This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കുമർ, ഏണ്‍സ്റ്റ്‌ എഡ്വേഡ്‌ (1810 - 93)
സര്‍വ്വവിജ്ഞാനകോശം സംരംഭത്തില്‍ നിന്ന്
കുമർ, ഏണ്‍സ്റ്റ്‌ എഡ്വേഡ്‌ (1810 - 93)
Kummer, Ernst Eduard
അങ്കഗണിതത്തിലും ജ്യാമിതിയിലും അഗാധമായ പഠനങ്ങള്‍ നടത്തിയ ജര്‍മന്‍ ഗണിതശാസ്‌ത്രജ്ഞന്‍. ഇദ്ദേഹം 1810 ജനു. 29-നു സോറൗവില്‍ ജനിച്ചു. മതപഠനത്തിനുവേണ്ടി 1828-ല്‍ ഹാലെ (Halle)സര്‍വകലാശാലയില്‍ ചേര്‍ന്നെങ്കിലും താമസിയാതെ ഗണിതശാസ്‌ത്രപഠനത്തിലേക്കു തിരിഞ്ഞു. 1831-ല്‍ ഇദ്ദേഹം ഗണിതശാസ്‌ത്രത്തില്‍ ഡോക്‌ടറേറ്റ്‌ ബിരുദം നേടി. സോറൗവിലും ലൈപ്‌സിഗ്ഗിലുമായി ഇദ്ദേഹം പതിനൊന്നു വര്‍ഷക്കാലം അധ്യാപകനായി സേവനമനുഷ്‌ഠിച്ചു. ഇക്കാലത്ത്‌ കുമര്‍ ജര്‍മനിയിലെ ഉന്നതശീര്‍ഷരായ ഗണിതശാസ്‌ത്രജ്ഞരുമായി സമ്പര്‍ക്കം പുലര്‍ത്തിപ്പോന്നു. ഇദ്ദേഹം 1842-ല്‍ ബ്രസ്‌ലൗവില്‍ ഗണിതശാസ്‌ത്ര പ്രാഫസറായി നിയമിതനായി. 1855-ല്‍ ബെര്‍ലിന്‍ യുദ്ധകോളജില്‍ പ്രാഫസറായി ചേര്‍ന്നു.
ഫെര്‍മെയുടെ അവസാനത്തെ പ്രമേയ (Fermat's last theorem)വുമായി ബന്ധപ്പെട്ട ബീജീയസംഖ്യാഫീല്‍ ഡുകളുടെ അങ്കഗണിത മൗലിക പ്രമേയത്തിന്റെ സംസ്ഥാപനമാണ്‌ കുമറിന്റെ ഏറ്റവും മഹത്തായ സംഭാവന. അയുക്ലീഡിയ ക്ഷേത്രഗണിത (Non-Euclidean geometry)ത്തിന്റെ കണ്ടുപിടിത്തത്തിനെന്നപോലെ ഗണിതീയവും ദാര്‍ശനികവുമായ പ്രാധാന്യം ഈ സംഭാവനയ്‌ക്കും അവകാശപ്പെടാവുന്നതാണ്‌. ആദര്‍ശസംഖ്യകള്‍ എന്നൊരു പ്രതിഭാസംതന്നെ ഇദ്ദേഹം ഇതിനായി അവതരിപ്പിച്ചു. 1857-ല്‍ ഇതിന്‌ പാരിസ്‌ സയന്‍സസ്‌ അക്കാദമി സമ്മാനം നല്‌കി ഇദ്ദേഹത്തെ ബഹുമാനിക്കുകയുണ്ടായി. നാലു വിമകള്‍ (dimensions) ഉള്ള സ്‌പേസിലെ തരംഗതലം പ്രതിനിധീകരിക്കുന്ന ചതുര്‍ഘാതതലം(quartic space) ഇദ്ദേഹത്തിന്റെ ക്ഷേത്രഗണിത ഗവേഷണഫലമായി ആവിഷ്‌കൃതമായി. ഹൈപര്‍ജ്യാമിതീയ ഫലനങ്ങ(hyper geometric functions)ളുടെ സിദ്ധാന്തത്തിന്‌ കുമര്‍ മൗലികസംഭാവനകള്‍ നല്‌കിയിട്ടുണ്ട്‌. കുമറിന്റെ പഠനങ്ങള്‍ എല്ലാംതന്നെ അഗാധവും സൂക്ഷ്‌മവുമായിരുന്നു. 1893 മേയ്‌ 14-നു ബെര്‍ലിനില്‍ വച്ച്‌ ഇദ്ദേഹം നിര്യാതനായി.
