This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
എലിയട്ട്‌, ജോണ്‍ (1592 - 1632)
സര്‍വ്വവിജ്ഞാനകോശം സംരംഭത്തില്‍ നിന്ന്
എലിയട്ട്‌, ജോണ്‍ (1592 - 1632)
Elliot John
ബ്രിട്ടീഷ്‌ രാജ്യതന്ത്രജ്ഞന്‍. റിച്ചാര്‍ഡ്‌ എലിയട്ടിന്റെ പുത്രനായി 1592 ഏ. 11-നു ജനിച്ചു. ഓക്‌സ്‌ഫോര്‍ഡില്‍ വിദ്യാഭ്യാസം നിര്‍വഹിച്ചു. പാര്‍ലമെന്ററി ഭരണവ്യവസ്ഥയുടെ വക്താവായിരുന്ന ഇദ്ദേഹം രാജാവായ ചാള്‍സ്‌ ക-ഉം കോമണ്‍സ്‌ സഭയും തമ്മില്‍ ആദ്യകാലങ്ങളിലുണ്ടായ സംഘട്ടനങ്ങളില്‍ പ്രധാനപങ്കുവഹിച്ചു. 1614-ല്‍ ആദ്യമായി പാര്‍ലമെന്റിലേക്ക്‌ തെരഞ്ഞെടുക്കപ്പെട്ടു. ലോര്‍ഡ്‌ അഡ്‌മിറല്‍ ആയിരുന്ന ബക്കിങ്‌ഹാം 1622-ല്‍ ഇദ്ദേഹത്തെ ഡെവോണിലെ വൈസ്‌അഡ്‌മിറല്‍ ആയി നിയമിച്ചു. 1623-ല്‍ കുപ്രസിദ്ധ കടല്‍ക്കൊള്ളക്കാരനായ ക്യാപ്‌റ്റന്‍ ജോണ്‍ നട്ടിനെ എലിയട്ട്‌ അറസ്റ്റുചെയ്‌തു. എന്നാല്‍ ജോണ്‍ നട്ട്‌ ഇദ്ദേഹത്തെ അഴിമതിയുടെ കുറ്റം ചുമത്തി അറസ്റ്റുചെയ്യിക്കുന്നതില്‍ വിജയിച്ചു. എങ്കിലും ആറുമാസത്തിനുശേഷം ബക്കിങ്‌ഹാം പ്രഭു ഇടപെട്ടതിനെത്തുടര്‍ന്ന്‌ ഇദ്ദേഹം മോചിപ്പിക്കപ്പെട്ടു.
1624-ല്‍ വീണ്ടും പാര്‍ലമെന്റിലേക്ക്‌ തെരഞ്ഞെടുക്കപ്പെട്ട എലിയട്ട്‌ ഹൗസ്‌ ഒഫ്‌ കോമണ്‍സിലെ അംഗങ്ങളുടെ പ്രസംഗസ്വാതന്ത്യ്രത്തിനുവേണ്ടി ശക്തമായി വാദിച്ചു. അന്യായമായ നികുതിചുമത്തലിനെ നിശിതമായി വിമര്‍ശിച്ചു. ബക്കിങ്‌ഹാമിന്റെ തെറ്റായ വിദേശനയവും ധൂര്‍ത്തും മനസ്സിലാക്കിയതോടെ എലിയട്ടിന്‌ അദ്ദേഹത്തിലുള്ള വിശ്വാസം നഷ്‌ടപ്പെട്ടു. 1626-ലെ പാര്‍ലമെന്റില്‍ ബെക്കിങ്‌ഹാമിനെതിരായി കുറ്റവിചാരണ (impeachment)സേംഘടിപ്പിച്ചവരില്‍ എലിയട്ടും ഉള്‍പ്പെട്ടിരുന്നു. ബക്കിങ്‌ഹാമിനെ രക്ഷിക്കുവാനായി ചാള്‍സ്‌ ക പാര്‍ലമെന്റ്‌ പിരിച്ചുവിട്ടു. 1627-ല്‍ ഇദ്ദേഹത്തെ അറസ്റ്റുചെയ്‌തെങ്കിലും ഏതാനും ദിവസങ്ങള്‍ക്കുശേഷം സ്വതന്ത്രനാക്കി. തുടര്‍ന്നുനടത്തിയ അന്വേഷണത്തിനുശേഷം വൈസ്‌ അഡ്‌മിറല്‍ സ്ഥാനത്തുനിന്ന്‌ എലിയട്ടിനെ താത്‌കാലികമായി നീക്കംചെയ്‌തു.
1628 ജനുവരിയില്‍ വിമോചിതനായ എലിയട്ട്‌ പൗരസ്വാതന്ത്യ്രത്തിനുവേണ്ടി പാര്‍ലമെന്റില്‍ നിരന്തരമായി വാദിച്ചിരുന്നു. ഇദ്ദേഹത്തിന്റെ ഉപദേശപ്രകാരമാണ്‌ "പൗരാവകാശപ്രമാണം' (Petition of Rights) ചൊള്‍സിനു സമര്‍പ്പിക്കപ്പെട്ടത്‌. ഇതില്‍ ചാള്‍സ്‌ സമ്മാനമായും കടമായും ജനങ്ങളില്‍നിന്നു പണം പിരിച്ചിരുന്നതും പാര്‍ലമെന്റിന്റെ അനുമതി കൂടാതെ നികുതി ചുമത്തിയിരുന്നതും നിയമവിധേയമല്ലെന്ന്‌ വ്യക്തമാക്കിയിരുന്നു. പാര്‍ലമെന്റിന്റെ അധികാരങ്ങള്‍ ലംഘിക്കപ്പെട്ടതായി ഇദ്ദേഹം ആരോപിച്ചു. ബ്രിട്ടീഷ്‌ ജനതയുടെ ദുരിതങ്ങള്‍ക്കു പരിഹാരം കാണുന്നതുവരെ അധികനികുതി ചുമത്തേണ്ടതില്ലെന്ന്‌ ഇദ്ദേഹം വാദിച്ചു. 1629-ല്‍ കൂടിയ പാര്‍ലമെന്റു സമ്മേളനത്തില്‍ ചാള്‍സിന്റെ മതപരമായ നയങ്ങള്‍ക്കും നിയമരഹിതമായ തീരുവയ്‌ക്കും എതിരായി മൂന്നു പ്രമേയങ്ങള്‍ ഇദ്ദേഹം തയ്യാറാക്കി. സഭ നിര്‍ത്തിവയ്‌ക്കാനുള്ള ചാള്‍സിന്റെ തന്ത്രത്തെ പരാജയപ്പെടുത്തിക്കൊണ്ട്‌ എലിയട്ട്‌ ആ പ്രമേയങ്ങള്‍ പാസ്സാക്കിയെടുത്തു. പ്രതികാരഫലമായി എലിയട്ടും മറ്റു എട്ടുപേരും അറസ്റ്റുചെയ്യപ്പെട്ടു. ലണ്ടന്‍ ടവറില്‍ തടങ്കലിലാക്കപ്പെട്ട എലിയട്ട്‌ ഇക്കാലത്ത്‌ പല ഗ്രന്ഥങ്ങളും രചിക്കുകയുണ്ടായി. പാര്‍ലമെന്ററി സ്വാതന്ത്യ്രത്തിന്റെ രക്തസാക്ഷിയായ എലിയട്ട്‌ 1632 ന. 28-നു അന്തരിച്ചു.
