This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ചാട്ടപ്പുഴു രോഗം
സര്‍വ്വവിജ്ഞാനകോശം സംരംഭത്തില്‍ നിന്ന്
ചാട്ടപ്പുഴു രോഗം
Whip worm disease
ഒരു വിര രോഗം. നെമറ്റോഡ ജന്തു വിഭാഗത്തില്‍പ്പെട്ട ട്രൈക്കിയൂറിസ് ട്രൈക്കിയുറ (Trichiuris Trichuira) എന്ന പരജീവിയാണ് ഹേതു. ഇതിന് ചാട്ടവാറിന്റെ ആകൃതിയുള്ളതുകൊണ്ടാണ് ചാട്ടപ്പുഴു എന്ന പേരില്‍ അറിയപ്പെടുന്നത്. കുട്ടികളിലാണ് ചാട്ടപ്പുഴു രോഗം അധികവും കാണപ്പെടുന്നത്. ഈ രോഗം ലോകമെമ്പാടും കാണപ്പെടാറുണ്ടെങ്കിലും ഉഷ്ണമേഖലാ പ്രദേശങ്ങളിലാണ് കൂടുതലായുള്ളത്. സീക്കം, വന്‍കുടല്‍, അപ്പന്‍ഡിക്സ് എന്നിവയ്ക്കുള്ളിലെ ശ്ലേഷ്മസ്തരത്തിലാണ് ഈ വിരകള്‍ മുഖ്യമായും കഴിഞ്ഞുകൂടുന്നത്.
ചെറിയ തോതിലുള്ള സംക്രമണം ലക്ഷണ രഹിതമായിരിക്കും. ഇസ്നോഫിലിയ, വിശപ്പില്ലായ്മ, വയറുവേദന തുടങ്ങിയ പ്രാരംഭലക്ഷണങ്ങള്‍ ചിലപ്പോള്‍ ഉണ്ടായേക്കാം. സംക്രമണം തീവ്രമാകുമ്പോള്‍ കുടല്‍വീക്കം, അതിസാരം, വയറിളക്കം, മലബന്ധം, അപ്പന്‍ഡിസൈറ്റിസ്, വിളര്‍ച്ച തുടങ്ങിയ അസുഖങ്ങള്‍ ഉണ്ടാകാന്‍ സാധ്യതയുണ്ട്. പോഷണക്കുറവുള്ള കുട്ടികളില്‍ ഈ വിരകള്‍ തീവ്രമായ രോഗലക്ഷണങ്ങള്‍ ഉണ്ടാക്കുന്നു. രോഗിയുടെ മലം പരിശോധിച്ച് മുട്ടയോ വിരയോ കണ്ടെത്തിയാണ് രോഗനിര്‍ണയം നടത്തുന്നത്. രോഗനിവാരണത്തിന് ഫലപ്രദമായ ചികിത്സയുണ്ടെങ്കിലും രോഗപ്രതിരോധമാണ് ഉത്തമം. ആരോഗ്യ സംരക്ഷണപ്രവര്‍ത്തനങ്ങള്‍ കാര്യക്ഷമമാക്കുകയും ശുചിത്വം പാലിക്കുകയും, സാനിട്ടറി കക്കൂസ് ഉപയോഗിക്കുകയും ചെയ്യുകയാണെങ്കില്‍ ഈ രോഗത്തില്‍ നിന്ന് രക്ഷനേടാവുന്നതാണ്.
