This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഓക്‌ലാന്റ്‌
സര്‍വ്വവിജ്ഞാനകോശം സംരംഭത്തില്‍ നിന്ന്
ഓക്‌ലാന്റ്‌
Oakland
അമേരിക്കന്‍ ഐക്യനാടുകളിലെ കാലിഫോർണിയ സംസ്ഥാനത്തിന്റെ പശ്ചിമതീരപ്രദേശത്തുള്ള സാന്‍ഫ്രാന്‍സിസ്‌കോ ഉള്‍ക്കടലിനോടു ചേർന്ന ഒരു സുപ്രധാന തുറമുഖനഗരം. 202 ച.കി.മീ.; മൊത്തം വിസ്‌തീർണമുള്ള ഓക്‌ലാന്റിന്‌ 144 ച.കി.മീ. ഭൂപ്രദേശവും 58 ച.കി.മീ. ജലസമ്പുഷ്‌ടതയാർന്ന മേഖലയുമാണുള്ളത്‌. 2010-ലെ യു.എസ്‌. സെന്‍സസ്‌ കണക്കുപ്രകാരം ഓക്‌ലാന്റിലെ ജനസംഖ്യ: 3,90,724 ആണ്‌. ജനസാന്ദ്രതയാകട്ടെ ചതുരശ്രകിലോമീറ്ററിന്‌ 1934. വെളുത്തവർഗക്കാർ, ആഫ്രിക്കന്‍-അമേരിക്കന്‍ വംശജർ, അമേരിക്കന്‍ സ്വദേശികള്‍, ഏഷ്യന്‍ ചൈനാക്കാർ, വിയറ്റ്‌നാംകാർ, ഫിലിപ്പിനോ, കംബോഡിയക്കാർ, ലാവോഷിയന്മാർ, കൊറിയക്കാർ, ജാപ്പനീസ്‌ വംശജർ, ഇന്ത്യന്‍-പസിഫിക്‌ ദ്വീപുനിവാസികള്‍ തുടങ്ങി ഹിസ്‌പാനിക്‌ അഥവാ ലാറ്റിനോ സമൂഹങ്ങള്‍ വരെ ഉള്‍ക്കൊള്ളുന്ന വൈവിധ്യമാർന്ന ജനതതിയാണ്‌ ഓക്‌ലാന്റിലുള്ളത്‌. നഗരമേഖലയിലെ പ്രതിശീർഷവരുമാനം 21,936 ഡോളറാണ്‌. ജനസംഖ്യയുടെ 19.4 ശതമാനവും ദാരിദ്യ്രരേഖയ്‌ക്കു താഴെയുള്ളവരാണ്‌. 1960-കള്‍ മുതൽ ആഫ്രിക്കന്‍-അമേരിക്കന്‍ സാംസ്‌കാരിക പൈതൃകം അവകാശപ്പെടുന്നവരാണ്‌ ഓക്‌ലാന്റ്‌ പ്രദേശവാസികള്‍. എന്നാൽ 2000-നും 2010-നുമിടയ്‌ക്ക്‌ ഓക്‌ലാന്റിലെ 25 ശതമാനത്തോളം വരുന്ന കറുത്തവർഗ ജനവിഭാഗത്തിനു നാശംസംഭവിക്കുകയുണ്ടായി. ഇതുമൂലം ദീർഘകാലമായി അനുവർത്തിച്ചുവന്നിരുന്ന ആഫ്രാ-അമേരിക്കന്‍ സാംസ്‌കാരിക പാരമ്പര്യത്തിന്‌ ക്ഷതമേല്‌ക്കാന്‍ ഇടവന്നിട്ടുണ്ട്‌.
1852 മുതൽ ഈ പ്രദേശത്ത്‌ ജനവാസമുണ്ടായിരുന്നതായി കണക്കാക്കപ്പെടുന്നു. അലമേഡ പ്രദേശത്തിന്റെ തലസ്ഥാനംകൂടിയാണ്‌ ഓക്‌ലാന്റ്‌. സാന്‍ഫ്രാന്‍സിസ്‌കോയുടെ നിർമാണഘട്ടത്തിൽ, ഓക്‌ലാന്റ്‌ പ്രദേശത്തുനിന്നും ലഭിച്ചിരുന്ന കുന്നിന്‍ചെരുവുകളിലെ ഓക്കുമരത്തടിയും മറ്റും പ്രയോജനപ്പെട്ടിരുന്നു. കാലിഫോർണിയ "ഗോള്‍ഡ്‌ പ്രയാണ' കാലത്ത്‌ സമുദ്രചരക്കു ഗതാഗതത്തിൽ ഓക്‌ലാന്റ്‌ പ്രധാന വേദിയായിരുന്നു. 1860-കളുടെ അന്ത്യഘട്ടത്തിൽ ഓക്‌ലാന്റിനെ ട്രാന്‍സ്‌കോണ്ടിനെന്റൽ റെയിൽ-റോഡ്‌ ശൃംഖലയുടെ പശ്ചിമടെർമിനൽ കേന്ദ്രമായി തെരഞ്ഞെടുക്കുകയുണ്ടായി. തിരക്കേറിയ തുറമുഖം, കപ്പൽ നിർമാണ ശാലകള്‍, ഓട്ടോമൊബൈൽ നിർമാണം തുടങ്ങിയവയിലൂടെ 20-ാം ശതകത്തിൽ ഓക്‌ലാന്റ്‌ അഭൂതപൂർവമായ വളർച്ചയാണ്‌ നേടിയത്‌. 1906-ലെ സാന്‍ഫ്രാന്‍സിസ്‌കോ ഭൂകമ്പത്തിൽ തദ്ദേശവാസികളിൽ ഒട്ടേറെപ്പേർ സുരക്ഷിത മേഖലകളിലേക്ക്‌ പലായനം ചെയ്‌തു. ഓക്‌ലാന്റ്‌ പ്രദേശത്തെ ഭവനങ്ങളിലേറെയും 1910-20 കളിലായി നിർമിക്കപ്പെട്ടവയാണ്‌. അന്തർനഗര റെയിൽ, റോഡ്‌, ബസ്‌ ഗതാഗതം എന്നിവ ഓക്‌ലാന്റിനെ പരിസരപ്രദേശങ്ങളുമായി ബന്ധിപ്പിക്കാന്‍ സഹായിച്ചിട്ടുണ്ട്‌. കടത്തുയാത്രാസൗകര്യങ്ങളും സാന്‍ഫ്രാന്‍സിസ്‌കോയുമായും മറ്റു നഗരങ്ങളുമായും ഓക്‌ലാന്റിനെ കൂട്ടിയിണക്കുന്നുണ്ട്‌.
20-ാം ശതകത്തിന്റെ തുടക്കത്തിൽ ലോകത്തിന്റെ വിവിധ ഭാഗങ്ങളിൽ നിന്നും ഓക്‌ലാന്റിലേക്ക്‌ ശക്തമായ കുടിയേറ്റമുണ്ടായി. ആഫ്രിക്കന്‍-അമേരിക്കന്‍ യുദ്ധപടക്കോപ്പുനിർമാണ തൊഴിലാളികളുടെ പ്രയാണവും ഈ ഭാഗത്തേക്ക്‌ 1940-കളിൽ നടന്നു. ഇക്കാരണത്താൽ വംശീയപരമായി ഒട്ടേറെ വൈവിധ്യങ്ങള്‍ നിലനില്‌ക്കുന്ന നഗരമായി ഓക്‌ലാന്റ്‌ പരിണമിച്ചു. രാഷ്‌ട്രീയപ്രബുദ്ധത, നാഗരിക ജീവിതശൈലി, ആരോഗ്യപരിപാലനം, ഗൃഹോപകരണ സാമഗ്രികളുടെ നിർമാണം എന്നിവയ്‌ക്കൊക്കെ ഓക്‌ലാന്റ്‌ പ്രശസ്‌തി നേടിക്കഴിഞ്ഞിട്ടുണ്ട്‌.
വിശാല ഉള്‍ക്കടൽ പ്രദേശത്തെ ഗതാഗതമേഖലയുടെ സിരാകേന്ദ്രമായ ഓക്‌ലാന്റിലെ കപ്പൽവാണിജ്യസൗകര്യങ്ങള്‍ ഈ നഗരത്തിന്‌ അമേരിക്കയിലെ അഞ്ചാമത്തെ തിരക്കേറിയ തുറമുഖനഗരം എന്ന അംഗീകാരം നേടിക്കൊടുത്തു.
പ്രതിവർഷം ശരാശരി 300 ദിവസത്തോളം സൂര്യപ്രകാശം കനിഞ്ഞിട്ടുള്ള ഓക്‌ലാന്റിൽ മെഡിറ്ററേനിയന്‍ കാലാവസ്ഥയാണ്‌ അനുഭവപ്പെടുന്നത്‌. ഒരു വലിയ അഴിമുഖമായ ലേക്‌മെറിറ്റ്‌, അമേരിക്കയിലെ പ്രഥമ ഔദ്യോഗിക വന്യമൃഗ സംരക്ഷണകേന്ദ്രമായി പരിഗണിക്കപ്പെട്ടുകഴിഞ്ഞു. പുനരുത്‌പാദന ഘടകങ്ങള്‍ കൊണ്ട്‌ വൈദ്യുതിനിർമിക്കുന്ന കാര്യത്തിൽ അമേരിക്കയിൽത്തന്നെ ഒന്നാംസ്ഥാനമാണ്‌ ഓക്‌ലാന്റിനുള്ളത്‌. "ജാക്‌ ലണ്ടന്‍ സ്‌ക്വയർ' ഓക്‌ലാന്റിലെ പ്രധാന വിനോദസഞ്ചാര കേന്ദ്രമാണ്‌. റേഡിയോബീച്ച്‌ ആണ്‌ ഓക്‌ലാന്റിലെ ഏക സമുദ്രതീരവിനോദ സഞ്ചാരകേന്ദ്രം.
ഒട്ടേറെ കലാ-സാംസ്‌കാരിക കേന്ദ്രങ്ങള്‍ ഓക്‌ലാന്റ്‌ പ്രദേശത്തു സ്ഥിതിചെയ്യുന്നു. വൈവിധ്യമാർന്ന ഭക്ഷണം വിളമ്പുന്ന ഹോട്ടലുകളുടെയും റെസ്റ്റോറന്റുകളുടെയും ശൃംഖല ഓക്‌ലാന്റിൽ ദൃശ്യമാണ്‌. തനതായ ഒരു സംഗീതപാരമ്പര്യവും ഓക്‌ലാന്റുകാർക്ക്‌ അഭിമാനിക്കാന്‍ വക നൽകുന്നുണ്ട്‌. ഓക്‌ലാന്റിന്റെ രാത്രികാല ജീവിതത്തിനു മികവേറ്റിക്കൊണ്ട്‌ ധാരാളം ബാറുകളും നൈറ്റ്‌ ക്ലബ്ബുകളും പ്രവർത്തനക്ഷമമാക്കിയിരിക്കുന്നു. പാർക്കുകള്‍, സമുച്ചയങ്ങള്‍ എന്നിവയും സജ്ജീകരിച്ചിട്ടുണ്ട്‌. വിവിധ സഭകളെ പ്രതിനിധീകരിക്കുന്ന ആരാധനാലയങ്ങളും ഒരുക്കപ്പെട്ടിരിക്കുന്നു.
ഒരു മേയർ-കൗണ്‍സിൽ സംവിധാനമാണ്‌ ഓക്‌ലാന്റിന്റെ ഭരണനിർവഹണം നടത്തുന്നത്‌. തിരഞ്ഞെടുക്കപ്പെടുന്ന മേയറുടെ ഭരണകാലാവധി നാലു വർഷത്തേക്ക്‌ പരിമിതപ്പെടുത്തിയിരിക്കുന്നു. ബൃഹത്തായ മൂന്ന്‌ പബ്ലിക്‌ ഹൈസ്‌കൂള്‍ ശൃംഖല ഓക്‌ലാന്റിലുണ്ട്‌. നിരവധി ആർട്‌സ്‌-സയന്‍സ്‌ കോളജുകള്‍ക്കുപുറമേ കാലിഫോർണിയ സർവകലാശാലയുടെ ആസ്ഥാനവും ഓക്‌ലാന്റിൽ പ്രവർത്തിക്കുന്നുണ്ട്‌. പ്രധാനപ്പെട്ട ടെലിവിഷന്‍ സംപ്രഷണ കേന്ദ്രങ്ങളും വാർത്താവിതരണ പ്രക്ഷേപണ സംവിധാനവും ഇവിടെ നിലവിലുണ്ട്‌. പൊതുജനങ്ങള്‍ക്കും കുട്ടികള്‍ക്കും പ്രത്യേകമായും നിരവധി ആശുപത്രികള്‍ ഓക്‌ലാന്റ്‌ നഗരത്തിൽ പ്രവർത്തിക്കുന്നു. ചൈന, ജപ്പാന്‍, റഷ്യ, ജമൈക്ക, മംഗോളിയ, ന്യൂസിലന്‍ഡ്‌, ഘാന, ക്യൂബ, മൊറോക്കോ, വിയറ്റ്‌നാം, പോർട്ടുഗൽ, എത്യോപ്യ തുടങ്ങിയ രാജ്യങ്ങളിലെ 12 വന്‍നഗരങ്ങള്‍ക്ക്‌ ഓക്‌ലാന്റിന്റെ സഹോദരപദവി കല്‌പിക്കപ്പെട്ടിട്ടുണ്ട്‌.
(ഡോ. ബി. സുകുമാരന്‍നായർ)
