This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ജാല്‍റാ
സര്‍വ്വവിജ്ഞാനകോശം സംരംഭത്തില്‍ നിന്ന്
ജാല്‍റാ
ഒരു താളവാദ്യം. ഒരു തരം കൈത്താളമാണ് ഇത്. പ്രത്യേക ആകൃതിയിലും സാന്ദ്രതയിലും ഉള്ള രണ്ട് ലോഹത്തുണ്ടുകളാണ് ജാല്‍റാ. പിച്ചളയോ വെള്ളോടോ ജാല്‍റാ നിര്‍മിക്കാനുപയോഗിക്കുന്നു. ഇന്ത്യ മുഴുവനും ഈ വാദ്യം പ്രചാരത്തിലുണ്ട്. സിന്ധു നദീതട ഉത്ഖനനങ്ങളില്‍ നിന്നും ഇത്തരം അനേകം താളത്തകിടുകള്‍ കണ്ടെടുക്കുകയുണ്ടായി.
ലോഹത്തുണ്ടുകള്‍ ചേര്‍ത്ത് തട്ടുമ്പോള്‍ ഉണ്ടാകുന്ന നാദം കേള്‍ക്കാന്‍ ഇമ്പമുള്ളതാണ്. ഭജനയിലും കഥാകാലക്ഷേപത്തിലും ഈ വാദ്യം ഉപയോഗിക്കുന്നു. നല്ല നാദമുള്ള ജാല്‍റാകള്‍ നിര്‍മിക്കുന്നത് പണ്ഡരീപുരത്താണ്. നാഗപട്ടണത്തിലെ ഗോപാലയ്യര്‍ ഈ താളവാദ്യം വായിക്കുന്നതില്‍ സമര്‍ഥനായിരുന്നു. പല ദേശങ്ങളിലും ജാല്‍റായുടെ വലുപ്പം പല തരത്തിലാണ്. 5 സെ.മീ. വ്യാസം മുതല്‍ 30 സെ.മീ. വ്യാസം വരെയുള്ളവ കാണുന്നുണ്ട്. താളത്തിനുപയോഗിക്കുന്ന ഈ ലോഹത്തകിടുകളുടെ മധ്യം കുഴിഞ്ഞാണിരിക്കുന്നത്. ജാല്‍റാ, ഝല്ലാരി, കര്‍താല്‍, തലി, താലം (താളം), ഇലത്താളം, കുഴിത്താളം എന്നിവയാണ് ചെറിയ വലുപ്പത്തിലുള്ളവ; കുറേക്കൂടി വലുപ്പത്തിലുള്ളവ ഝാന്‍ജ്, ബ്രഹ്മതാളം, ബോര്‍താള്‍ എന്നിവയാണ്. ക്ഷേത്രങ്ങളിലും വീഥികളിലൂടെ നടത്തുന്ന ഭജനകളിലും ചില ക്ഷേത്രങ്ങളിലെ പുറത്തെഴുന്നള്ളിപ്പിനും ജാല്‍റാ ഉപയോഗിക്കുന്നുണ്ട്. ശബരിമല മണ്ഡലക്കാലത്തെ ഭജനയ്ക്ക് ജാല്‍റാ സര്‍വസാധാരണമായി ഉപയോഗിക്കാറുണ്ട്.
(പ്രൊഫ. എം.കെ. മോഹനചന്ദ്രന്‍ നായര്‍)
