This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കുളമ്പുദീനം
സര്‍വ്വവിജ്ഞാനകോശം സംരംഭത്തില്‍ നിന്ന്
കുളമ്പുദീനം
Foot and mouth disease
ഒരു കാലിരോഗം. ഇംഗ്ലീഷിൽ "ഫുട്ട്‌ ആന്‍ഡ്‌ മൗത്ത്‌ ഡിസീസ്‌' എന്നറിയപ്പെടുന്ന ഇതിന്‌ കുളമ്പുകേട്‌ എന്ന പേരും ഉണ്ട്‌. ഫുട്ട്‌ ആന്‍ഡ്‌ മൗത്ത്‌ വൈറസുകളാണ്‌ ഈ രോഗത്തിനുകാരണം. അവ "ഒ', "എ', "സി', "സാറ്റ്‌' എന്നിങ്ങനെ വിവിധ സ്‌ട്രയിനുകളായിട്ടാണ്‌ കണ്ടുവരുന്നത്‌. അവയിൽ ഏറ്റവും മാരകമായത്‌ "സി' സ്‌ട്രയിനുകളാണ്‌.
അതിവേഗത്തിൽ പകരുന്ന ഒരു രോഗമാണ്‌ ഇത്‌. രോഗം ബാധിച്ച കാലിയുടെ ഉമിനീര്‌, പാൽ, ത്വക്ക്‌ എന്നിവ വൈറസുകളെക്കൊണ്ടു നിറഞ്ഞിരിക്കും. രോഗമുള്ള മൃഗത്തിന്റെ സമ്പർക്കത്തിൽ മറ്റു മൃഗങ്ങളിലേക്കു രോഗപ്പകർച്ചയുണ്ടാകും. അതിനു പുറമേ രോഗമുള്ള മൃഗത്തിന്റെ വിസർജ്യങ്ങള്‍, സ്രവങ്ങള്‍, പാൽ, മാംസം, തീറ്റസാധനങ്ങള്‍, കിടക്കവസ്‌തുക്കള്‍ എന്നിവവഴി പരോക്ഷമായും രോഗപ്പകർച്ചയുണ്ടാകാം.
വൈറസുകള്‍ ശരീരത്തിൽ പ്രവേശിച്ച്‌ 48 മണിക്കൂറിനുള്ളിൽ എപ്പിത്തീലിയസ്‌തരങ്ങളിൽ വളർന്നു പെരുകി രക്തത്തിലേക്കു കടന്നു രക്തചംക്രമണംവഴി ശരീരത്തിന്റെ വിവിധഭാഗങ്ങളിൽ എത്തിച്ചേരുന്നു. ശക്തിയായ പനി, തീറ്റയിൽ വിരക്തി എന്നിവ പ്രാരംഭലക്ഷണങ്ങളാണ്‌. വായിൽനിന്ന്‌ ഉമിനീര്‌ ധാരധാരയായി ഒഴുകുന്നതുകാണാം. നാക്ക്‌, മോണ, കവിള്‍ എന്നീ ഭാഗങ്ങളിൽ പൊള്ളലുകള്‍ പ്രത്യക്ഷപ്പെടുന്നു. കുളമ്പുകള്‍ക്കിടയിലുള്ള ചർമത്തിലും അകിടിലും മുലക്കാമ്പിലും പൊള്ളലുകള്‍ ഉണ്ടാകും. വിത്തുകാളകളിൽ വൃഷണസഞ്ചിയിലും പൊള്ളലുകള്‍ ഉണ്ടാകാറുണ്ട്‌. കാലുകളിലുള്ള വ്രണങ്ങള്‍ നിമിത്തം കന്നുകാലി മുടന്തിമുടന്തി നടക്കുവാന്‍ തുടങ്ങും. ചുമ, ശ്വാസംമുട്ടൽ, ന്യുമോണിയ എന്നിവയും സംജാതമാകുന്നു. പൊള്ളലുകളിൽ ബാക്‌റ്റീരിയങ്ങളുടെ ദ്വിതീയ സംക്രമണംമൂലം പഴുപ്പ്‌ ഉണ്ടാവുകയും വ്രണങ്ങള്‍ ഉണങ്ങാന്‍ താമസം നേരിടുകയും ചെയ്യുന്നു. കുളമ്പിന്റെ ഭാഗത്തുണ്ടാകുന്ന ഇത്തരം വ്രണങ്ങള്‍ നിമിത്തം കുളമ്പുതന്നെ ഇളകിപ്പോയേക്കാം. ചെറുപ്രായത്തിലുള്ള കന്നുകാലികളിലും സങ്കരവർഗം കന്നുകാലികളിലും വിദേശജനുസ്സിൽപ്പെട്ട കന്നുകാലികളിലും ഈ രോഗം മാരകമായി തീരാറുണ്ട്‌. സാധാരണഗതിയിൽ ലക്ഷണങ്ങള്‍ നാലുമുതൽ അഞ്ചുദിവസംകൊണ്ട്‌ മാറുകയും അതിനെത്തുടർന്നുള്ള അഞ്ചാറു ദിവസത്തിനകം വായിലുള്ള വ്രണങ്ങള്‍ ഉണങ്ങിത്തുടങ്ങുകയും രോഗം ഭേദമാവുകയും ചെയ്യുന്നു. രോഗവിമുക്തി നേടിയ കന്നുകാലികള്‍ ക്ഷീരോത്‌പാദനശേഷി കുറഞ്ഞവയും കാളകളും പോത്തുകളും പണിചെയ്യാന്‍ കഴിവു കുറഞ്ഞവയും ആയിത്തീരാറുണ്ട്‌.
ഒരു വൈറസ്‌ രോഗമെന്ന നിലയ്‌ക്ക്‌ ഇതിനു പ്രത്യേക ചികിത്സകള്‍ ഒന്നുംതന്നെ ഇല്ല. ബാക്‌റ്റീരിയങ്ങള്‍മൂലമുള്ള ദ്വിതീയസംക്രമണം തടയാന്‍ വായിലും നാക്കിലും ഉള്ള വ്രണങ്ങളും മറ്റും പൊട്ടാസ്യം പെർമാംഗനേറ്റ്‌, ബോറിക്‌ ആസിഡ്‌ എന്നിവയിൽ ഏതെങ്കിലും ഒന്നു കലർത്തിയ ചെറുചൂടുള്ള ലായനികൊണ്ട്‌ കഴുകി വൃത്തിയാക്കണം. അതിനെത്തുടർന്ന്‌ ബോറിക്‌ പൊടി, തേന്‍, ഗ്ലിസറിന്‍ എന്നിവ കലർത്തിയ ഒരു മിശ്രിതം ഇത്തരം വ്രണങ്ങളിൽ പുരട്ടണം. കുളമ്പിന്‌ അടുത്തുള്ള വ്രണങ്ങളെ അണുനാശിനികള്‍കൊണ്ട്‌ കഴുകി തുരിശു കലർത്തിയ ടാർ മിശ്രിതംകൊണ്ട്‌ ലേപനം ചെയ്യണം. അതല്ലെങ്കിൽ കാർബോളിക്‌ കുഴമ്പോ ബോറിക്‌ കുഴമ്പോ പൂശാവുന്നതാണ്‌. അകിടിലെ വ്രണങ്ങളും അണുനാശിനികൊണ്ട്‌ കഴുകി സള്‍ഫാനിലമൈഡ്‌ കുഴമ്പ്‌ പുരട്ടണം. കാലിലും മറ്റുമുള്ള വ്രണങ്ങളിൽ ഈച്ച മുട്ടയിടാതിരിക്കുന്നതിന്‌ വേപ്പെണ്ണ തേയ്‌ക്കുന്നതും നല്ലതാണ്‌.
രോഗം ബാധിച്ച മൃഗത്തെ മറ്റുള്ളവയിൽനിന്ന്‌ അകറ്റി പാർപ്പിക്കണം. ഒരുപറ്റം കന്നുകാലികളിൽ ഒന്നുരണ്ടെണ്ണത്തിന്‌ രോഗം ബാധിച്ചതായിക്കണ്ടാൽ അവയുടെ ഉമിനീര്‌ രോഗമില്ലാത്തവയുടെ വായിൽ തേച്ചുകൊടുത്ത്‌ രോഗപ്രതിരോധശക്തി ലഭ്യമാക്കാന്‍ സാധിക്കും. ഈ രീതി "ആഫ്‌തൈസേഷന്‍' എന്നറിയപ്പെടുന്നു. രോഗപ്രതിരോധകുത്തിവയ്‌പ്‌ പ്രചാരത്തിലുണ്ട്‌. ഇപ്പോള്‍ സാധാരണയായി ഇതിന്‌ ഉപയോഗിച്ചുവരുന്നത്‌ ടിഷ്യൂ കള്‍ച്ചർ "എഫ്‌ ആന്‍ഡ്‌ എം' വാക്‌സിനാണ്‌. 5 മുതൽ 10 മില്ലിലിറ്റർ വരെ തൊലിക്കടിയിൽ കുത്തിവയ്‌ക്കുന്നത്‌ ആറുമാസത്തോളം പ്രതിരോധശക്തി പ്രദാനം ചെയ്യും. സങ്കരവർഗം കന്നുകാലികള്‍ക്ക്‌ ഇത്‌ ഒരു മാരകരോഗമായതിനാൽ ഇവയെ പ്രതിരോധകുത്തിവയ്‌പിനു വിധേയമാക്കേണ്ടത്‌ അനിവാര്യമാണ്‌.
(ഡോ. ബി.ആർ. കൃഷ്‌ണന്‍ നായർ)
