This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
അഞ്ജന
സര്‍വ്വവിജ്ഞാനകോശം സംരംഭത്തില്‍ നിന്ന്
അഞ്ജ
ഹനുമാന്റെ മാതാവ്. ഇവര്‍ കുഞ്ജരന്‍ എന്ന വാനരന്റെ പുത്രിയും കേസരിയുടെ പത്നിയും ആയിരുന്നു. അഞ്ജന ഗൌതമന്റെ പുത്രിയാണെന്നും മതഭേദമുണ്ട്. ശിവനും പാര്‍വതിയും വാനരരൂപികളായി ലീലാവിലാസങ്ങളിലേര്‍പ്പെട്ടു നടക്കുമ്പോള്‍ പാര്‍വതി ഗര്‍ഭിണിയായിത്തീര്‍ന്നെന്നും വാനരശിശു ജനിക്കുമെന്ന അപമാനത്തില്‍നിന്ന് തന്നെ മുക്തയാക്കണമെന്ന് അപേക്ഷിച്ചതിന്റെ ഫലമായി ആ ഗര്‍ഭത്തെ ശിവന്‍ വായുദേവനെ ഏല്പിച്ചു എന്നും, വായു അത്, സന്താനലാഭത്തിനുവേണ്ടി തപസ്സനുഷ്ഠിച്ചു കഴിയുന്ന അഞ്ജനയുടെ ഗര്‍ഭപാത്രത്തില്‍ നിക്ഷേപിച്ചു എന്നും ആ ശിശുവാണ് ഹനുമാനായി പിറന്നതെന്നും വാല്മീകിരാമായണത്തില്‍ പരാമര്‍ശമുണ്ട് (iv 68; 8). അഞ്ജനയുടെ പുത്രനായതുകൊണ്ട് ഹനുമാന് ആഞ്ജനേയന്‍ എന്നും പേരുണ്ടായി. അഞ്ജന പൂര്‍വജന്‍മത്തില്‍ പുഞ്ജികസ്ഥലി എന്ന ദേവസ്ത്രീയായിരുന്നു. ഏതോ ശാപം നിമിത്തമാണ് അവര്‍ വാനരി ആയതെന്നും ഹനുമാനെ പ്രസവിച്ച് ദിവ്യത്വം നേടിയതോടെ ശാപമോക്ഷം ലഭിച്ചുവെന്നും പുരാണങ്ങളില്‍ പരാമര്‍ശമുണ്ട്.
