This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
അബ്ദുല്‍ ബഖി
സര്‍വ്വവിജ്ഞാനകോശം സംരംഭത്തില്‍ നിന്ന്
അബ്ദുല്‍ ബഖി
മുഗള്‍ഭരണകാലത്തു ജീവിച്ചിരുന്ന ചരിത്രകാരന്‍. പൂര്‍ണമായ പേര് മുഹമ്മദ് അബ്ദുല്‍ ബഖി നിഹാവന്തി എന്നാണ്. അക്ബറിന്റെയും (ഭ.കാ. 1556-1605) ജഹാംഗീറിന്റെയും (ഭ.കാ. 1605-1627) ഭരണകാലങ്ങളിലാണ് ഇദ്ദേഹത്തിന്റെ ജീവിതം. അബുല്‍ ഫസ്ല്‍, ഫൈസി, ബദൌനി എന്നീ മുഗള്‍ ചരിത്രകാരന്മാരുടെ കൂട്ടത്തില്‍ അബ്ദുല്‍ ബഖിയെയും ഉള്‍പ്പെടുത്താം. അബ്ദുല്‍ റഹിം ഖാന്‍-ഇ-ഖാനാന്റെ (1556-1627) ജീവിതവും പ്രവര്‍ത്തനവും വിവരിച്ചുകൊണ്ടുള്ള മാസിരി റഹീമി എന്ന പേര്‍ഷ്യന്‍ ഗ്രന്ഥത്തിന്റെ കര്‍ത്താവാണ് അബ്ദുല്‍ ബഖി. അദ്ദേഹത്തിന്റെ സംരക്ഷണത്തിലാണ് അബ്ദുല്‍ ബഖി ജീവിച്ചിരുന്നത്. ഗുജറാത്ത്, സിന്ധ്, ഡെക്കാണ്‍ എന്നിവിടങ്ങളില്‍ അബ്ദുല്‍ റഹിമിന്റെ നേതൃത്വത്തില്‍ നടത്തപ്പെട്ട സൈനിക പര്യടനങ്ങളെക്കുറിച്ച് വിശദവിവരങ്ങള്‍ നല്കുന്നു എന്നതാണ് ഈ ഗ്രന്ഥത്തിന്റെ പ്രാധാന്യം. തന്നെപ്പോലെ അബ്ദുല്‍ റഹിം ഖാന്‍-ഇ-ഖാനാന്റെ സംരക്ഷണത്തില്‍ കഴിഞ്ഞുകൂടിയ മുപ്പതു പേര്‍ഷ്യന്‍ സാഹിത്യകാരന്മാരുടെ ജീവചരിത്രക്കുറിപ്പുകളും അവരുടെ സാഹിത്യമാതൃകകളും ഈ ഗ്രന്ഥത്തില്‍ കാണാം. മുഗള്‍കാലത്തിനു മുമ്പുള്ള ചില ചരിത്രസംഭവങ്ങളെക്കുറിച്ചും അബ്ദുല്‍ ബഖി തന്റെ ചരിത്രഗ്രന്ഥത്തില്‍ പ്രതിപാദിക്കുന്നുണ്ട്.
(പ്രൊഫ. കെ. കുഞ്ഞിപ്പക്കി)
