This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഇംഫാൽ യുദ്ധം
സര്‍വ്വവിജ്ഞാനകോശം സംരംഭത്തില്‍ നിന്ന്
ഇംഫാൽ യുദ്ധം
രണ്ടാം ലോകയുദ്ധത്തിന്റെ ഭാഗമായി മണിപ്പൂരിന്റെ തലസ്ഥാനമായ ഇംഫാലിൽ വച്ചുനടന്ന നിർണായക യുദ്ധം. വില്യംസ്ലിമ്മിന്റെ നേതൃത്വത്തിൽ അണിനിരന്ന ബ്രിട്ടന്റെ 14-ാം പട ജപ്പാന്റെ 15-ാം പടയെ പരാജയപ്പെടുത്തിയ ഈ യുദ്ധം ജാപ്പനീസ്‌ സൈനിക ചരിത്രത്തിലെ ഏറ്റവും ദയനീയ പരാജയമെന്നാണ്‌ വിശേഷിപ്പിക്കപ്പെട്ടത്‌. ഇംഫാൽ വഴി ഇന്ത്യ ആക്രമിക്കാനുള്ള ജപ്പാന്റെ പദ്ധതിക്കു വിരാമമിട്ടത്‌ ഈ യുദ്ധമാണ്‌. 1942 അവസാനത്തോടെയാണ്‌ ബ്രിട്ടീഷ്‌ ബർമ ജപ്പാന്‍കാർക്ക്‌ അധീനമാകുന്നത്‌; തുടർന്ന്‌ ഇന്ത്യയിലേക്ക്‌ പിന്‍വാങ്ങിയ സഖ്യകക്ഷിസൈന്യം ചിയാങ്‌ കൈഷക്കിന്റെ ചീന സേനയുമായി സഹകരിച്ച്‌ ജപ്പാന്‍കാരെ തുരത്താന്‍ പദ്ധതി തയ്യാറാക്കി. ഇംഫാൽവഴി ബ്രിട്ടീഷ്‌ ഇന്ത്യ ആക്രമിക്കാനുള്ള ഒരു സമരപരിപാടി ജപ്പാന്റെ 15-ാം പട ആവിഷ്‌കരിച്ചിട്ടുണ്ടെന്നും സുഭാഷ്‌ ചന്ദ്രബോസ്‌ രൂപവത്‌കരിച്ച ഇന്ത്യന്‍ ദേശീയസേന (ഐ.എന്‍.എ.) ജപ്പാന്‍കാരുമായി സഹകരിക്കുമെന്നും ടോക്കിയോ റേഡിയോ പ്രഖ്യാപിക്കുന്നത്‌ സെപ്‌തംബർ 1943-ലാണ്‌. ജപ്പാന്‍കാർ മൂന്ന്‌ സൈനികവിഭാഗങ്ങളെയാണ്‌ ഇംഫാൽപട്ടണം പിടിച്ചെടുക്കുവാന്‍ ഒരുക്കി നിർത്തിയത്‌. കാടുകള്‍ കടന്നു പോകേണ്ട ഇവരുടെ സൈന്യത്തിന്‌ വെള്ളക്കടുവ എന്നായിരുന്നു പേരിട്ടിരുന്നത്‌. ഇവരെ പ്രതിരോധിക്കാന്‍ നിയുക്തരായ ബ്രിട്ടന്റെ 17-ാം പട കരിമ്പൂച്ച എന്നറിയപ്പെട്ടു. 1944 മാർച്ച്‌ തുടക്കത്തിൽ ജപ്പാന്‍കാർ ഇംഫാൽ നഗരത്തിൽവച്ചും മണിപ്പൂർ സമതലത്തിൽ വച്ചും സഖ്യകക്ഷികളുടെ സൈന്യങ്ങളുമായി കടുത്ത പോരാട്ടം നടത്തി. സഖ്യകക്ഷികളുടെ പാരച്യൂട്ട്‌ സൈന്യം മണിപ്പൂരിലെത്തിയെങ്കിലും ജപ്പാന്‍ സൈന്യം അതിന്റെ നല്ലൊരു ഭാഗം നശിപ്പിക്കുകയാണുണ്ടായത്‌. എന്നാൽ മാ. അവസാനത്തോടെ യുദ്ധം സഖ്യകക്ഷികള്‍ക്ക്‌ അനുകൂലമായി നീങ്ങിത്തുടങ്ങി. 15-ാം പഞ്ചാബ്‌ റെജിമെന്റ്‌, ഒന്നാം ഗൂർഖാപ്പട്ടാളം, ജാട്ട്‌ റെജിമെന്റ്‌ എന്നീ ബ്രിട്ടീഷിന്ത്യന്‍ പടകള്‍ യുദ്ധത്തിൽ നിർണായക പങ്കുവഹിച്ചു. ഐ.എന്‍.എ.ക്കാർ ധീരമായി പൊരുതിയെങ്കിലും പരാജയപ്പെടുകയാണുണ്ടായത്‌. 1944 ജൂലായ്‌ ആയപ്പോഴേക്കും ജപ്പാന്‍ സൈന്യത്തിന്റെ പതനം സുനിശ്ചിതമായി. ബർമയിലെ, സഖ്യകക്ഷികളുടെ അന്തിമവിജയത്തിനു കളമൊരുക്കിയത്‌ ഇംഫാൽ യുദ്ധമായിരുന്നു.
