This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഇടയ്‌ക്ക
സര്‍വ്വവിജ്ഞാനകോശം സംരംഭത്തില്‍ നിന്ന്
ഇടയ്‌ക്ക
തികച്ചും കേരളീയമെന്നു പറയാവുന്ന ഒരു ചർമവാദ്യം. ഹൈന്ദവക്ഷേത്രങ്ങളിൽ ഉപയോഗിക്കുന്ന വാദ്യോപകരണങ്ങളിൽ ഇടയ്‌ക്കയ്‌ക്ക്‌ വളരെ പ്രധാന്യമുണ്ട്‌. രാവിലെയും വൈകുന്നേരവും ദീപാരാധനയ്‌ക്കുശേഷം അഷ്‌ടപദി പാടുന്നത്‌ ഇടയ്‌ക്ക കൊട്ടിക്കൊണ്ടാണ്‌. അതുകൊണ്ട്‌ ഈ ചടങ്ങിന്‌ "കൊട്ടിപ്പാടിസേവ' എന്നു പറയുന്നു. പഞ്ചവാദ്യത്തിലും ഇടയ്‌ക്ക ഒരംഗമാണ്‌. കൂടിയാട്ടത്തിൽ നടനത്തിനുള്ള പശ്ചാത്തലസംഗീതോപകരണങ്ങളുടെ കൂട്ടത്തിൽ ഇത്‌ ഉപയോഗിച്ചുവരുന്നു. ആധുനിക നൃത്തവേദിയിലും കഥകളിയിലും ഇന്ന്‌ ഈ വാദ്യോപകരണം ഉപയോഗിച്ചുതുടങ്ങിയിട്ടുണ്ട്‌.
തടികൊണ്ടു നിർമിതമായ ഇടയ്‌ക്കക്കുറ്റിയുടെ മധ്യം ഒതുങ്ങിയതും അഗ്രഭാഗങ്ങള്‍ കപ്പുപോലെ വികസിച്ചതുമാണ്‌. കുറ്റിയുടെ അഗ്രഭാഗത്തുനിന്നും നാല്‌ സെ.മീ. ഉയർന്നുനില്‌ക്കുന്ന വായ്‌വട്ടം കാളയുടെ അകത്തോലുകൊണ്ട്‌ പൊതിഞ്ഞിരിക്കും. ഈ ആവരണത്തിനുമീതെ വായ്‌വട്ടത്തോടുചേർന്ന്‌ വൃത്താകൃതിയിൽ ഒരു ചട്ടം ഘടിപ്പിച്ചിരിക്കും. ഈ ചട്ടവും തോലും ചേർന്നിരിക്കുന്ന സ്ഥാനത്ത്‌ ദ്വാരങ്ങളുണ്ടാക്കി അതിലൂടെ ചരടുകള്‍ കടത്തി രണ്ടുഭാഗത്ത്‌ അയച്ച്‌ ബന്ധിക്കുന്നു. തുകലിന്റെ അടിയിൽ വായ്‌വട്ടത്തോടുചേർന്ന്‌ കുറ്റിയിൽ വിലങ്ങനെ കമ്പിപോലുള്ള രണ്ടിഴ ഈറപ്പനനാര്‌ ബന്ധിച്ചിട്ടുണ്ട്‌. വാദകന്റെ അരയ്‌ക്കുതാഴെ സ്‌പർശിക്കത്തക്കവിധത്തിൽ നീളമുള്ള നൂൽചരടുകൊണ്ട്‌ ബന്ധിച്ച്‌ ഇടയ്‌ക്ക അയാളുടെ ഇടതുതോളിൽ തൂക്കിയിട്ടിരിക്കും. ഈ നൂൽച്ചരട്‌ വർണനൂലുകൊണ്ട്‌ നിർമിച്ച പൊടിപ്പും തൊങ്ങലും വച്ച്‌ അലങ്കരിക്കാറുണ്ട്‌. നൂൽച്ചരടുകള്‍ക്കിടയിലൂടെ കൈകടത്തി ഇടയ്‌ക്കയുടെ മധ്യഭാഗത്തുപിടിച്ച്‌ വായ്‌വട്ടത്തിൽ വരിഞ്ഞുമുറിക്കിയിട്ടുള്ള തോലിൽ വലതുകരംകൊണ്ട്‌ ഒരുതരം കോലുപയോഗിച്ചു കൊട്ടിയാണ്‌ ശബ്‌ദം പുറപ്പെടുവിക്കുന്നത്‌. വിരൽവച്ചത്തിൽ ക്രമേണ അഗ്രത്തേക്കുമെലിഞ്ഞു വളഞ്ഞ ഒരു കോലാണ്‌ കൊട്ടാനുപയോഗിക്കുന്നത്‌. ഇതിന്‌ ഏകദേശം 30 സെ.മീ. നീളംവരും. കൊട്ടുന്നതോടൊപ്പം കുറ്റിയിൽ അയച്ചുബന്ധിച്ചിട്ടുള്ള ചരട്‌ ഇടതുകൈകൊണ്ട്‌ അകത്തുകയും അടുപ്പിക്കുകയും ചെയ്യുന്നതോടെ സംഗീതാത്മകമായ സ്വരവിശേഷങ്ങള്‍ ഉതിരുന്നു. ഋഷഭസ്വനം പുറപ്പെടുവിക്കുന്നതിനാണ്‌ ഈറപ്പനനാര്‌ ഘടിപ്പിച്ചിട്ടുള്ളത്‌.
