This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കുശകാശാവലംബനന്യായം
സര്‍വ്വവിജ്ഞാനകോശം സംരംഭത്തില്‍ നിന്ന്
കുശകാശാവലംബനന്യായം
ലൗകികന്യായങ്ങളില്‍ ഒന്ന്‌. കുശത്തിനുപകരം കാശപ്പുല്ലിനെ പൂജാദികാര്യങ്ങള്‍ക്ക്‌ അവലംബമാക്കുന്നതിന്‌ കുശകാശാവലംബനന്യായം എന്നു പറയുന്നു.
കാശം എന്ന വാക്കിന്‌ ആറ്റുദര്‍ഭ, കാശപ്പുല്ല്‌, പായ നെയ്യാനുപയോഗിക്കുന്ന പുല്ല്‌, കുരുവിക്കരുമ്പ്‌ എന്നീ അര്‍ഥങ്ങള്‍ നിഘണ്ടുവില്‍ കാണുന്നുണ്ട്‌. സക്കാറം സ്‌പൊണ്ടേനിയം (Saccharum spontaneum) എന്നാണ്‌ ഇതിന്റെ ശാസ്‌ത്രനാമം. കരിമ്പിന്റേതുപോലെയുള്ള തൂവെള്ളപ്പൂക്കളാണിതിനുള്ളത്‌.
കുശം എന്നതിന്‌ ദര്‍ഭപ്പുല്ല്‌ എന്നും അതേ ഇനത്തിലുള്ള മറ്റൊരിനം പുല്ലെന്നും അര്‍ഥമുണ്ട്‌. കാശത്തിന്റെ ഇലകള്‍ ദര്‍ഭപ്പുല്ലിനു പകരമായി പൂജാദികര്‍മങ്ങള്‍ക്കുപയോഗിക്കുന്നതിനെ ന്യായീകരിക്കുന്ന ഒന്നാണീന്യായം. "ദര്‍ഭാണാം സ്ഥാനേശരൈഃ പ്രസ്‌തരിതവ്യം' ദര്‍ഭകള്‍ ലഭ്യമല്ലെങ്കില്‍ പകരം ശരപ്പുല്ലുകള്‍ നിരത്താമെന്ന്‌ പ്രമാണവുമുണ്ട്‌. തത്തുല്യമായ ഒരു ചൊല്ല്‌ മലയാളത്തിലും പ്രചാരത്തിലുണ്ട്‌: "ദര്‍ഭേകുശേനായ്‌ങ്കണേ വയ്‌ക്കോലേ...' ദര്‍ഭ കിട്ടിയില്ലെങ്കില്‍ കുശ; അതില്ലെങ്കില്‍ നായ്‌ങ്കണയുടെ ഇല; അതും കിട്ടിയില്ലെങ്കില്‍ വയ്‌ക്കോല്‍ എന്നാണ്‌ ഉപയോഗക്രമം. യഥാര്‍ഥ യോഗ്യതയുള്ള ആളുടെ അഭാവത്തില്‍ കുറഞ്ഞ യോഗ്യതയുള്ള ആളെവച്ചു കാര്യം നടത്തുമ്പോള്‍ അതു കുശകാശാവലംബനന്യായമനുസരിച്ചാണെന്നു പറയാം.
(ഡോ. മാവേലിക്കര അച്യുതന്‍; സ.പ.)
