This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഇഡൂണ്‍
സര്‍വ്വവിജ്ഞാനകോശം സംരംഭത്തില്‍ നിന്ന്
ഇഡൂണ്‍
നോർവീജിയന്‍ പുരാണങ്ങളിലെ കാവ്യദേവതയായ ബ്രാജിയുടെ പത്‌നി. ബ്രാജിയും ഇഡൂണും കൂടി ദേവന്മാരുടെ ആസ്ഥാനമായ അസ്‌ഗാർഡിൽ താമസമാക്കി. ദേവന്മാരുടെ യൗവനം നിലനിർത്താനുള്ള സുവർണ ആപ്പിള്‍ പഴങ്ങള്‍ കാത്തുസൂക്ഷിക്കുന്ന ചുമതല ഈ ദേവതയാണ്‌ വഹിച്ചിരുന്നത്‌. ഒരിക്കൽ ഝാസി എന്ന രാക്ഷസന്‍ ദുർദേവതയായ ലോകിയുടെ സഹായത്താൽ ഇഡൂണിനോടൊപ്പം ആപ്പിളും മോഷ്‌ടിച്ചുകൊണ്ട്‌ ജോട്ടണ്‍ ഹെയ്‌മിലേക്ക്‌ പോയി. അന്നുമുതൽ ദേവന്മാർക്ക്‌ വാർധക്യം ബാധിച്ചു തുടങ്ങി. ഇഡൂണിനെ തിരിച്ചുനല്‌കിയില്ലെങ്കിൽ ലോകിയെ ശിക്ഷിക്കുമെന്ന്‌ ദേവന്മാർ ഭീഷണിപ്പെടുത്തി. ദേവന്മാരെ ഭയന്ന്‌ ഇഡൂണിനെ തിരിച്ചുനല്‌കാന്‍ ലോകി തയ്യാറായി. സൗന്ദര്യത്തിന്റെയും സ്‌നേഹത്തിന്റെയും ദേവതയായ ഫ്രയയിൽനിന്ന്‌ തൂവലുകളും ചിറകുകളും ലോകി കടംവാങ്ങി ജോട്ടണ്‍ഹെയ്‌മിലെത്തി. ഇഡൂണിനെ ഒരു അടയ്‌ക്കയുടെ രൂപത്തിലാക്കിക്കൊണ്ട്‌ അസ്‌ഗാർഡിലെത്തി. ഝാസി ഇവരെ പിന്തുടർന്നു. എന്നാൽ, അസ്‌ഗാർഡിലെ മതിലിൽ കൊളുത്തിവച്ചിരുന്ന തീയ്യിൽവീണ്‌ ഝാസി മരണമടഞ്ഞു.
ഈ കഥയിലെ ഇഡൂണ്‍ വസന്തത്തെയും പുതിയ ജീവനെയും പ്രതിനിധീകരിക്കുന്നു. മഞ്ഞുകാലം, അവളെ ആക്രമിക്കുന്നതിന്റെ പ്രതീകമാണ്‌ ഝാസി എന്ന രാക്ഷസന്‍. പ്രകൃതി ഈ കാലമത്രയും തളർന്നുകിടക്കുന്നു. വസന്തം തിരിച്ചെത്തുന്നതോടെ പ്രകൃതിയിൽ എല്ലായിടത്തും പുതുജീവന്‍ ഉണ്ടാകുന്നു എന്നാണ്‌ ഈ കഥയുടെ സാരം.
9-ാം ശ.-ത്തിലാണ്‌ ഈ കഥ അടങ്ങുന്ന നോർവീജിയന്‍ കവിത എഴുതപ്പെട്ടത്‌.
