This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
അവിട്ടത്തൂര്‍ശാസനം
സര്‍വ്വവിജ്ഞാനകോശം സംരംഭത്തില്‍ നിന്ന്
അവിട്ടത്തൂര്‍ശാസനം
തൃശൂര്‍ ജില്ലയില്‍ ഇരിങ്ങാലക്കുട റെയില്‍വേസ്റ്റേഷനു സമീപമുള്ള അവിട്ടത്തൂര്‍ ശിവക്ഷേത്രത്തിലെ ശ്രീകോവിലിന്റെ പ്രവേശനദ്വാരത്തിന്റെ ഇരുഭാഗങ്ങളിലുള്ള ശിലാലിഖിതങ്ങള്‍. രണ്ടാം ചേരസാമ്രാജ്യത്തിന്റെ (എ.ഡി. 800-1102) ചരിത്രത്തില്‍ ഗോദരവിയുടെ ഭരണകാലം (917-47) നിര്‍ണയിക്കുവാന്‍ ഈ ശാസനം സഹായിക്കുന്നു. ശാസനകാലം ഗോദരവിയുടെ 20-ാം ഭരണവര്‍ഷമാണ്. 'കന്നിയില്‍ വ്യാഴം നിന്ന വൃശ്ചികമാസത്തില്‍ ആവട്ടി പുത്തൂരായിരവരും ഇരുപത്തെഴുവരും ഇരണ്ടുകുടിപ്പൊതുവാളും ആവിരോതത്താല്‍ കൂടിത്തിരുക്കൈകീഴ് ഇരുന്തുചെയ്ത കച്ചമാവിതു'; അതായത് കരാര്‍ ആണെന്ന്, ശാസനത്തില്‍ പറയുന്നു. ഊരിന്റെ ഭരണത്തില്‍ ഊരാളരും പൊതുവാളും കൈകടത്തിക്കൂടെന്ന് അനുശാസിക്കുന്നുണ്ട്. ഊരാളര്‍ ക്ഷേത്രം വക സ്വത്തുക്കള്‍ അപഹരിക്കാതിരിക്കുവാനുള്ള വ്യവസ്ഥകളാണ് ശാസനത്തില്‍ അധികഭാഗവും. വ്യവസ്ഥകള്‍ ലംഘിക്കുന്ന ഊരാളര്‍ക്ക് സ്ഥാനമാനങ്ങളും ഊരാളസമിതിയിലെ അംഗത്വവും നഷ്ടപ്പെടും.
രാജസിംഹന്റെ (1025-43) ഒരു ശാസനവും അവിട്ടത്തൂരിനടുത്തുള്ള താഴേക്കാട്ടുപള്ളിയില്‍ ഉണ്ട്. പള്ളിക്കും ക്ഷേത്രത്തിനും തൊട്ടടുത്ത് രണ്ടുമുറി പീടികപണിത് കച്ചവടം ചെയ്യുവാന്‍ മണിഗ്രാമത്തില്‍പ്പെട്ട രണ്ടു വ്യാപാരികള്‍ക്ക് അനുവാദം നല്കുന്ന ഈ ശാസനം മലയാളഭാഷയുടെ വികാസപരിണാമങ്ങളെ ഉദാഹരിക്കുവാന്‍ ഭാഷാപണ്ഡിതന്മാര്‍ ഉദ്ധരിക്കാറുണ്ട്.
(അടൂര്‍ കെ.കെ. രാമചന്ദ്രന്‍ നായര്‍)
