This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കൃഷ്ണീയം
സര്‍വ്വവിജ്ഞാനകോശം സംരംഭത്തില്‍ നിന്ന്
കൃഷ്ണീയം
ഒരു ജ്യോതിഷഗ്രന്ഥം. കൃഷ്ണന്‍ എന്നൊരാചാര്യനാല്‍ വിരചിതമായ ഈ ജ്യോതിഷ ഗ്രന്ഥത്തില്‍ ആകെ 32 അധ്യായങ്ങളും ഒരു പരിശിഷ്ടവും അടങ്ങിയിരിക്കുന്നു. പ്രശ്ന വിഷയത്തിലും ജാതക വിഷയത്തിലും ഒരു പ്രമാണമായി ഇതിനെ ജ്യോതിഷികള്‍ കരുതിപ്പോരുന്നു. കൃഷ്ണാചാര്യരുടെ ജന്മദേശം ഏതെന്ന് അറിയാന്‍ കഴിഞ്ഞിട്ടില്ല. ഇദ്ദേഹം ഒരു കേരളീയനാണെന്നു കരുതപ്പെടുന്നു. നഷ്ടപ്രശ്നം, മുഷ്ടിപ്രശ്നം മുതലായ പ്രശ്നങ്ങള്‍ പറയണമെങ്കില്‍ കൃഷ്ണീയത്തിന്റെ സഹായം അത്യന്താപേക്ഷിതമാണ് എന്നാണ് ദൈവജ്ഞന്മാരുടെ അഭിപ്രായം. തലക്കുളത്തു ഭട്ടതിരി, കൃഷ്ണീയത്തെ ഒരു പ്രമാണ ഗ്രന്ഥമായി കരുതിയിരുന്നു; ആ ഗ്രന്ഥത്തില്‍ നിന്നു ഭട്ടതിരി ചില ഭാഗങ്ങള്‍ ഉദ്ധരിച്ചിട്ടുമുണ്ട്. ഇതില്‍ നിന്നും കൃഷ്ണാചാര്യര്‍ തലക്കുളത്തു ഭട്ടതിരിയുടെ കാലത്തിനുമുമ്പ് (അതായത് 13-ാം നൂറ്റാണ്ടിലോ അതിനുമുമ്പോ) ജീവിച്ചിരുന്നതായി അനുമാനിക്കാം. ഉണ്ണിയച്ചീചരിതം ചമ്പുവില്‍ കൃഷ്ണീയത്തെ സ്മരിക്കുന്നതിനെ ശരിവയ്ക്കുന്നു. കൂടാതെ മൂഷികവംശ കര്‍ത്താവായ അതുലനെ ബന്ധിപ്പിച്ചു കൊണ്ട് കൃഷ്ണീയത്തിനു 11-ാം ശതകത്തില്‍ത്തന്നെ പ്രചാരമുണ്ടായിരുന്നതായും ഒരഭിപ്രായമുണ്ട്. പ്രശ്നമാര്‍ഗക്കാരനായ ഇടയ്ക്കാട്ടു നമ്പൂതിരിയും കൃഷ്ണീയത്തെ ഒരു പ്രമാണ ഗ്രന്ഥമായി സ്വീകരിച്ചിരുന്നു.
(ഡോ. എസ്. പരമേശ്വരന്‍)
