This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ദേശീയ സുരക്ഷ
സര്‍വ്വവിജ്ഞാനകോശം സംരംഭത്തില്‍ നിന്ന്
ദേശീയ സുരക്ഷ
National security
രാഷ്ട്രത്തിലെ ജനങ്ങളുടെ ജീവനും സമ്പത്തിനും സംരക്ഷണം നല്കുന്നതിനുവേണ്ടി ഗവണ്മെന്റ് ആവിഷ്കരിക്കുന്ന പരിപാടികള്‍. ജനങ്ങളെ വിദേശീയാക്രമണങ്ങളില്‍നിന്ന് സംരക്ഷിക്കുക, രാഷ്ട്രത്തിനുള്ളില്‍ ക്രമസമാധാനം നിലനിര്‍ത്തുക എന്നിവയാണ് ദേശീയ സുരക്ഷയിലെ പ്രധാന ഘടകങ്ങള്‍. രാഷ്ട്രത്തിന്റെ പരമാധികാരം നിലനിര്‍ത്തുന്നതിന് വിദേശീയാക്രമണത്തെ ചെറുക്കേണ്ടത് അത്യാവശ്യമാണ്. പ്രതിരോധ സന്നാഹങ്ങളെ പ്രോത്സാഹിപ്പിക്കുന്നതിനുവേണ്ടി പലതരം പരിപാടികള്‍ മുന്‍കാലത്തെ ഗവണ്മെന്റുകള്‍ അവലംബിച്ചിരുന്നു. ഉദാഹരണമായി 'നമ്മുടെ രാഷ്ട്രം എപ്പോഴും മറ്റു രാഷ്ട്രങ്ങളെ ആക്രമിച്ചുകൊണ്ടേയിരിക്കണം, അല്ലെങ്കില്‍ അവ നമ്മുടെ രാഷ്ട്രത്തെ ആക്രമിക്കും' എന്നതായിരുന്നു അക്ബര്‍ ചക്രവര്‍ത്തിയുടെ നയം.
പൗരന്മാര്‍ തമ്മില്‍ തര്‍ക്കങ്ങളുണ്ടാകുമ്പോള്‍ അത് അക്രമപരമാംവിധം വളരാതിരിക്കാനാണ് പൊലീസ് സേനയെയും നീതിന്യായ വിഭാഗത്തെയും സംഘടിപ്പിച്ചിട്ടുള്ളത്. ജനങ്ങളുടെ ജീവനും സ്വത്തിനും സുരക്ഷ ലഭിക്കണമെങ്കില്‍ ഇത്തരം സന്നാഹങ്ങള്‍ അത്യാവശ്യമായിത്തീരുന്നു. ചിലപ്പോള്‍ വ്യക്തികളുടെ സ്വകാര്യ ജീവിതത്തില്‍പ്പോലും ഗവണ്മെന്റിന് ഇടപെടേണ്ടി വന്നേക്കാം. വിവാഹത്തിനുള്ള നിബന്ധനകള്‍ നിശ്ചയിക്കുക, വിവാഹ നിയമങ്ങള്‍ നിര്‍മിക്കുക, സ്വത്തുക്കളുടെ പിന്തുടര്‍ച്ചാക്രമം നിശ്ചയിക്കുക, കുട്ടികളെ സംരക്ഷിക്കുന്നതിനുള്ള ചുമതലയെപ്പറ്റി മാതാപിതാക്കളെ ബോധാവാന്മാരാക്കുക, വിവാഹിതരായ പുരുഷന്മാര്‍ ഭാര്യമാരെ സംരക്ഷിക്കുന്നതിനുള്ള നിയമങ്ങള്‍ നിര്‍മിക്കുക, വിവാഹമോചനവും തുടര്‍ന്ന് വിവാഹമോചിതര്‍ക്കുവേണ്ട സംരക്ഷണം തുടങ്ങിയ കാര്യങ്ങള്‍ക്കു നിയമമുണ്ടാക്കുക തുടങ്ങിയവയും ആവശ്യമാണ്. രാഷ്ട്രത്തിന്റെ സന്തുഷ്ടിയും സമാധാനവും കുടുംബത്തിന്റെ ഭദ്രതയെ ആശ്രയിച്ചാണിരിക്കുന്നത്. ദേശീയ സുരക്ഷയുടെ ഭാഗമായി കുടുംബങ്ങളുടെ ഭദ്രത നിലനില്ക്കണമെങ്കിലും രാഷ്ട്രത്തിന്റെ ഇടപെടല്‍ അത്യാവശ്യമായിത്തീരുന്നു.
ദേശീയ സുരക്ഷയുടെ ഭാഗമായി ജനങ്ങള്‍ രാഷ്ട്രത്തോട് വിധേയത്വം പുലര്‍ത്തത്തക്കവിധം നിയമങ്ങള്‍ നിര്‍മിക്കേണ്ടതും ആധുനിക രാഷ്ട്രങ്ങളുടെ ചുമതലയാണ്. രാഷ്ട്രത്തിലെ ഗതാഗത സൗകര്യങ്ങളും വാര്‍ത്താവിനിമയസംവിധാനങ്ങളും മെച്ചപ്പെടുത്തുന്നതും ദേശീയ സുരക്ഷാ സംവിധാനത്തെ സഹായിക്കുന്നു. പൗരന്മാരുടെയിടയില്‍ ശക്തമായ ഐകമത്യ ബോധവും ദേശീയബോധവും വളരുന്നതിന് ഇത്തരം സജ്ജീകരണങ്ങള്‍ സഹായകമാണെന്ന് അനുഭവങ്ങള്‍ തെളിയിക്കുന്നു. മനുഷ്യശരീരത്തിലെ സിരാവ്യൂഹം പോലുള്ള സംവിധാനമാണ് രാഷ്ട്രത്തിലെ ഗതാഗത-വാര്‍ത്താവിനിമയ സജ്ജീകരണങ്ങള്‍. ജനങ്ങള്‍ തമ്മിലുള്ള സുഗമമായ ബന്ധം നിലനിര്‍ത്തുന്നതിനുവേണ്ടി വിപണികളെ നയിക്കുക, നാണയം അച്ചടിക്കുക, വില നിയന്ത്രിക്കുക തുടങ്ങിയ രംഗങ്ങളിലും ഗവണ്മെന്റ് ഇടപെടുന്നു. പൊതുവേ, ദേശീയ സുരക്ഷ ബലപ്പെടുത്തുന്നതിന്റെ ഭാഗമായി പൌരന്മാരുടെ സ്വകാര്യ ജീവിതത്തിലും സാമ്പത്തിക രംഗങ്ങളിലും ഗവണ്മെന്റിന്റെ ഇടപെടല്‍ അത്യാവശ്യമായിത്തീരുന്നു.
(പ്രൊഫ. നേശന്‍. ടി.മാത്യു)
