This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
അധിസിലിക ശില
സര്‍വ്വവിജ്ഞാനകോശം സംരംഭത്തില്‍ നിന്ന്
അധിസിലിക ശില
Acidic rock
ആഗ്നേയശിലയുടെ ഒരു വകഭേദം. ധാതുപരമായ ചേരുവ അടിസ്ഥാനമാക്കി ആഗ്നേയശിലകളെ അധിസിലികം (Acidic), അല്പസിലികം (Basic) എന്നിങ്ങനെ വിഭജിച്ചിരിക്കുന്നു. സിലിക്കയുടെ അളവിനെ ആശ്രയിച്ചുള്ളതായിരുന്നു ഈ വിഭജനം. 66 ശ.മാ.-ല്‍ കൂടുതല്‍ സിലിക്കാംശമുള്ളവ അധിസിലികശിലകളായി വിവക്ഷിക്കപ്പെട്ടു. സിലിക്കേറ്റ് ധാതുക്കള്‍ വിവിധ സിലിസിക് അമ്ളങ്ങളുടെ ലവണങ്ങളാണെന്ന് വിശ്വസിച്ചിരുന്ന കാലത്താണ് ഈ സംജ്ഞ പ്രചാരത്തിലായത്. അസിഡിക് (Acidic) എന്ന വിശേഷണം ആദ്യമായി നല്കിയത് കെംപ് ആയിരുന്നു. 'അസിഡൈറ്റ്സ്' (Acidites) എന്നും 'പെര്‍സിലിസിക്' (Persillic) എന്നുമുള്ള പ്രയോഗങ്ങളും പ്രചാരത്തിലുണ്ടായിരുന്നു. അനിവാര്യഘടകമെന്ന നിലയില്‍ 10 ശ.മാ.-ല്‍ കൂടുതല്‍ ക്വാര്‍ട്ട്സ് അടങ്ങിക്കാണുന്ന ശിലകളെ സൂചിപ്പിക്കുവാനാണ് 'അധിസിലികം' എന്ന പദം ഇപ്പോള്‍ ഉപയോഗിക്കുന്നത്. സിലിക്കാംശത്തിന്റെ അടിസ്ഥാനത്തിലുള്ള വിഭജനം ഈ നിര്‍വചനം അനുസരിച്ച് സാധ്യമല്ല.
അധിസിലിക ശിലയില്‍ ക്വാര്‍ട്ട്സ് കഴിഞ്ഞുള്ള പ്രമുഖഘടകം ഫെല്‍സ്പാര്‍ (Felspar) ആണ്. ഫെല്‍സ്പാറിന്റെ ഏറ്റക്കുറച്ചിലിനെ അടിസ്ഥാനമാക്കി അധിസിലികശിലകളെ ഉപഗണങ്ങളായി തരംതിരിച്ചിട്ടുണ്ട്. നോ: ആഗ്നേയശില
ഗ്രാനൈറ്റ്, റയോലൈറ്റ്, ഗ്രാനോഡയൊറൈറ്റ്, പെഗ്മറ്റൈറ്റ്, അപ്പലൈറ്റ്, ഒബ്സീഡിയന്‍, പിച്ച്സ്റ്റോണ്‍, ഡാസൈറ്റ്, ആസിഡ് ചാര്‍ണക്കൈറ്റ് എന്നിവ അധിസിലികശിലകള്‍ക്ക് ഉത്തമോദാഹരണങ്ങളാണ്. ഗ്രാനിറ്റിക് ശിലകളില്‍ സാധാരണയായി ക്വാര്‍ട്ട്സിന്റെയും ഫെല്‍സ്പാറിന്റെയും അംശങ്ങള്‍ ഏകദേശം തുല്യമായിരിക്കും; ഫെറോമഗ്നീഷ്യം ധാതുക്കളുടെ അംശം തുലോം കുറവും. ഗ്രാനോഡയൊറൈറ്റ്, ഡാസെറ്റ് എന്നിവയില്‍ ക്വാര്‍ട്ട്സിനും പ്ളാജിയോക്ളേസിനും ഒപ്പം അഭ്രവും ഒരു അനിവാര്യഘടകമാണ്. ഗ്രാനിറ്റിക് ശിലകളില്‍ അഭ്രത്തിന്റെ അംശം ഉണ്ടായിക്കൊള്ളണമെന്നില്ല. സിലിക്കാംശം തീരെ കുറവായുള്ള ഒലിവിന്‍, ഫെല്‍സ്പതോയ്ഡുകള്‍ തുടങ്ങിയ ധാതുക്കള്‍ സാധാരണയായി അധിസിലികശിലകളില്‍ കാണാറില്ല.
(എം.പി. മുരളീധരന്‍)
