This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഐസ്‌ യൊട്ടിങ്‌
സര്‍വ്വവിജ്ഞാനകോശം സംരംഭത്തില്‍ നിന്ന്
ഐസ്‌ യൊട്ടിങ്‌
Ice Yachting
ഉറഞ്ഞുകിടക്കുന്ന മഞ്ഞുപരപ്പിനു മുകളില്‍ സഞ്ചരിക്കുന്നതിനുപയുക്തമായ ഒരിനം നൗകയിലൂടെ നടത്തുന്ന ഉല്ലാസയാത്ര. ഐസ്‌ യൊട്ടിങ്ങിനുപയോഗിക്കുന്ന നൗകയ്‌ക്ക്‌ രണ്ടുവശങ്ങളില്‍ ഘടിപ്പിച്ച ഉരുക്കുചട്ടങ്ങളോടുകൂടിയ ഒരു ചട്ടക്കൂടുണ്ട്‌. ഈ നൗകയ്‌ക്ക്‌ സാധാരണ അണിയത്തും അമരത്തുമായി രണ്ടു പായ്‌ ഉണ്ടായിരിക്കും. ചുക്കാന്റെ കൈപ്പിടിക്കു സാധാരണയില്‍ക്കവിഞ്ഞ നീളമുണ്ടായിരിക്കും. നൗകയുടെ പായും ചുക്കാനും ഒരുമിച്ച്‌ ഒരാള്‍ക്കുതന്നെ നിയന്ത്രിക്കുവാന്‍ കഴിയുന്നുവെന്നുള്ളതാണ്‌ ഇതിന്റെ മെച്ചം. 1869-ല്‍ നിര്‍മിച്ച ഐസിക്കിള്‍ എന്ന നൗകയ്‌ക്ക്‌ 18.88 മീ. നീളവും 1000 ച.മീ. ഉള്‍വിസ്‌താരവുമുണ്ടായിരുന്നു. അഞ്ചോ ആറോ ആളുകള്‍ക്ക്‌ കയറാവുന്ന കനേഡിയന്‍നൗകയ്‌ക്ക്‌ 12.18 മീ. നീളമുണ്ട്‌. സാധാരണയായി 6 മുതല്‍ 7.6 മീ. വരെ നീളമുള്ള ചെറിയ നൗകകളായിട്ടാണ്‌ യൊട്ടിങ്ങിന്‌ ഉപയോഗിക്കുക. ഇത്‌ ഓടിക്കുന്നത്‌ ഒരാളായിരിക്കും. യൊട്ടിങ്‌ നൗകകള്‍ കാറ്റിനനുകൂലമായി യാത്രചെയ്യാന്‍ സൗകര്യമാകുംവിധമാണ്‌ സംവിധാനം ചെയ്‌തിരിക്കുന്നത്‌. മണിക്കൂറില്‍ 96 കി.മീ. വേഗത്തില്‍ പോകുന്നതുകൊണ്ട്‌ ഐസ്‌ നൗക കൈകാര്യം ചെയ്യാന്‍ പ്രത്യേകസാമര്‍ഥ്യം ആവശ്യമാണ്‌. ആദ്യത്തെ ഐസ്‌ യാട്ട്‌ ക്ലബ്‌ യു.എസ്സില്‍ 1861-ല്‍ സ്ഥാപിതമായി. കാനഡ, നോര്‍വേ, സ്വീഡന്‍, ഹോളണ്ട്‌, ഫിന്‍ലന്‍ഡ്‌ എന്നിവിടങ്ങളിലും ഐസ്‌ യൊട്ടിങ്ങിന്‌ പ്രചാരമുണ്ട്‌. ബ്രിട്ടീഷ്‌ദ്വീപുകളില്‍ ഈ വിനോദത്തിന്‌ അത്രപ്രചാരമില്ല. എസ്‌ത്‌ വെയിറ്റ്‌ വാട്ടറിലും വിന്റര്‍മെയര്‍ റൈഡാന്‍ തടാകങ്ങളിലും ചെറിയ തോതില്‍ ഐസ്‌ യൊട്ടിങ്‌ നടത്തിവരുന്നുണ്ട്‌.
ആധുനികകാലത്ത്‌ ന്യൂയോര്‍ക്ക്‌ തീരങ്ങളില്‍ അഞ്ചു മീ. നീളമുള്ള യൊട്ടിങ്‌ ബോട്ടുകള്‍ "സ്‌കൂട്ടര്‍' എന്ന പേരില്‍ പ്രചാരത്തിലുണ്ട്‌. മണിക്കുറിന്‌ 50 കി.മീ. വരെ വേഗതയാണ്‌ ഇവയ്‌ക്കുള്ളത്‌.
