This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഗ(അക്ഷരം)
സര്‍വ്വവിജ്ഞാനകോശം സംരംഭത്തില്‍ നിന്ന്
ഗ(അക്ഷരം)
മലയാള അക്ഷരമാലയിലെ മൂന്നാമത്തെ വ്യഞ്ജനം. ഇത് 'ക' വര്‍ഗത്തിലെ മൃദുവും, നാദിയായ അല്പപ്രാണവും കണ്ഠ്യവും ആകുന്നു. ('അകുഹ വിസര്‍ജനീയാനാം കണ്ഠഃ' എന്ന് അഷ്ടാധ്യായി). 'ഗ്' എന്നതിനോട് 'അ'കാരം ചേര്‍ന്ന് ലിപിയും ഉച്ചാരണവും (ഗ്+അ=ഗ) ഉണ്ടാകുന്നു.
ഖരോച്ചാരണത്തില്‍ കണ്ഠരന്ധ്രം തുറക്കുന്നു. 'ഗ' എന്ന മൃദുവിന്റെ ഉച്ചാരണത്തിലാകട്ടെ, കണ്ഠരന്ധ്രം ചുരുങ്ങുന്നു. സംസ്കൃതത്തില്‍നിന്നാണ് മറ്റു ഭാഷകള്‍ ഈ വ്യഞ്ജനം സ്വീകരിച്ചത്. തെലുഗു, കന്നഡ തുടങ്ങിയ ദക്ഷിണേന്ത്യന്‍ ഭാഷകളിലും ഹിന്ദി, കശ്മീരി, പഞ്ചാബി, ഗുജറാത്തി, അസമിയ, ബംഗാളി, ഉറുദു, ഒഡിയ എന്നീ ഉത്തരേന്ത്യന്‍ ഭാഷകളിലും ഈ അക്ഷരമുണ്ട്. ബ്രാഹ്മിയിലും 'ഗ' ഉണ്ട്. സിംഹളം, ബര്‍മീസ് തുടങ്ങിയ വിദേശഭാഷകളിലും 'ഗ' കാരം കാണാം. എന്നാല്‍ 'ഗ'യും 'ഗ' ചേര്‍ന്ന് സംയുക്താക്ഷരങ്ങളും ദ്രാവിഡഭാഷാപദങ്ങളില്‍ സാധാരണയായി കാണുന്നില്ല. മലയാളത്തില്‍ എഴുതുന്നത് 'ഗ' എന്നാണെങ്കിലും ഉച്ചരിക്കുമ്പോള്‍ 'എ'കാരച്ഛായ വരുന്നു. ഗന്ധം-ഗെന്ധം, ഗണപതി-ഗെണപതി. ഇങ്ങനെ 'അ'കാരം ദുഷിച്ച് 'എ'കാരച്ഛായയില്‍ വരുന്നതിന് 'താലവ്യാകാരം' എന്നു പറയാം.
സംഗീതശാസ്ത്രത്തില്‍ സപ്തസ്വരത്തിലെ 'ഗാന്ധാര'ത്തെയും വൃത്തശാസ്ത്രത്തില്‍ 'ഗുരു'വിനെയും സൂചിപ്പിക്കുന്ന ചുരുക്കെഴുത്താണ് 'ഗ'കാരം.
