This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഈഫൽ ഗോപുരം
സര്‍വ്വവിജ്ഞാനകോശം സംരംഭത്തില്‍ നിന്ന്
ഈഫൽ ഗോപുരം
Eiffel Tower
പാരിസിലെ 300 മീ. ഉയരമുള്ള ഇരുമ്പുരുക്കുഗോപുരം. 1889-ൽ പാരിസിൽ വച്ചു നടത്തപ്പെട്ട അന്താരാഷ്‌ട്രപ്രദർശനത്തിനു വേണ്ടി ഗുസ്‌താവ്‌ ഈഫൽ (1832-1923) എന്ന ഫ്രഞ്ച്‌ എന്‍ജിനീയറാണ്‌ ഈ ഗോപുരം നിർമിച്ചത്‌. ഫ്രഞ്ചു ഗവണ്‍മെന്റ്‌ നിയോഗിച്ച ഒരു വിദഗ്‌ധ സമിതി ഗോപുരനിർമാണത്തിനുവേണ്ടി ഒരു മത്സരം സംഘടിപ്പിച്ചതിൽ എഴുന്നൂറോളം ഡിസൈനുകള്‍ സമർപ്പിക്കപ്പെട്ടിരുന്നെങ്കിലും ഈഫലിന്റെ ഡിസൈനാണ്‌ ഐകകണ്‌ഠ്യേന തെരഞ്ഞെടുക്കപ്പെട്ടത്‌. ഡിസൈന്‍ അംഗീകരിക്കപ്പെട്ടതു മുതൽ നിർമാണം തീരുന്നതുവരെ, പാരിസ്‌ നഗരത്തിന്റെ സൗന്ദര്യത്തെ പ്രതികൂലമായി ബാധിക്കുമെന്നും 300 മീ. ഉയരമായാൽ സംരചന തകർന്നു വീഴുമെന്നും മറ്റുമുള്ള ശക്തമായ എതിർപ്രചാരണങ്ങളെ ഈഫലിനു നേരിടേണ്ടിവന്നു. 1887 ജനുവരിയിൽ പണി തുടങ്ങുകയും എതിർപ്പുകളെ അതിജീവിച്ച്‌ 1889 മാർച്ചിൽ നിർമാണം പൂർത്തിയാക്കുകയും ചെയ്‌തു. വിവിധ യൂറോപ്യന്‍ രാജ്യങ്ങളിലായി അതിനകം ഒരു ഡസനോളം വന്‍കിടപാലങ്ങള്‍ നിർമിച്ചതിലൂടെ ആർജിച്ച അനുഭവജ്ഞാനം ഈഫലിന്‌ ഈ ഗോപുരത്തിന്റെ നിർമാണത്തിൽ വളരെ ഉപകരിക്കുകയുണ്ടായി.
1929 വരെ ലോകത്തിലെ ഏറ്റവും ഉയരം കൂടിയ സംരചന (structure) ഈഫൽ ഗോപുരമായിരുന്നു. 7,000 ടണ്‍ ഇരുമ്പും ഉരുക്കും ഇതിന്റെ നിർമാണത്തിനുപയോഗിക്കപ്പെട്ടിട്ടുണ്ട്‌. ഇതിന്റെ നിർമാണച്ചെലവ്‌ പത്തു ലക്ഷം ഡോളറാണ്‌. ഗോപുരത്തിന്റെ മുകളിലെത്താന്‍ ചവിട്ടുപടികളും ലിഫ്‌റ്റുകളുമുണ്ട്‌. ആദ്യലിഫ്‌റ്റ്‌ 1889-ലാണ്‌ പ്രവർത്തനമാരംഭിച്ചത്‌. ഗോപുരത്തിന്റ മുകളിലുള്ള മൂന്നു നിരീക്ഷണവേദികളിലൊന്നിൽ ഒരു ഭക്ഷണശാലയുമുണ്ട്‌. ഗോപുരത്തിന്റെ ഏറ്റവും മുകളിൽ അന്തരീക്ഷനിരീക്ഷണോപകരണങ്ങള്‍, വയർലസ്‌ സ്റ്റേഷന്‍, ടെലിവിഷന്‍പ്രഷണകേന്ദ്രം എന്നിവ സ്ഥാപിച്ചിരിക്കുന്നു. ലോകത്തിന്റെ നാനാഭാഗത്തുനിന്നുമുള്ള ലക്ഷക്കണക്കിന്‌ ആളുകള്‍ ഇത്‌ സന്ദർശിച്ചു വരുന്നു. 2012-ൽ മാത്രം 60 ലക്ഷം ആളുകള്‍ ഈഫൽ ഗോപുരം സന്ദർശിച്ചതായി രേഖപ്പെടുത്തിയിരിക്കുന്നു.
