This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കിർക്കി/ഖഡ്‌കി
സര്‍വ്വവിജ്ഞാനകോശം സംരംഭത്തില്‍ നിന്ന്
കിർക്കി/ഖഡ്‌കി
Kirkee/Khadki
മഹാരാഷ്‌ട്ര സംസ്ഥാനത്തിലെ പൂനാ ജില്ലയിലുള്‍പ്പെട്ട ഒരു പട്ടണം. ബ്രിട്ടീഷ്‌ ഭരണകാലത്ത്‌ കിർക്കി എന്നറിയപ്പെട്ടിരുന്ന ഈ പട്ടണത്തിന്റെ ഇപ്പോഴത്തെ പേര്‌ "ഖഡ്‌കി' എന്നാണ്‌. സൈനികത്താവളമായ കിർക്കിയിലൂടെയാണ്‌ മുംബൈ-പൂനാ റെയിൽപ്പാത കടന്നുപോകുന്നത്‌. സൈനികത്താവളത്തിനകത്തുള്ള സൈനികരുടെ ശ്‌മശാനം, സമീപമുള്ള മിലിട്ടറി എന്‍ജിനീയറിങ്‌ കോളജ്‌, ഖഡ്‌കിയിലെ മറ്റൊരു പ്രമുഖ ഉന്നതവിദ്യാഭ്യാസകേന്ദ്രമായ സിംബയോസിസ്‌ ഇന്‍സ്റ്റിറ്റ്യൂട്ട്‌ ഒഫ്‌ മാനേജ്‌മെന്റ്‌ തുടങ്ങിയവയും പട്ടണത്തിന്റെ പ്രസിദ്ധിക്കു കാരണമാകുന്നുണ്ട്‌. പശ്ചിമഘട്ടത്തിന്റെ പിന്‍ഭാഗത്തായി സ്ഥിതിചെയ്യുന്ന കിർക്കിയിൽ മഴ താരതമ്യേന കുറവാണ്‌. വേനൽക്കാലത്ത്‌ അത്യുഗ്രമായ ചൂടും ജലദൗർലഭ്യവും അനുഭവപ്പെടുന്നു. കരിമ്പ്‌, പയറുവർഗങ്ങള്‍, എണ്ണക്കുരുക്കള്‍ മുതലായ അല്‌പമാത്രമായുള്ള കാർഷികോത്‌പാദനം പോലും ജലസേചനസൗകര്യങ്ങളെ ആശ്രയിച്ചിരിക്കുന്നു. ചെറിയ തോതിൽ കന്നുകാലി വളർത്തലുമുണ്ട്‌.
1817-ൽ മറാത്തരും ബ്രിട്ടീഷ്‌ ഈസ്റ്റ്‌ ഇന്ത്യാകമ്പനിയും തമ്മിലുണ്ടായ "ഖഡ്‌കി യുദ്ധം' ഈ പട്ടണത്തിനു ചരിത്രപരമായ പ്രധാന്യം നൽകുന്നു. ജനങ്ങളിൽ ഏറിയഭാഗവും ഹിന്ദുക്കളും മുസ്‌ലിങ്ങളുമാണ്‌. ഗുജറാത്തി, മറാഠി, ഹിന്ദി എന്നിവയാണ്‌ സംസാരഭാഷകള്‍. ജനങ്ങളിൽ ഭൂരിപക്ഷവും കാർഷികേതര പ്രവൃത്തിയിൽ ഏർപ്പെട്ടിരിക്കുന്നു. രാജ്യത്തെ പ്രധാന വെടിക്കോപ്പുനിർമാണശാല ഇവിടെയാണ്‌. സായുധസേനയുടെ നിരവധി ഉപകരണനിർമാണകേന്ദ്രങ്ങളും ഇവിടെയുണ്ട്‌.
(എസ്‌. ഗോപിനാഥന്‍)
