This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കുവിയെ, ജോർജെ (1769 - 1832)
സര്‍വ്വവിജ്ഞാനകോശം സംരംഭത്തില്‍ നിന്ന്
കുവിയെ, ജോർജെ (1769 - 1832)
Cuvier, Georges
ഫ്രഞ്ച്‌ ശരീരഘടനാ ശാസ്‌ത്രജ്ഞനും ഫോസിൽ വിജ്ഞാനിയും. കമ്പാരറ്റിവ്‌ അനാറ്റമിയുടെയും പുരാജീവി വിജ്ഞാനത്തിന്റെയും ഉപജ്ഞാതാവായി അറിയപ്പെടുന്ന ഇദ്ദേഹത്തിന്റെ പൂർണനാമം ജോർജെ ലിയോപ്പോള്‍ ക്രറ്റീങ്‌ ഫ്രഡറിക്‌ ഡാഗോബേർ കുവിയെ എന്നാണ്‌. ഇദ്ദേഹം 1769 ആഗ. 23-ന്‌ കിഴക്കന്‍ ഫ്രാന്‍സിലെ മോണ്ട്‌ ബെവിയാർദിൽ ജനിച്ചു. സ്റ്റുട്ട്‌ഗാർട്ട്‌ അക്കാദമിയിൽ വിദ്യാഭ്യാസം പൂർത്തിയാക്കിയ ഇദ്ദേഹം 1795-ൽ നാഷണൽ മ്യൂസിയം ഒഫ്‌ നാച്ചുറൽ ഹിസ്റ്ററിയിൽ കമ്പാരറ്റിവ്‌ അനാറ്റമി വകുപ്പിൽ ഉദ്യോഗസ്ഥനായി നിയമിതനായി; ഇതേവർഷം രൂപംകൊണ്ട നാഷണൽ ഇന്‍സ്റ്റിറ്റ്യൂട്ടിലെ അംഗമായും തെരഞ്ഞെടുക്കപ്പെട്ടു. ഇദ്ദേഹം കോളജ്‌ ഒഫ്‌ ഫ്രാന്‍സ്‌, ജാർഡിന്‍ ഡെസ്‌പ്ലാനറ്റ്‌ എന്നിവിടങ്ങളിൽ പ്രാഫസറായി സേവനം അനുഷ്‌ഠിച്ചിട്ടുണ്ട്‌. 1803-ൽ ഇദ്ദേഹം അക്കാദമി ഒഫ്‌ സയന്‍സിലെ ഭൗതിക-പ്രകൃതിശാസ്‌ത്രവിഭാഗത്തിന്റെ സ്ഥിരം സെക്രട്ടറിയായി തെരഞ്ഞെടുക്കപ്പെട്ടു. പിന്നീട്‌ പാരിസ്‌ യൂണിവേഴ്‌സിറ്റിയുടെ ചാന്‍സലറായി നിയമിതനായി.
ഇദ്ദേഹം നടത്തിയ ഫോസിൽ പഠനങ്ങള്‍ വളരെയേറെ ശ്രദ്ധിക്കപ്പെട്ടു. ഫോസിലുകളുടെയും ഇന്നത്തെ ജീവികളുടെയും സവിശേഷതകള്‍ താരതമ്യം ചെയ്‌ത ഇദ്ദേഹം ശരീരത്തിന്റെ ഒരു ഭാഗം മാത്രമായി മാറ്റത്തിനു വിധേയമാകുകയില്ല എന്നുവാദിച്ചു. ലാമാർക്കിന്റെ പരിണാമസിദ്ധാന്തത്തെ എതിർക്കാന്‍ ഈ വാദമാണ്‌ കുവിയെ അടിസ്ഥാനമാക്കിയത്‌. കുവിയേയുടെ ഈ നിലപാട്‌ ഫ്രഞ്ച്‌ ശാസ്‌ത്രകാരന്മാരെ വളരെ സ്വാധീനിക്കുകയും "സ്‌പീഷീസുകളുടെ പരിവർത്തനോന്മുഖത' എന്ന ആശയം ഏറെക്കാലം അംഗീകരിക്കപ്പെടാതിരിക്കുകയും ചെയ്‌തു. എങ്കിലും "വംശനാശം' എന്ന ആശയം ശാസ്‌ത്രലോകത്ത്‌ സ്ഥാപിച്ചത്‌ കുവിയെ ആയിരുന്നു. മാമത്തുകളും ഡൈനോസോറുകളും മറ്റും അപ്രത്യക്ഷമായത്‌ അവ നശിച്ചുപോയതുകൊണ്ടല്ല, മറിച്ച്‌ അവ കാണപ്പെട്ടിരുന്ന സ്ഥലങ്ങളിൽ നിന്ന് പലായനം ചെയ്‌ത്‌ അജ്ഞാത സങ്കേതങ്ങളിൽ എത്തിച്ചേർന്നതുകൊണ്ടാണെന്നായിരുന്നു അക്കാലത്ത്‌ ശാസ്‌ത്രലോകത്ത്‌ നിലനിന്നിരുന്ന വിശ്വാസം. പലപ്പോഴായി വന്‍പ്രകൃതി ദുരന്തങ്ങളിൽ നിരവധി ജീവികള്‍ക്ക്‌ വംശനാശം സംഭവിച്ചിട്ടുണ്ടെന്ന വാദം കുവിയെ അവതരിപ്പിച്ചു. കറ്റാസ്‌ട്രാഫിസം (Catastrophism)എന്ന ഈ ആശയത്തെ ഭൂവിജ്ഞാനീയത്തിൽ സന്നിവേശിപ്പിച്ചവരിൽ പ്രമുഖനായിരുന്നു കുവിയെ.
മൊളസ്‌ക വിഭാഗത്തിൽപ്പെടുന്ന ജീവികളെക്കുറിച്ചും മത്സ്യസ്‌പീഷീസുകളെക്കുറിച്ചും ഇദ്ദേഹം ശ്രദ്ധേയമായ പഠനങ്ങള്‍ നടത്തിയിട്ടുണ്ട്‌. ജന്തുലോകത്തെ നാല്‌ വിഭാഗങ്ങളായി തിരിക്കുന്ന ഒരു വർഗീകരണവും ഇദ്ദേഹം തയ്യാറാക്കിയിരുന്നു. ഈ വർഗീകരണത്തിൽ നാല്‌ വിഭാഗങ്ങളും തികച്ചും വ്യതിരിക്തവും പരസ്‌പരം ബന്ധിപ്പിക്കുന്ന കണ്ണികളില്ലാത്തതുമാണ്‌. ഏറ്റവും ലളിതമായതിൽനിന്ന്‌ സങ്കീർണവും പൂർണവുമായ രൂപങ്ങളിലേക്ക്‌ തുടർച്ചയായി പരിവർത്തിക്കുന്ന വ്യവസ്ഥയല്ല ജന്തുലോകത്തിന്റേത്‌ എന്ന്‌ വിശ്വസിച്ച കുവിയെ തയ്യാറാക്കിയ വർഗീകരണം ശ്രണീബദ്ധമായിരുന്നില്ല.
പട്ടിക കുവിയെയുടെ വർഗീകരണം ഡിവിഷന്‍ (Division) ക്ലാസ്സ്‌ (Class)
I. കശേരുകി 1. സസ്‌തനികള്‍ 2. പക്ഷികള്‍ 3. ഉരഗങ്ങള്‍ 4. മത്സ്യങ്ങള്‍ II. മൊളസ്‌ക 1. സെഫാലോപോഡ 2. ടെറോപോഡ 3. ഗാസ്റ്റ്രാപോഡ 4. ഏസെഫാല 5. ബ്രാക്കിയോപോഡ 6. സിറോപോഡ III.ആർട്ടികുലേറ്റ 1. അനലിഡ 2. ക്രസ്റ്റേഷ്യ 3. അരാക്കിനിഡ 4. ഇന്‍സെക്‌റ്റ IV. റേഡിയേറ്റ 1. എക്കൈനൊഡെർമേറ്റ 2. എന്റോസോഫ 3. എകാലെഫി 4. പോളിപി 5. ഇന്‍ഫുസോറിയ
നിരവധി ശ്രദ്ധേയമായ സംഭാവനകള്‍ ശാസ്‌ത്രലോകത്തിന്‌ നൽകിയെങ്കിലും ഇദ്ദേഹത്തിന്റെ ചില നിലപാടുകള്‍ വളരെയധികം വിമർശിക്കപ്പെട്ടിട്ടുണ്ട്‌. കാണാവുന്ന വലുപ്പത്തിലുള്ള എല്ലാ ജന്തുജീവികളെയും കണ്ടെത്തിക്കഴിഞ്ഞു എന്ന "റാഷ്‌ ഡിക്‌റ്റം'(Rash Dictum)എന്ന പേരിൽ കുപ്രസിദ്ധമായ ഇദ്ദേഹത്തിന്റെ പ്രസ്‌താവനയ്‌ക്കുശേഷമാണ്‌ ഇന്ത്യന്‍ ടപീർ, പിഗ്മി ഹിപ്പോപൊട്ടാമസ്‌, വെള്ള നൈനോ ഒകാപ്പി, കോമോഡോ ഡ്രാഗണ്‍ തുടങ്ങിയ ജന്തുക്കളെ കണ്ടെത്തി വർഗീകരിച്ചത്‌.
ഗവണ്‍മെന്റിൽ പല ഉന്നതസ്ഥാനങ്ങളും വഹിച്ചിരുന്ന കുവിയെ ഫ്രാന്‍സിലെ ഉന്നതവിദ്യാഭ്യാസം മെച്ചപ്പെടുത്തുന്നതിനുവേണ്ടി നിരവധി പദ്ധതികള്‍ ആസൂത്രണം ചെയ്‌തു നടപ്പിൽ വരുത്തിയിട്ടുണ്ട്‌. 1814-ൽ ഇദ്ദേഹം കൗണ്‍സിൽ ഒഫ്‌ സ്റ്റേറ്റിലേക്ക്‌ തെരഞ്ഞെടുക്കപ്പെടുകയും 1817-ൽ ആഭ്യന്തരവകുപ്പിന്റെ വൈസ്‌പ്രസിഡന്റായി നിയമിതനാവുകയും ചെയ്‌തു. ടാബ്ലോ എലെമന്റയർ ദേൽ ഹിസ്റ്റോയിർ നാച്ചുറല്ലേ ദെസാനിമോ (1798), മെമ്‌വോസ്‌ സർലെ സ്‌പെസസ്‌ ഡി എലഫെന്റ്‌സ്‌ വിവന്റ്‌സ്‌ എ ഫോസ്സിൽസ്‌ (1800), ലെസന്‍സ്‌ ദാ അനാറ്റമി കംപാരീ (5 വാല്യങ്ങള്‍, 1801-5), റെഷർ ചെസു ലെസ്സോസെമെന്റ്‌സ്‌ ഫോസ്സിലെ ദെ ക്വാഡ്രൂപിഡെ (1812), ലെ റെഗ്നെ ആനിമൽ ഡെസ്‌ട്രിബ്യൂ ദാപ്ര സോങ്‌ ഓർഗനൈസേഷന്‍ങ്‌ (1817) എന്നിവയാണ്‌ കുവിയെയുടെ പ്രമുഖ കൃതികള്‍. ഇദ്ദേഹം 1832 മേയ്‌ 13-ന്‌ പാരിസിൽവച്ചു നിര്യാതനായി.
