This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ചാപ്പുതാളം
സര്‍വ്വവിജ്ഞാനകോശം സംരംഭത്തില്‍ നിന്ന്
ചാപ്പുതാളം
ദക്ഷിണേന്ത്യന്‍ സംഗീതത്തിലെ ഒരു താളം. സശബ്ദക്രിയ കൊണ്ടുമാത്രം താളം പിടിക്കുന്നതാണിതിന്റെ രീതി. രണ്ട് അടി മാത്രമാണ് ഇതിന്റെ ക്രിയ.
ഇതു പ്രധാനമായും മൂന്നുതരത്തിലുണ്ട്. ഒന്ന്-മിശ്രചാപ്പ്: ഒരു ആവര്‍ത്തനത്തില്‍ 7 (3+4) അക്ഷരകാലമുള്ളത്. അക്ഷരകാലത്തിലുള്ള സാമ്യംകൊണ്ട് ഇതിനെ ത്രിപുടചാപ്പ് എന്നും പറയാറുണ്ട്.
രണ്ട്-ഖണ്ഡചാപ്പ് : 5 (2+3) അക്ഷരകാലം.
മൂന്ന്-തിശ്രചാപ്പ് : 3 (1+2) അക്ഷരകാലം. രൂപകത്തിനുള്ളതുപോലെ തന്നെയുള്ള അക്ഷരയിടയോടുകൂടി താളം പിടിക്കുന്നതുകൊണ്ട് ഇതിനെ രൂപകചാപ്പ് എന്നും വിളിക്കാറുണ്ട്.
പല്ലവികളില്‍ അപൂര്‍വമായി ഉപയോഗിക്കുന്ന സങ്കീര്‍ണചാപ്പ് എന്നൊരു വിഭാഗംകൂടി ഇതിനുണ്ട്. അതില്‍ 9 (4+5) അക്ഷരകാലമാണുള്ളത്.
ചാപ്പ് എന്നു മാത്രമാണ് സൂചിപ്പിച്ചിട്ടുള്ളതെങ്കില്‍ അത് മിശ്രചാപ്പ് ആണെന്നര്‍ഥം. മിശ്രചാപ്പിലും ഖണ്ഡചാപ്പിലും ത്യാഗരാജസ്വാമികള്‍ നിരവധി രചനകള്‍ നടത്തിയിട്ടുണ്ട്. ചാപ്പുതാളത്തിന്റെ ശക്തിസൗന്ദര്യങ്ങള്‍ ശ്യാമാശാസ്ത്രിയുടെ രചനകളിലാണ് ഏറെയുള്ളത്.
