This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കുപ്പമേനി
സര്‍വ്വവിജ്ഞാനകോശം സംരംഭത്തില്‍ നിന്ന്
കുപ്പമേനി
Indian acalypha
യൂഫോർബിയേസി സസ്യകുടുംബത്തിൽപ്പെടുന്ന ഒരു ഏകവർഷ ഓഷധി. ശാ.നാ.: അക്കാലിഫ ഇന്‍ഡിക്ക(Acalypha indica). സംസ്‌കൃതത്തിൽ ഹരിതമഞ്‌ജരി എന്നു പേരുള്ള ഈ സസ്യം പൂച്ചമയക്കിച്ചെടി, തമ്പുകുലുക്കി എന്നീ പേരുകളിലും അറിയപ്പെടുന്നു.
ഇന്ത്യയിലെ സമതലങ്ങളിൽ ഉടനീളം കാണുന്ന ഒരു സസ്യമാണിത്‌. തരിശുഭൂമികളിലും പാതവക്കിലും പാഴ്‌ച്ചെടിയായിട്ടാണ്‌ സാധാരണ കാണപ്പെടുക. ഏകദേശം 75 സെന്റിമീറ്ററോളം ഉയരത്തിൽ വളരുന്നു. മൂന്ന്‌ മുതൽ എട്ട്‌ സെ.മീ. നീളമുള്ള കട്ടികുറഞ്ഞ ഇലകള്‍ക്ക്‌ ദീർഘവൃത്താകാരമാണ്‌. സാധാരണയായി മൂന്നു സിരകള്‍ ഉണ്ടായിരിക്കും. അരിക്‌ ദന്തുരമാണ്‌. പർണവൃന്തത്തിന്‌ പത്രങ്ങളെക്കാള്‍ നീളമുണ്ട്‌. പുഷ്‌പങ്ങള്‍ കക്ഷീയപ്രകീലങ്ങളിൽ കാണുന്നു. ആണ്‍-പെണ്‍ പൂക്കള്‍ വെണ്ണേറെയുണ്ട്‌. പെണ്‍പൂക്കളോടനുബന്ധിച്ച്‌ ആപ്പിന്റെ ആകൃതിയിലുള്ള സഹപത്രങ്ങള്‍ കാണാം. ആണ്‍ പൂക്കള്‍ വളരെച്ചെറുതാണ്‌. അവ കക്ഷീയപ്രകീലങ്ങളുടെ അഗ്രഭാഗത്തോടടുത്തു കാണപ്പെടുന്നു. ഫലങ്ങള്‍ ചെറുതും രോമാവൃതവുമാണ്‌. അവ സഹപത്രങ്ങള്‍കൊണ്ട്‌ മറഞ്ഞിരിക്കും.
അക്കാലിപസ്‌ (acalypus), അെക്കാലിഫൈന്‍ (acalyphine) എന്നീ രണ്ടു ആൽക്കലോയിഡുകള്‍ ഈ ചെടിയിൽ അടങ്ങിയിരിക്കുന്നു. ചെടിയുടെ ഇല, വേര്‌, ഇളംതണ്ട്‌, പൂക്കള്‍ എന്നിവ ഔഷധത്തിനായി ഉപയോഗിക്കുന്നു. ബ്രാങ്കൈറ്റിസ്‌, ആസ്‌ത്‌മ, സിഫിലിസ്‌, വ്രണം, ത്വഗ്‌രോഗങ്ങള്‍, ന്യുമോണിയ, വാതം, ചെവിവേദന, തലവേദന എന്നിവയ്‌ക്ക്‌ ഫലപ്രദമായ ഔഷധമാണ്‌ കുപ്പമേനി. ചെടിയുടെ ചാറ്‌ വെളുത്തുള്ളി ചേർത്ത്‌ വിരനശീകരണൗഷധമായി ഉപയോഗിക്കാം. വേര്‌, ഇല, നീര്‌ എന്നിവ വിരേചനൗഷധമാണ്‌. ഇലനീര്‌ ഛർദിപ്പിക്കാനുള്ള മരുന്നായി ഉപയോഗിക്കാം. ഹിസ്റ്റീരിയയ്‌ക്കും വിഷം നീക്കുന്നതിനും കുപ്പമേനി ഉപയോഗപ്രദമാണ്‌.
