This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഏവിയറി
സര്‍വ്വവിജ്ഞാനകോശം സംരംഭത്തില്‍ നിന്ന്
ഏവിയറി
Aviary
പക്ഷികളെ വളര്‍ത്തുന്നതിനും ഇണക്കുന്നതിനും അവയുടെ വര്‍ഗോത്‌പാദനം നിര്‍വഹിക്കുന്നതിനും ആയി ഉദ്ദേശിക്കപ്പെട്ടിട്ടുള്ള വലിയ കൂടുകള്‍, കെട്ടിടങ്ങള്‍, നിര്‍ദിഷ്‌ടസ്ഥലങ്ങള്‍ എന്നിവയ്‌ക്കു പൊതുവായുള്ള പേര്‌. മുറികള്‍ക്കുള്ളില്‍ അടച്ചുപൂട്ടി പക്ഷികളെ സൂക്ഷിക്കുക സാധാരണമല്ല. ഏവിയറിക്കുള്ളില്‍ പക്ഷികള്‍ക്ക്‌ ചെറുകൂടുകളിലും മറ്റും ഉള്ളതിനെക്കാള്‍ കൂടുതല്‍ സ്വാതന്ത്യ്രം ലഭ്യമാകുന്നു.
പുരാതന റോമാസാമ്രാജ്യകാലഘട്ടം മുതല്‌ക്കു തന്നെ ഏവിയറികള്‍ നിലവിലുണ്ടായിരുന്നു. വളരെ കുറച്ചു ജനാലകളുള്ളതും അടച്ചുപൂട്ടിയതുമായ ഒരു മുറിയായിരുന്നു റോമാക്കാരുടെ ഏവിയറി. ഇവ വളരെ വലുപ്പമേറിയ കൂടുകളായിരുന്നു. ഇന്നത്തെ ഏവിയറികളില്‍ പക്ഷികള്‍ക്കു ലഭിക്കുന്ന സ്വാതന്ത്യ്രം അന്നില്ലായിരുന്നു. എ.ഡി. 16-ാം ശതകത്തില്‍ മെക്‌സിക്കോയിലും ഏവിയറികള്‍ ഉണ്ടായിരുന്നതായി മെക്‌സിക്കോ കീഴടക്കിയ സ്‌പാനിഷ്‌ ചക്രവര്‍ത്തി കോര്‍ട്ടേസ്‌ രേഖപ്പെടുത്തിയിട്ടുണ്ട്‌.
കമ്പിവലകൊണ്ടു മറച്ച്‌, അതിനുള്ളില്‍ ഒരു "വിഹഗഗൃഹം' (bird house) ഉണ്ടാക്കിയിട്ടുള്ള, അതിവിസ്‌തൃതമായ സ്ഥലത്തെയാണ്‌ ആധുനിക-ഏവിയറി എന്നു വിളിക്കുന്നത്‌. ശീതകാലത്ത്‌ പക്ഷികള്‍ക്കാവശ്യമായിവരുന്ന അഭയസങ്കേതമായാണ്‌ "വിഹഗഗൃഹം' നിര്‍മിക്കുന്നത്‌. കൂടുകെട്ടുന്നതിലുള്ള പ്രത്യേകതകള്‍, ഇണയെ ആകര്‍ഷിക്കുന്ന വിവിധ രീതികള്‍ (courtship), അടയിരിക്കല്‍ തുടങ്ങി പക്ഷികളുടെ എല്ലാ പ്രത്യേകതകളെപ്പറ്റിയും സൂക്ഷ്‌മമായി പഠിക്കുന്നതിന്‌ വലിയ ഏവിയറികള്‍ സഹായകമാകുന്നു.
ഏറ്റവും വലിയ ആധുനിക-ഏവിയറികളില്‍ ഒന്നാണ്‌ സെന്റ്‌ ലൂയി സുവോളജിക്കല്‍ ഗാര്‍ഡനിലുള്ളത്‌. ന്യൂയോര്‍ക്ക്‌ സിറ്റിയിലെ സുവോളജിക്കല്‍ പാര്‍ക്കിലുള്ള "വിഹഗഗൃഹം' അതിനുള്ളിലും പുറത്തുമായി 152 കൂടുകളോടു കൂടിയതാണ്‌. ഇത്‌ പലയിനം നീര്‍പ്പക്ഷികളു(water bird)ടെയും വേനല്‍ക്കാല വസതിയുമാകുന്നു. കഴുകന്‍ (eagle and vulture), വാന്‍കോഴി (pheasant), പ്രാവുകള്‍ തുടങ്ങി വിവിധയിനം പക്ഷികള്‍ക്കോരോന്നിനും പ്രത്യേകമായ ഏവിയറുകളുമുണ്ട്‌.
