This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കാട്ടുഞ്ഞാലി
സര്‍വ്വവിജ്ഞാനകോശം സംരംഭത്തില്‍ നിന്ന്
കാട്ടുഞ്ഞാലി
Southern Tree Pie
കോർവിഡേ കുടുംബത്തിൽപ്പെട്ടതും മൈനയോളം വലുപ്പമുള്ളതുമായ ഒരു പക്ഷി. ഇതിന്റെ വാലിനു 30 സെ. മീ. നീളമുണ്ടായിരിക്കും. ശാ.നാ: ഡെന്‍ഡ്രാസിറ്റ ല്യൂക്കോഗാസ്റ്റ്രാ (Dendrocitta leucogastra). മലകളിലുള്ള വന്‍കാടുകളിലെ വൃക്ഷങ്ങളിൽ സ്ഥിരമായി താമസിക്കുന്ന ഈ പക്ഷി ഓലേഞ്ഞാലിയുടെ ഇനത്തിൽപ്പെട്ടതാണ്‌.
ആകൃതിയിലും സ്വഭാവത്തിലും ഇത്‌ ഓലേഞ്ഞാലിയോടു വളരെയേറെ സാദൃശ്യങ്ങള്‍ പ്രകടമാക്കുന്നു. തലയുടെ പിന്‍ഭാഗവും പിന്‍കഴുത്തും ദേഹത്തിന്റെ അടിഭാഗം മുഴുവനും തൂവെള്ളനിറം; മുതുകും ചിറകുകളുടെ വക്കുകളും അറ്റവും, വാലിന്റെ അറ്റവും അടിഭാഗവും നല്ല കറുപ്പുനിറം; ഗുദത്തിൽ ത്രികോണാകൃതിയിലുള്ള ഒരു പൊട്ട്‌; പേനക്കാക്കയുടേതുപോലെ ഒരു കറുത്ത മുഖംമൂടി-ഈ പ്രത്യേകതകള്‍ കാട്ടുഞ്ഞാലിയെ ഓലേഞ്ഞാലിയിൽനിന്ന്‌ വേർതിരിച്ച്‌ നിർത്തുന്നു. പൂവനും പിടയും കാഴ്‌ചയിൽ ഒരുപോലെയിരിക്കും.
1,000 മീ. മുതൽ ഉയരമുള്ള കുന്നിന്‍പ്രദേശങ്ങളിലെ നിത്യഹരിതവനങ്ങളും ചോലകളുമാണ്‌ കാട്ടുഞ്ഞാലിയുടെ സ്ഥിരമായ വാസസ്ഥാനങ്ങള്‍. ഏലക്കാടുകളിലെ ചോലകളും, വെട്ടുകഴിഞ്ഞ റബ്ബർത്തോട്ടങ്ങളും ഇതിന്റെ പ്രിയപ്പെട്ട താവളങ്ങളാണ്‌.
പശ്ചിമഘട്ട ഗിരിനിരകളിൽ ഏതാണ്ടെല്ലായിടത്തും തന്നെ കാണപ്പെടുന്ന ഈ പക്ഷി നീലഗിരിക്കുന്നുകളിലും കർണാടകത്തിന്റെ പടിഞ്ഞാറുഭാഗത്തും സമൃദ്ധമായുണ്ട്‌. ആനറാഞ്ചികളുമായി ഇടകലർന്ന്‌, ജോഡികളായോ ഒരു കുടുംബം മുഴുവനായോ ആണ്‌ സാധാരണ കാട്ടുഞ്ഞാലി ഇരതേടുക. ഓലേഞ്ഞാലിയുടേതിനെക്കാള്‍ കൂടുതൽ ഉച്ചസ്ഥായിയിലുള്ളതും ലോഹത്തിൽ തട്ടുന്നതുപോലെ ചിലമ്പിച്ചതുമാണ്‌ ഇതിന്റെ ശബ്‌ദം. പലപ്പോഴും ഇവ ആനറാഞ്ചിയുടെ ശബ്‌ദത്തെ അനുകരിക്കാറുമുണ്ട്‌. വാലുയർത്തിപ്പിടിച്ച്‌ ശരീരത്തിന്റെ മുന്‍പകുതി താഴ്‌ത്തി ഒരു പ്രത്യേകനില കൈക്കൊണ്ട്‌ വൃക്ഷക്കൊമ്പിൽ ഇത്‌ ചാടിത്തുള്ളി നടക്കുന്നത്‌ അപൂർവമായി മാത്രം കാണാന്‍ പറ്റുന്ന രസകരമായ ഒരു ദൃശ്യമാണ്‌. തൊണ്ടയ്‌ക്കുള്ളിൽനിന്നു പുറപ്പെടുന്ന മാതിരിയിലുള്ള "ഛൗ-ഛൗ-ഛൗ' എന്നൊരു ശബ്‌ദത്തിനനുസൃതമായിട്ടായിരിക്കും ഈ "നൃത്തം'. ഇത്‌ കാട്ടുഞ്ഞാലിയുടെ മാത്രം സവിശേഷതയാണെന്നു പറയാം.
ഫെബ്രുവരി മുതൽ ഏപ്രിൽ വരെയാണ്‌ കൂടുണ്ടാക്കുന്ന കാലം. 75 മുതൽ 900 വരെ മീ. ഉയരമുള്ളയിടങ്ങളിലെ ഉയർന്ന കുറ്റിച്ചെടികളിലും സാധാരണ ഉയരമുള്ള വൃക്ഷങ്ങളിലും ഇതിന്റെ കൂടുകള്‍ കണ്ടെത്താം. മനുഷ്യവാസമുള്ളിടങ്ങളിൽ ഇത്‌ കൂടുകെട്ടാറില്ല. കൂട്‌ ഓലേഞ്ഞാലിയുടേതുപോലെതന്നെ. ഒരു തവണ മൂന്ന്‌ മുതൽ നാല്‌ വരെ മുട്ടയിടുന്നു. വിളറിയ വെളുപ്പുമുതൽ പച്ച കലർന്ന വെള്ളവരെ വിവിധ നിറങ്ങളുള്ള മുട്ടകളിൽ ചുവപ്പ്‌, തവിട്ട്‌ തുടങ്ങിയ കടുത്ത നിറങ്ങളിലുള്ള വരകളും പൊട്ടുകളും ധാരാളമായിക്കാണാം. മോതിരത്തിന്റെയോ തൊപ്പിയുടെയോ ആകൃതിയിലുള്ള ഈ അടയാളങ്ങള്‍ മുട്ടയുടെ വീതികൂടിയ ഭാഗത്തു മാത്രമേ കാണാറുള്ളൂ. നോ. ഓലേഞ്ഞാലി
