This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഇക്കിള്‍
സര്‍വ്വവിജ്ഞാനകോശം സംരംഭത്തില്‍ നിന്ന്
ഇക്കിള്‍
Hiccup
വക്ഷസ്സും ഉദരവും തമ്മിൽ വേർതിരിക്കുന്ന പേശീഭിത്തിയായ പ്രാചീര(diaphragm)ത്തിന്റെ അനിയന്ത്രിതവും സത്വരവുമായ സങ്കോചംമൂലമുണ്ടാകുന്ന പ്രത്യേക ശാരീരികസ്ഥിതിവിശേഷം. പ്രാചീരത്തെ നിയന്ത്രിക്കുന്ന നാഡി(phrenic nerve)യുടെ ഉത്തേജനം (irritation) മൂലമാണ്‌ ഇക്കിള്‍ ഉണ്ടാകുന്നത്‌. ഇക്കിളിനോടൊപ്പം ഒരു പ്രത്യേകശബ്‌ദമുണ്ടാകാറുണ്ട്‌. ശ്വാസനാളത്തിന്റെ (larynx) തൊണ്ടയിലേക്കു തുറക്കുന്ന ദ്വാരമായ ക്ലോമമുഖം (glottis) പെട്ടെന്ന്‌ അടയുന്നതിനാലാണ്‌ ഈ ശബ്‌ദമുണ്ടാകുന്നത്‌. പ്രാചീരത്തിന്റെ സങ്കോചത്തോടൊപ്പം ശ്വാസം അകത്തേക്കെടുത്തു പോകുന്നതിനാൽ ഈ ദ്വാരം അടഞ്ഞുപോകുന്നു. ഇക്കിളിന്റെ കാരണങ്ങള്‍ പലതാണ്‌. വളരെ ധൃതിപിടിച്ച്‌ ഭക്ഷണം കഴിക്കുന്നതും ദഹനനാളിയിലെയും ശ്വാസനേന്ദ്രിയത്തിലെയും തരക്കേടുകളും ഇക്കിളിനു കാരണമാകാം. യൂറീമിയ (uraemia-മലാശമവൃക്കവഴി മൂത്രത്തിലൂടെ പുറത്തുപോകേണ്ട വിസർജ്യവസ്‌തുക്കള്‍ രക്തത്തിൽ അടിഞ്ഞുകൂടി വിഷവസ്‌തുക്കളായി മാറുന്ന രോഗം), എന്‍കെഫലൈറ്റിസ്‌ (encephalitis തലച്ചോറിനുണ്ടാകുന്ന ഒരുതരം കടുത്ത വീക്കം) എന്നീ രോഗങ്ങളോടൊപ്പവും ഇക്കിളുണ്ടാകുക സാധാരണമാണ്‌. (നോ: എന്‍കെഫലൈറ്റിസ്‌)
എല്ലാ വ്യക്തികള്‍ക്കും ഇടയ്‌ക്കിടെ ഇക്കിളുണ്ടാവുക പതിവാണ്‌. ദീർഘമായി ഏതാനും പ്രാവശ്യം ശ്വസിക്കുക ഇതിനൊരു പരിഹാരമാർഗമായി കരുതിവരുന്നു; വിഴുങ്ങാനുള്ള പ്രവണത വർധിപ്പിക്കാനായി നാക്കു വലിക്കുന്നതും മറ്റൊരു ചികിത്സയാണ്‌; കുരുമുളകുപൊടി ഉപയോഗിച്ച്‌ തുമ്മുന്നതും ഒരു ഗ്ലാസ്‌ വെള്ളം വളരെ സാവധാനത്തിൽ കുടിക്കുന്നതും ഫലപ്രദമായ പരിഹാരമാർഗങ്ങളായി കരുതപ്പെട്ടുവരുന്നു. ഒരു കടലാസുസഞ്ചി മുഖത്തോടു ചേർത്തുപിടിച്ച്‌ ഒന്നുരണ്ടുമിനിട്ടുനേരം അതിലേക്കു ശ്വസിക്കുന്നതും ഇക്കിള്‍ നിർത്താന്‍ പറ്റിയ ഒരു മാർഗമാണ്‌ (പോളിത്തീന്‍ സഞ്ചി ആയിരിക്കരുത്‌). കടലാസ്‌ സഞ്ചിയിലേക്ക്‌ ശ്വസിക്കുമ്പോള്‍ വായുവിലെ കാർബണ്‍ ഡൈ ഓക്‌സൈഡിന്റെ അളവ്‌ വർധിക്കുകയും രക്തത്തിലെ ഓക്‌സിജന്റെ അളവ്‌ കുറയാതിരിക്കാനായി ശ്വാസകോശങ്ങള്‍ക്ക്‌ കൂടുതലായി ശ്രമിക്കേണ്ടിവരികയും ചെയ്യുന്നു. ഇതിന്റെ ഫലമായി ശ്വാസോച്ഛ്വാസത്തിന്റെ സമയദൈർഘ്യം വർധിക്കുകയും തത്‌ഫലമായി പ്രാചീരത്തിന്റെ സങ്കോചങ്ങള്‍ ക്രമീകരിക്കപ്പെടുകയും ചെയ്യുന്നു. സാധാരണനിലയിൽ ഏതാനും മിനിട്ടുകള്‍ മാത്രമേ ഇക്കിള്‍ നിലനില്‌ക്കാറുള്ളൂ. ഇത്‌ അത്ര ഗൗരവമായി കരുതേണ്ടതില്ല. എന്നാൽ അപൂർവമായി ഇക്കിള്‍ വളരെ സമയത്തേക്കു നീണ്ടുനില്‌ക്കാറുണ്ട്‌. ഇക്കിളിന്റെ കാഠിന്യം കൂടുക നിമിത്തം പലപ്പോഴും അത്‌ ആളിനെ തളർത്തിക്കളയുകയും ഉദ്വേഗഭരിതനാക്കുകയും ചെയ്യാറുണ്ട്‌. ഇങ്ങനെ വരുന്ന സന്ദർഭങ്ങളിൽ പെട്ടെന്നുതന്നെ വൈദ്യസഹായം തേടേണ്ടതാവശ്യമാണ്‌. ഈ ഘട്ടത്തിൽ ശമനൗഷധങ്ങള്‍ (sedatives) ഏെതെങ്കിലും നല്‌കുകയാണ്‌ പതിവ്‌.
