകളും "വർക്‌ഷോപ്പുകളും' വിളിച്ചുകൂട്ടുക തുടങ്ങിയ പരിപാടികളും ഈ കേന്ദ്രം നടപ്പിലാക്കുന്നുണ്ട്‌. ജപ്പാന്‍പോലെ സമശീതോഷ്‌ണമേഖലയിൽപ്പെട്ട രാജ്യങ്ങളിലെയും ഏഷ്യയിലെ മറ്റ്‌ ഉഷ്‌ണമേഖലാ രാജ്യങ്ങളിലെയും നെൽച്ചെടികളുടെ രൂപത്തിലും വിളവിലും പ്രകടമായിക്കാണുന്ന ഗണ്യമായ അന്തരത്തെ അടിസ്ഥാനപ്പെടുത്തിയുള്ള ഗവേഷണയത്‌നങ്ങള്‍ക്കാണ്‌ ഇന്‍സ്റ്റിറ്റ്യൂട്ട്‌ തുടക്കമിട്ടത്‌. സമശീതോഷ്‌ണമേഖലയിലെ നെല്ലിനങ്ങള്‍ കുറിയവയും ഇലകള്‍ നിവർന്നു നില്‌ക്കുന്നവയും കടുംപച്ചനിറമുള്ളവയും ആയിരിക്കുമ്പോള്‍ ഉഷ്‌ണമേഖലയിലെ നെല്ലിനങ്ങളെല്ലാം ഉയരംകൂടി, ഇലകള്‍ തൂങ്ങിനില്‌ക്കുന്നവയും ചാഞ്ഞുവീഴുന്നവയും ആണെന്നു തെളിഞ്ഞു. സസ്യപ്രരൂപത്തിലുള്ള ഈ വ്യത്യാസം വിളവിലും പ്രതിഫലിച്ചിരുന്നു. ജപ്പാനിലെ നെൽവിളവിന്റെ മൂന്നിലൊന്നു മാത്രമേ ഉഷ്‌ണമേഖലാ രാജ്യങ്ങളിൽ ലഭിച്ചിരുന്നുള്ളൂ. ആദ്യത്തെ വിഭാഗത്തിൽപ്പെട്ട നെല്ലിനങ്ങള്‍ "ജാപോണിക്ക' എന്നും രണ്ടാമത്തേത്‌ "ഇന്‍ഡിക്ക' എന്നും അറിയപ്പെടുന്നു. ഏഷ്യന്‍ ഉഷ്‌ണമേഖലയിലെ പ്രാകൃതസമ്പ്രദായത്തിലുള്ള കൃഷിയിൽ ഇന്‍ഡിക്കാ നെല്ലിനങ്ങള്‍ പ്രതികൂലശക്തികളെ അതിജീവിച്ചു വളർന്ന്‌ പരിമിതമായ തോതിലെങ്കിലും വിളവു നല്‌കാനുള്ള ശേഷി പ്രാപിച്ചിരുന്നു. പക്ഷേ, ഉയർന്നതോതിൽ രാസവളങ്ങള്‍ നല്‌കിയും കളകളെയും കൃമി-കീടങ്ങളെയും പൂർണമായി അകറ്റിയും വെള്ളം നിയന്ത്രിച്ചും നടത്തുന്ന ചെലവേറിയ ആധുനിക കൃഷിരീതികള്‍ ഇന്‍ഡിക്കാനെല്ലിനങ്ങളിൽ അനുവർത്തിച്ചപ്പോള്‍ ഫലം നിരാശാജനകമായിരുന്നു. ഇതിനുള്ള പ്രധാന കാരണം നെല്ലിനങ്ങളുടെ സസ്യപ്രരൂപത്തിലുള്ള പ്രത്യേകതകളാണെന്ന നിഗമനത്തിൽനിന്ന്‌ ഉയിർക്കൊണ്ട പ്രജനനപരിപാടികളാണ്‌ ഇന്‍സ്റ്റിറ്റ്യൂട്ടിൽ ആദ്യമായി ആവിഷ്‌കരിക്കപ്പെട്ടത്‌. തയ്‌വാനിൽനിന്നു കൊണ്ടുവരപ്പെട്ട ഇടത്തരം ഉയരമുള്ള നെല്ലിനങ്ങളെ ഉയരംകൂടിയ ഇന്‍ഡിക്കാ നെല്ലിനങ്ങളുമായി സങ്കരണം നടത്തിയപ്പോള്‍ രണ്ടിനങ്ങളുടെയും നല്ല ഗുണങ്ങള്‍ ഒത്തിണങ്ങിയ പുതിയ കുറേ ഇനങ്ങളുണ്ടായി. ഇന്‍സ്റ്റിറ്റ്യൂട്ടിൽനിന്നും വികസിപ്പിച്ച പുതിയ ഇനം നെല്ല്‌ 'കഞ' എന്ന പേരിലാണ്‌ അറിയപ്പെടുന്നത്‌. കഞ8, കഞ5, കഞ20 എന്നിങ്ങനെ പ്രസിദ്ധങ്ങളായ നെല്ലിനപരമ്പരകള്‍ ഏഷ്യന്‍രാജ്യങ്ങളിലെ നെല്ലുത്‌പാദനത്തിൽ വമ്പിച്ച പരിവർത്തനം വരുത്തി.
1960-കളിലും 70-കളിലും ഇന്ത്യയിലെ ഹരിതവിപ്ലവത്തിന്റെ വിജയത്തിന്‌ കഞ നെല്ലിനങ്ങള്‍ വഹിച്ച പങ്ക്‌ സുപ്രധാനമാണ്‌. 2005-ലെ കണക്കു പ്രകാരം ലോകത്തെ നെല്ല്‌ ഉത്‌പാദക പ്രദേശങ്ങളിൽ 60 ശതമാനത്തിലേറെയും കഞ നെല്ലിനങ്ങളാണ്‌ കൃഷി ചെയ്യുന്നത്‌.
ലോകത്തിന്റെ വിവിധഭാഗങ്ങളിൽനിന്നും കൊണ്ടുവന്നിട്ടുള്ള വ്യത്യസ്‌ത നെല്ലിനങ്ങള്‍ 252 ഹെക്‌ടർ വിസ്‌തൃതിയുള്ള ഈ കേന്ദ്രത്തിൽ നട്ടുവളർത്തി പരീക്ഷിച്ചുവരുന്നുണ്ട്‌. നെല്ലിനെ ബാധിക്കുന്ന ഒട്ടനേകം കീടങ്ങള്‍ക്കും രോഗങ്ങള്‍ക്കുമെതിരെ പ്രതിരോധശക്തി പ്രകടിപ്പിക്കുന്ന ഇനങ്ങള്‍ ഇവയിൽ കണ്ടത്താനുള്ള ഗവേഷണങ്ങളും പ്രവൃദ്ധമാണ്‌. ഇത്തരത്തിൽ രോഗ-കീട-പ്രതിരോധശക്തിയുള്ള ഇനങ്ങളെ അതില്ലാത്ത നെല്ലിനങ്ങളുമായി സങ്കരണംനടത്തി പ്രതിരോധശക്തി, മറ്റുവിധത്തിൽ മെച്ചപ്പെട്ട ഇനങ്ങളിലേക്ക്‌ ഉള്‍ച്ചേർത്തെടുക്കാനുള്ള വിപുലമായ ഒരു പ്രജനന പരിപാടിയും ഇവിടെ നടന്നുവരുന്നുണ്ട്‌.
നെല്ലിന്റെ ജനിതകവൈവിധ്യം സംരക്ഷിക്കാനുള്ള പരിപാടികളും ഇന്‍സ്റ്റിറ്റ്യൂട്ടിൽ പുരോഗമിക്കുന്നു. മാംസ്യം അധികമുള്ള നെല്ല്‌, വ്യത്യസ്‌ത കാലാവസ്ഥകളെ അതിജീവിക്കാന്‍ ശേഷിയുള്ള ഇനം, പോഷകമൂല്യം കുറഞ്ഞ മച്ചിലും വളരുന്ന ഇനങ്ങള്‍, ലവണത്വം കൂടിയ മച്ചിൽ വളരുന്ന ഇനങ്ങള്‍, വിവിധ രോഗപ്രതിരോധശേഷിയുള്ള ഇനങ്ങള്‍, കുറഞ്ഞ വളർച്ചാക്കാലമുള്ള ഇനങ്ങള്‍, അത്യുത്‌പാദന ശേഷിയുള്ള ഇനങ്ങള്‍ തുടങ്ങിയവ ഇന്റർനാഷണൽ റൈസ്‌ റിസർച്ച്‌ ഇന്‍സ്റ്റിറ്റ്യൂട്ടിൽ നിന്നും വികസിപ്പിച്ചെടുത്തിട്ടുണ്ട്‌. അന്തർദേശീയ നെല്ല്‌ ജീന്‍ ബാങ്ക്‌, ലോക നെല്ല്‌ മ്യൂസിയം എന്നിവയ്‌ക്കു പുറമേ നെല്ലിനെ സംബന്ധിച്ച്‌ ലോകത്തെവിടെയും കണ്ടുപിടിക്കപ്പെടുന്ന എല്ലാ വിവരങ്ങളും ക്രാഡീകരിച്ചു സൂക്ഷിക്കുന്ന ഒരു ഗ്രന്ഥാലയവും ഡോക്കുമെന്റേഷന്‍ കേന്ദ്രവും ഇന്റർനാഷണൽ റൈസ്‌ റിസർച്ച്‌ ഇന്‍സ്റ്റിറ്റ്യൂട്ടിനോടനുബന്ധിച്ച്‌ പ്രവർത്തിച്ചുവരുന്നു.
(പ്രാഫ. എ.ജി.ജി.മേനോന്‍; സ.പ.)
