This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ജന കോണ്‍ഗ്രസ്
സര്‍വ്വവിജ്ഞാനകോശം സംരംഭത്തില്‍ നിന്ന്
ജന കോണ്‍ഗ്രസ്
ഇന്ത്യയിലെ ചില സംസ്ഥാനങ്ങളില്‍ നിലനിന്നിരുന്ന പ്രാദേശിക രാഷ്ട്രീയപാര്‍ട്ടി. ഇന്ത്യന്‍ നാഷണല്‍ കോണ്‍ഗ്രസ്സില്‍ പ്രവര്‍ത്തിച്ചിരുന്ന അസംതൃപ്തരായ ഒരു വിഭാഗമാണ് ഇതു രൂപവത്കരിച്ചത്. ഓരോ സംസ്ഥാനത്തെയും ജനകോണ്‍ഗ്രസ് സ്വതന്ത്രമായി നിലനിന്നവയായിരുന്നു.
1957 ഒ.-ല്‍ ബിഹാറില്‍ രൂപവത്കൃതമായ ജന കോണ്‍ഗ്രസ് എന്ന കക്ഷി 1959 ഡി.-ല്‍ സ്വതന്ത്രാപാര്‍ട്ടിയില്‍ ലയിച്ചു. പിന്നീട് ഒറീസയിലും മധ്യപ്രദേശിലും 1966-ല്‍ ജന കോണ്‍ഗ്രസ് എന്ന പേരില്‍ പാര്‍ട്ടിയുണ്ടായി. ജന കോണ്‍ഗ്രസ് എന്ന ഒരു അഖിലേന്ത്യാപാര്‍ട്ടി രൂപവത്കരിക്കുവാന്‍ 1966 ഡി. 6, 7 തീയതികളില്‍ ഡല്‍ഹിയില്‍ ആചാര്യ കൃപലാനിയുടെ നേതൃത്വത്തില്‍ ചേര്‍ന്ന യോഗം തീരുമാനിച്ചു. ഗാന്ധിജിയുടെ ആദര്‍ശങ്ങളില്‍ അധിഷ്ഠിതമായ നയപരിപാടികളുടെ അടിസ്ഥാനത്തില്‍ പാര്‍ട്ടി പ്രവര്‍ത്തിക്കണമെന്നും ഇതിന്റെ ഔദ്യോഗിക രൂപവത്കരണം 1967-ലെ പൊതു തിരഞ്ഞെടുപ്പിനുശേഷം മതിയെന്നും നിശ്ചയിച്ചു. 1967-ല്‍ ഉത്തര്‍പ്രദേശിലും മഹാരാഷ്ട്രയിലും ആന്ധ്രയിലും ജന കോണ്‍ഗ്രസ് രൂപവത്കരിച്ചു. എന്നാല്‍ മധ്യപ്രദേശിലെയും മഹാരാഷ്ട്രയിലെയും ജന കോണ്‍ഗ്രസ് 1967 ജൂണില്‍ ഭാരതീയ ക്രാന്തിദളില്‍ ലയിച്ചു; ഉത്തര്‍പ്രദേശിലേത് നവംബറിലും. ആന്ധ്രയിലും അസമിലും ജന കോണ്‍ഗ്രസ് തുടര്‍ന്നു ദുര്‍ബലമായി. 1971-ല്‍ ഒറീസയിലെ ഒരു വിഭാഗം ജന കോണ്‍ഗ്രസ്സുകാര്‍ ഇന്ത്യന്‍ നാഷണല്‍ കോണ്‍ഗ്രസ്സില്‍ ചേര്‍ന്നു. അവശേഷിച്ചവര്‍ 1973-ല്‍ ബംഗ്ലാ കോണ്‍ഗ്രസ്സുമായി ചേര്‍ന്ന് 'ഭാരതീയ ജാതീയ മഹാസംഘ' (ഇന്ത്യന്‍ പീപ്പിള്‍സ് ഫെഡറേഷന്‍) എന്ന പുതിയ പാര്‍ട്ടി രൂപീകരിച്ചു.
