This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam

സര്‍വ്വവിജ്ഞാനകോശം സംരംഭത്തില്‍ നിന്ന്

ഗതി (സംഗീതം)

താളത്തിന്റെ അക്ഷരകാലയളവില്‍ സ്വരങ്ങളെയോ മാത്ര അല്ലെങ്കില്‍ തത്തക്കാര അക്ഷരങ്ങളെയോ ക്രമപ്പെടുത്തിയിരിക്കുന്ന രീതി. ഉദാ. ചതുരശ്ര ജാതിത്രിപുട എന്ന ആദിതാളത്തിന് 8 അക്ഷരകാലമാണുള്ളത്. പാടുമ്പോഴും മൃദംഗം മുതലായ താളവാദ്യങ്ങള്‍ വായിക്കുമ്പോഴും താളത്തിലെ ഒരക്ഷരകാലം മുതല്‍ അടുത്ത അക്ഷരകാലം വരെ ഒന്നാം കാലത്തില്‍ ഒന്നും രണ്ടാം കാലത്തില്‍ രണ്ടും മൂന്നാം കാലത്തില്‍ നാലും എന്ന ക്രമത്തിലാണ് സാധാരണയായി സ്വരങ്ങളോ മാത്രകളോ വരുന്നത്. അങ്ങനെ മേല്പറഞ്ഞ 8 അക്ഷരമുള്ള ആദിതാളത്തിന് അക്ഷരകാലങ്ങള്‍ക്ക് 4 എന്ന കണക്കിന് സ്വരങ്ങളോ ചൊല്ലുകളോ യഥാക്രമം പാടുമ്പോള്‍ 8x4=32 എന്ന സംഖ്യ (32 മാത്ര) കിട്ടുന്നു. ഇങ്ങനെ അക്ഷരകാലങ്ങള്‍ക്ക് 4 എന്ന ക്രമത്തില്‍ പാടുകയും താളവാദ്യങ്ങള്‍ വായിക്കുകയും ചെയ്യുന്നതിനെ ചതുരശ്രഗതി എന്നാണ് പറയുന്നത്. ഗതികള്‍ അഞ്ചുവിധമാണ് 1. ത്രിശ്രിഗതി: ഇതില്‍ താളത്തിലെ അക്ഷരകാലങ്ങളെ മുമ്മൂന്നു മാത്രകളായി വിഭജിച്ചിരിക്കുന്ന ആദിതാളത്തിന് 8x3=24 മാത്രകളുണ്ടാകുന്നു. (2) ചതുരശ്രഗതി: നന്നാലു മാത്രകളായി ഇതില്‍ വിഭജിച്ചിരിക്കുന്നു. ആകെ 8x4=32. (3) ഖണ്ഡഗതി: ഇതില്‍ അയ്യഞ്ചു മാത്രകളായി തിരിച്ചിരിക്കുന്നു. മൊത്തം 8x5=40 (4) മിശ്രഗതി: ഏഴേഴായി ഇതില്‍ വിഭജിച്ചിരിക്കുന്നു. ആകെ 8x7=56. (5) സങ്കീര്‍ണഗതി: ഇതില്‍ ഒമ്പത് ഒമ്പത് എന്ന ക്രമത്തില്‍ തിരിച്ചിരിക്കുന്നു. മൊത്തം 8x9=72.

ഇങ്ങനെ 35 താളങ്ങളിലും ഗതിഭേദം വരുന്നതുകൊണ്ടാണ് 175 താളങ്ങള്‍ ഉണ്ടാകുന്നത്. 35x5=175. ജാതിഭേദം താളത്തിന്റെ ലഘുവിനെ മാത്രമേ ബാധിക്കുകയുള്ളൂ. ഗതിഭേദം താളത്തിന്റെ എല്ലാ അംശങ്ങളെയും ബാധിക്കുന്നു. സാധാരണയായി കേള്‍ക്കാറുള്ള മിക്ക ഗാനങ്ങളും ചതുരശ്രഗതിയിലുള്ളതാണ്.

(കലഞ്ഞൂര്‍ റ്റി.ആര്‍. ചന്ദ്രശേഖരന്‍)