This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
അമ്മാളു അമ്മ, തരവത്ത് (1873 - 1936)
സര്‍വ്വവിജ്ഞാനകോശം സംരംഭത്തില്‍ നിന്ന്
അമ്മാളു അമ്മ, തരവത്ത് (1873 - 1936)
മലയാള ഗദ്യസാഹിത്യകാരി. പാലക്കാട്ടു വടക്കുന്തറയുള്ള തരവത്തു തറവാട്ടില്‍ 1873-ല്‍ ജനിച്ചു. തെക്കെ ഇന്ത്യയിലെ അബ്രാഹ്മണ പ്രസ്ഥാനത്തിന്റെ ഒരു നേതാവും ജസ്റ്റിസ് പത്രത്തിന്റെ അധിപനും ആയിരുന്ന ഡോ. ടി.എം. നായര്‍ അമ്മാളു അമ്മയുടെ സഹോദരനാണ്. ഒരു ഇംഗ്ലീഷ് നോവലിനെ അനുകരിച്ചു തമിഴില്‍ എഴുതിയിട്ടുള്ള ഒരു കൃതിയുടെ വിവര്‍ത്തനമായ കോമളവല്ലി (രണ്ടു ഭാഗങ്ങള്‍), തമിഴില്‍ നിന്നുള്ള മറ്റൊരു വിവര്‍ത്തനമായ ഭക്തമാല (മൂന്നു ഭാഗങ്ങള്‍) എന്നിവ അമ്മാളു അമ്മയുടെ പ്രധാനപ്പെട്ട കൃതികളാണ്. മലയാളഗദ്യത്തെ സംപുഷ്ടമാക്കുവാന്‍ ഈ കൃതികള്‍ അക്കാലത്തു വളരെ സഹായിച്ചിട്ടുണ്ട്. ചെന്നൈയില്‍വച്ചു അന്തരിച്ച കൊച്ചി വലിയതമ്പുരാന്‍ 1919-ല്‍ നടത്തിയ ഷഷ്ടിപൂര്‍ത്തി ഡര്‍ബാറില്‍വച്ച് അമ്മാളു അമ്മയ്ക്ക് 'സാഹിത്യസഖി' എന്ന ബിരുദം നല്കി.
തിരുവിതാംകൂറില്‍നിന്നും നാടുകടത്തപ്പെട്ട ദേശാഭിമാനി രാമകൃഷ്ണപിള്ളയ്ക്കും ഭാര്യയ്ക്കും ഇവര്‍ ആതിഥ്യം നല്കി അവരെ പാലക്കാട്ടു താമസിപ്പിച്ചതും ഉദാരമായി സഹായിച്ചതും ബി. കല്യാണി അമ്മയുടെ വ്യാഴവട്ടസ്മരണകളില്‍ അനുസ്മരിക്കപ്പെട്ടിട്ടുണ്ട്. 1936-ല്‍ ഇവര്‍ അന്തരിച്ചു.
