This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഇന്ദിരാഗാന്ധി നാഷണൽ ഓപ്പണ്‍ യൂണിവേഴ്‌സിറ്റി
സര്‍വ്വവിജ്ഞാനകോശം സംരംഭത്തില്‍ നിന്ന്
ഇന്ദിരാഗാന്ധി നാഷണൽ ഓപ്പണ്‍ യൂണിവേഴ്‌സിറ്റി
IGNOU
തുറന്ന സർവകലാശാല എന്ന ആശയത്തിന്റെയും വിദൂര വിദ്യാഭ്യാസത്തിന്റെയും വികസനം ലക്ഷ്യമാക്കി സ്ഥാപിക്കപ്പെട്ട പഠന കേന്ദ്രം. ദേശീയ തലത്തിൽ വിദൂരവിദ്യാഭ്യാസ സൗകര്യങ്ങള്‍ നടപ്പിൽ വരുത്താനുള്ള പരിപാടി ആവിഷ്‌കരിക്കുക, അവയ്‌ക്കുള്ള മാനദണ്ഡങ്ങള്‍ നിർണയിക്കുക, നിലവിലുള്ള വിദ്യാഭ്യാസ പദ്ധതിക്കു സമാന്തരമായിട്ടുള്ള നയം സ്വീകരിക്കുക തുടങ്ങിയവയാണ്‌ ഇന്ദിരാഗാന്ധിയുടെ സ്‌മരണ മുന്‍നിർത്തി സ്ഥാപിക്കപ്പെട്ട ഈ തുറന്ന സർവകലാശാലയുടെ അടിസ്ഥാന ധർമങ്ങളായി നിർദേശിക്കപ്പെട്ടിരിക്കുന്നത്‌. സാമൂഹിക സാമ്പത്തിക പരാധീനതകള്‍മൂലം വിദ്യാഭ്യാസപരമായ ഉയർച്ച കൈവരിക്കുവാന്‍ കഴിഞ്ഞിട്ടില്ലാത്ത ദുർബല വിഭാഗങ്ങള്‍ക്കായി തുടർവിദ്യാഭ്യാസത്തിനുള്ള സൗകര്യം ഏർപ്പെടുത്തുകയും അക്കൂട്ടത്തിൽ അർഹത നേടുന്നവർക്ക്‌ ഉപരി വിദ്യാഭ്യാസത്തിനു സുഗമമായ സൗകര്യം ഒരുക്കുകയും ചെയ്യുന്നതിൽ ഈ സ്ഥാപനം ഗണ്യമായ നേട്ടം കൈവരിച്ചിട്ടുണ്ട്‌. പിന്നോക്ക മേഖലകളിലും ദുർഗമങ്ങളായ മലമ്പ്രദേശങ്ങളിലും നിവസിക്കുന്നവർ, സാമൂഹിക അനാചാരങ്ങള്‍ക്ക്‌ ഇരയായിക്കഴിഞ്ഞുപോന്ന മഹിളാവിഭാഗങ്ങള്‍ എന്നിവരെ വിദ്യാഭ്യാസത്തിലൂടെ മുഖ്യധാരയിൽ എത്തിക്കുന്നതിലും ഇഗ്നോ നിർണായക പങ്കു വഹിക്കുന്നു. 1985-ലെ ഇന്ദിരാഗാന്ധി നാഷണൽ ഓപ്പണ്‍ യൂണിവേഴ്‌സിറ്റി ആക്‌റ്റ്‌ പ്രകാരം നിലവിൽ വന്ന ഇഗ്നുവിന്റെ ആസ്ഥാനം ന്യൂഡൽഹിയിലാണ്‌.
1987-ലാണ്‌ ഇഗ്നോ കോഴ്‌സുകള്‍ ആരംഭിച്ചത്‌. പഠനപദ്ധതി, പാഠ്യക്രമം, പ്രവേശനയോഗ്യത, പ്രായപരിധി. പരീക്ഷാസമ്പ്രദായം തുടങ്ങിയവയെ സംബന്ധിച്ച്‌ സുതാര്യവും അയവുള്ളതുമായ നിബന്ധനകളാണ്‌ ഇഗ്നോ പാലിക്കുന്നത്‌. ദൃശ്യ-ശ്രവണ ഉപാധികള്‍, ടെലികോണ്‍ഫെറന്‍സിങ്‌, ഇ-പുസ്‌തകങ്ങള്‍ തുടങ്ങിയ പഠനസഹായങ്ങള്‍ എല്ലാ വിദ്യാർഥികള്‍ക്കും പ്രാപ്‌തമാണ്‌. താഴേത്തട്ടിലുള്ള സർട്ടിഫിക്കറ്റ്‌ പ്രാഗ്രാമുകളിൽ തുടങ്ങി, ഡിപ്ലോമ, പോസ്റ്റ്‌ഗ്രാജ്വേറ്റ്‌ ഡിപ്ലോമ, മാസ്റ്റർ ഡിഗ്രി തുടങ്ങിയവയിലൂടെ ഡോക്‌ടറൽ ബിരുദം വരെ കരസ്ഥമാക്കാവുന്ന വൈവിധ്യമാർന്ന പഠനപദ്ധതികളാണുള്ളത്‌. ഇന്ത്യയിലാകെ 1119 പഠനകേന്ദ്രങ്ങളും 48 മേഖലാ ആസ്ഥാനങ്ങളും ഇഗ്നോയുടെ കീഴിൽ പ്രവർത്തിക്കുന്നുണ്ട്‌. പഠനകേന്ദ്രങ്ങളിൽ 269 എച്ചം സ്‌ത്രീകള്‍, വികലാംഗർ, പട്ടികജാതി/വർഗവിഭാഗങ്ങള്‍ എന്നിവക്കായി സംവരണം ചെയ്യപ്പെട്ടവയാണ്‌. കൂടാതെ 40 ഓളം വിദേശരാജ്യങ്ങളിലും ഇഗ്നുവിന്റെ പഠനകേന്ദ്രങ്ങള്‍ നിലവിലുണ്ട്‌. വിദ്യാഭ്യാസ പ്രക്ഷേപണങ്ങള്‍ക്കായി എഫ്‌.എം. റേഡിയോ ശൃംഖലയും ജ്ഞാനദർശന്‍ എന്ന ടെലിവിഷന്‍ ചാനലും ഇഗ്നോയുടെ ആഭിമുഖ്യത്തിൽ പ്രവർത്തിക്കുന്നുണ്ട്‌. വിദൂരതലങ്ങളിൽ സാങ്കേതിക വിദ്യാഭ്യാസ വിനിമയം നിർവഹിക്കുന്നതിനുദ്ദേശിച്ച്‌ 2003-ൽ പ്രവർത്തനമാരംഭിച്ച ഏകവല്യ എന്ന ഉപഗ്രഹചാനൽ ഈ മേഖലയിലെ ഉജ്വലമായ മുതൽക്കൂട്ടാണ്‌. ഇഗ്നോയുടെ പ്രവർത്തനത്തിലൂടെ വിദൂര വിദ്യാഭ്യാസ സൗകര്യങ്ങള്‍ വ്യാപകവും പര്യാപ്‌തവുമായി തീർന്നിട്ടുണ്ട്‌.
