This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
അയ്ഹോള്‍ശാസനം
സര്‍വ്വവിജ്ഞാനകോശം സംരംഭത്തില്‍ നിന്ന്
അയ്ഹോള്‍ശാസനം
ചാലൂക്യ രാജവംശപ്രശസ്തിപരമായ ഒരു ശിലാശാസനം. ഇതില്‍ ആലേഖനം ചെയ്തിരിക്കുന്ന പദ്യങ്ങള്‍ രചിച്ചത് രവികീര്‍ത്തി എന്ന ജൈനകവിയാണ്. എ.ഡി. 634-ല്‍ വിരചിതമായ ഈ ശാസനത്തില്‍ ബദാമിയിലെ (ആധുനിക ബിജാപ്പൂര്‍) ചാലൂക്യരാജാക്കന്മാരുടെ ഉദ്ഭവം മുതല്‍ക്കുള്ള നൂറു വര്‍ഷത്തെ ചരിത്രം പ്രതിപാദിതമായിരിക്കുന്നു. ചാലൂക്യവംശസ്ഥാപകനായ ജയസിംഹന്‍, പുത്രനായ രണരാഗന്‍, അദ്ദേഹത്തിന്റെ പുത്രനായ പുലികേശന്‍ I എന്നിവരുടെ ചരിത്രം പ്രതിപാദിച്ച ശേഷം കീര്‍ത്തിവര്‍മന്‍ I-ന്റെ വിദേശീയാക്രമണങ്ങളെപ്പറ്റിയും ഇതില്‍ സൂചിപ്പിക്കുന്നുണ്ട്. അദ്ദേഹത്തിന്റെ സഹോദരനായ മംഗളേശന്റെ യുദ്ധവിജയങ്ങളെക്കുറിച്ചും ഈ ശാസനത്തില്‍നിന്നു ഗ്രഹിക്കാം. കീര്‍ത്തിവര്‍മന്‍ I-ന്റെ പുത്രനായ പുലികേശന്‍ II-ഉം മംഗളേശനും തമ്മിലുണ്ടായ യുദ്ധങ്ങളും മംഗളേശനെ വധിച്ചശേഷം പുലികേശന്‍ II ഭരണാധികാരിയായിത്തീര്‍ന്ന സാഹചര്യങ്ങളും ഈ ശാസനത്തില്‍ വിവരിക്കപ്പെട്ടിരിക്കുന്നു. തെക്കേ ഇന്ത്യയിലെ അനേകം രാജാക്കന്മാരെ കീഴടക്കിയശേഷം ഹര്‍ഷനുമായുള്ള യുദ്ധത്തില്‍ അദ്ദേഹത്തെയും പുലികേശന്‍ II തോല്പിച്ച സംഭവത്തിന്റെ വിവരങ്ങളും അയ്ഹോള്‍ ശാസനത്തില്‍ അടങ്ങിയിരിക്കുന്നു. പുലികേശന്‍ II-ന്റെ ഭരണകാലത്തെ സംഭവങ്ങള്‍ മനസ്സിലാക്കുന്നതിന് അയ്ഹോള്‍ ശാസനം (ബിജാപ്പൂര്‍) വളരെ സഹായകരമാണ്. നോ: പുലികേശന്‍ II
