This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഈസ്റ്റർ കലാപം
സര്‍വ്വവിജ്ഞാനകോശം സംരംഭത്തില്‍ നിന്ന്
ഈസ്റ്റർ കലാപം
Easter Mutiny
ബ്രിട്ടീഷ്‌ മേല്‌ക്കോയ്‌മയ്‌ക്കെതിരായി അയർലണ്ടിലെ ഡബ്ലിനിൽ 1916 ഏ. 24-ന്‌ ഈസ്റ്റർ ദിനത്തിൽ സംഘടിപ്പിക്കപ്പെട്ട ജനകീയകലാപം. ഡബ്ലിനിലെ തൊഴിലാളികള്‍, ഐറിഷ്‌ ദേശീയ സന്നദ്ധഭടന്മാർ, ഐറിഷ്‌ റിപ്പബ്ലിക്കന്‍ ബ്രദർ ഹുഡ്‌, ഷിന്‍ഫേന്‍ കക്ഷിക്കാർ എന്നിവർ യോജിച്ച്‌ പൗരസൈന്യം രൂപവത്‌കരിച്ചാണ്‌ കലാപത്തിനൊരുമ്പെട്ടത്‌. ഈ വിവരം മുന്‍കൂട്ടി അറിഞ്ഞ ബ്രിട്ടീഷ്‌ ഭരണാധികാരികള്‍ നേതാക്കന്മാരായ റോജർ കേസ്‌മെന്റ്‌, ഇയോയിന്‍ മക്‌നിൽ തുടങ്ങിയവരെ അറസ്റ്റുചെയ്‌ത്‌ തടവിലാക്കി; എന്നാൽ പാട്രിക്‌ പിയേഴ്‌സ്‌, ജയിംസ്‌ കൊണോലി എന്നിവരുടെ നേതൃത്വത്തിൽ 2,000-ത്തോളം വരുന്ന പൗരസൈന്യം മുന്നേറി ഡബ്ലിന്‍ ജനറൽ പോസ്റ്റ്‌ ഓഫീസും തന്ത്രപ്രാധാന്യമുള്ള മറ്റു പല സ്ഥലങ്ങളും കീഴടക്കി ഒരു ഐറിഷ്‌ റിപ്പബ്ലിക്‌ സ്ഥാപിച്ചതായി പ്രഖ്യാപനം നടത്തി. ഒരാഴ്‌ചയോളം നീണ്ടുനിന്ന തെരുവുയുദ്ധത്തിനൊടുവിൽ കലാപകാരികള്‍ കീഴടങ്ങുകയുണ്ടായി. കലാപനേതാവായ പാട്രിക്‌ പിയേഴ്‌സിനെയും മറ്റു 13 സഹപ്രവർത്തകരെയും വധിച്ചതോടെ ജനരോഷം ബ്രിട്ടീഷ്‌ ഗവണ്‍മെന്റിനെതിരായി ആളിക്കത്തി; ബ്രിട്ടീഷ്‌ മന്ത്രിസഭ നിലംപതിച്ചു. അതിനുശേഷം ബ്രിട്ടന്‌ അയർലണ്ടിന്റെമേൽ പൂർണമായ ആധിപത്യം ചെലുത്താന്‍ കഴിഞ്ഞില്ല. ഈ കലാപത്തിൽ പങ്കെടുത്ത്‌ പ്രസിദ്ധിയാർജിച്ചതുമൂലം ഈമണ്‍ ഡീ വാലെറയ്‌ക്ക്‌ അയർലണ്ടിലെ പ്രധാനമന്ത്രിയും (1932) പിന്നീട്‌ പ്രസിഡന്റും (1953) ആകാന്‍ കഴിഞ്ഞു.
