This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ജ
സര്‍വ്വവിജ്ഞാനകോശം സംരംഭത്തില്‍ നിന്ന്
ജ
മലയാളം അക്ഷരമാലയിലെ എട്ടാമത്തെ വ്യഞ്ജനം. മിക്ക ഭാരതീയ ഭാഷകളിലും എട്ടാമത്തെ വ്യഞ്ജനം ഇതുതന്നെ. എന്നാല്‍ ഇത് ദ്രാവിഡ ഭാഷാകുടുംബത്തിനു സ്വന്തമല്ല. സംസ്കൃതത്തില്‍ നിന്നു മലയാളം സ്വീകരിച്ചതാണിത്. ഉച്ചാരണസൗകര്യത്തിനായി വ്യഞ്ജനത്തോട് 'അ' എന്ന സ്വരം ചേര്‍ത്ത രൂപമാണ് 'ജ' (ജ്+അ = ജ). മറ്റു സ്വരങ്ങള്‍ ചേരുമ്പോള്‍ ജാ, ജി, ജീ, ജു, ജൂ, ജൃ, ജെ, ജേ, ജൈ, ജൊ, ജോ, ജൌ എന്നിങ്ങനെയാണ് രൂപങ്ങള്‍.
'ച'വര്‍ഗത്തിലെ മൃദുവായ 'ജ' താലവ്യവും നാദിയായ അല്പപ്രാണവും കൂടിയാണ്. സംസ്കൃതത്തിലും മറ്റു ചില ഭാഷകളിലും നിന്നു മലയാളം കടംകൊണ്ട പദങ്ങളിലാണ് മുഖ്യമായും ഇതിന്റെ പ്രയോഗം. സംസ്കൃതത്തിലെ മൃദുവായ 'ജ' തദ്ഭവങ്ങളില്‍ 'ച'കാരമായോ 'യ'കാരമായോ 'ശ'കാരമായോ മാറാറുണ്ട്.
ഉദാ. ജലം - ചലം
അജന്‍ - അയന്‍
പൂജാരി - പൂശാരി
പദാദിയിലെ കൂട്ടക്ഷരത്തിന്റെ ആദ്യത്തെ ഘടകമായി വരുമ്പോള്‍ ഇത് 'ക'കാരമായി മാറുകയോ ലോപിക്കുകയോ ചെയ്യുന്നതായും കാണുന്നുണ്ട്.
ഉദാ. ജ്യേഷ്ഠ - കേട്ട (ജ്-ക്)
ജ്യേഷ്ഠന്‍ - ഏട്ടന്‍ (ജകാരം ലോപിക്കുന്നു)
ജ്ഞാനം - ഞാനം (ജകാരം ലോപിക്കുന്നു)
'ജ'കാരം ചേര്‍ന്നുള്ള കൂട്ടക്ഷരങ്ങള്‍ ഇവയാണ്: ജ്ജ, ജ്ഝ, ജ്ഞ, ജ്മ, ജ്യ, ജ്ര, ജ്വ, ജ്ജ്യ, ജ്ജ്വ, ജ്ഝ്യ, ഗ്ജ്യ, ഞ്ജ, ഡ്ജ, ബ്ജ, മ്ജ, ര്‍ജ, ഴ്ജ, ബ്ജ്യ, മ്ജ്ഞ, മ്ജ്വ, ര്‍ജ്ജ, ര്‍ജ്ഝ, ര്‍ജ്വ, ര്‍ജ്ജ്യ. ഇവയില്‍ പദാദിയില്‍ വരുന്നവ താഴെപ്പറയുന്നവയാണ്.
ജ്ഞ - ജ്ഞാനം
ജ്മ - ജ്മായത്തു
ജ്യ - ജ്യാമിതി
ജ്ര - ജ്രയസ്സ്
ജ്വ - ജ്വലനം
അനുനാസികത്തെത്തുടര്‍ന്നുവരുന്ന 'ജകാരം' ഉച്ചാരണത്തില്‍ പലപ്പോഴും അനുനാസികമായി മാറിക്കാണാറുണ്ട്. ഉദാ. വ്യഞ്ജനം-വ്യഞ്ഞനം. ഉച്ചാരണപരമായ മറ്റൊരു വസ്തുത 'ജ' കാരത്തോടു ചേര്‍ന്നുവരുന്ന 'അ' കാരം 'എ'കാരമാകും എന്നതാണ്. ഉദാ. ജലം-ജെലം, ജന്മി, ജെന്മി.
