This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഉണ്ണിക്കൃഷ്‌ണന്‍, ഒടുവിൽ (1938 - 2006)
സര്‍വ്വവിജ്ഞാനകോശം സംരംഭത്തില്‍ നിന്ന്
ഉണ്ണിക്കൃഷ്‌ണന്‍, ഒടുവിൽ (1938 - 2006)
മലയാള ചലച്ചിത്രനടന്‍. തൃശൂർ ജില്ലയിലെ വടക്കാഞ്ചേരിയിൽ എങ്കക്കാട്ട്‌ ഒടുവിൽ വീട്ടിൽ കൃഷ്‌ണമേനോന്റെയും പാറുക്കുട്ടിഅമ്മയുടെയും പുത്രനായി 1938 ഫെ. 13-ന്‌ ജനിച്ചു. പ്രശസ്‌ത നർത്തകനും സരസകവിയുമായ ഒടുവിൽ ഉണ്ണിക്കൃഷ്‌ണമേനോന്‍ ഇദ്ദേഹത്തിന്റെ അമ്മാവനാണ്‌. ചെറുപ്രായത്തിൽത്തന്നെ മൃദംഗം, തബല തുടങ്ങിയ വാദ്യോപകരണങ്ങള്‍ ഉപയോഗിക്കുന്നതിൽ ഇദ്ദേഹം പ്രാവീണ്യം നേടിയിരുന്നു. ഈ അറിവിന്റെ പിന്‍ബലത്തിൽ നിരവധി സംഗീത ട്രൂപ്പുകളിൽ ഉച്ചിക്കൃഷ്‌ണന്‍ അംഗമായി. പിന്നീട്‌ പ്രശസ്‌ത നാടകവേദിയായ കെ.പി.എ.സി., കേരള കലാവേദി എന്നിവയിൽ കുറച്ചുകാലം പ്രവർത്തിച്ചു.
1970-കളിലാണ്‌ ഉണ്ണിക്കൃഷ്‌ണന്‍ ചലച്ചിത്രരംഗത്ത്‌ പ്രവേശിക്കുന്നത്‌. പി.എന്‍. മേനോന്റെ "ദർശന'മായിരുന്നു ആദ്യ ചലച്ചിത്രം. 1980-കള്‍ വരെ ചെറിയ വേഷങ്ങള്‍കൊണ്ട്‌ തൃപ്‌തിപ്പെടേണ്ടിവന്നെങ്കിലും "ഗുരുവായൂർ കേശവന്‍', "ശരപഞ്‌ജരം' എന്നീ ചലച്ചിത്രങ്ങളിലെ വേഷങ്ങള്‍ ചലച്ചിത്രരംഗത്ത്‌ ശ്രദ്ധേയമായ ഒരിടം നേടിക്കൊടുത്തു. പിന്നീട്‌ ഹരിഹരന്‍, സത്യന്‍ അന്തിക്കാട്‌, അടൂർ ഗോപാലകൃഷ്‌ണന്‍ തുടങ്ങിയവരുടെ ചിത്രങ്ങളിലെ ഒഴിവാക്കാനാവാത്ത സാന്നിധ്യമായി ഉണ്ണിക്കൃഷ്‌ണന്‍ മാറി. നിഴൽക്കൂത്ത്‌, കഥാപുരുഷന്‍, തൂവൽക്കൊട്ടാരം, സർഗം, പൊന്‍മുട്ടയിടുന്ന താറാവ്‌, ആറാംതമ്പുരാന്‍, മനസ്സിനക്കരെ, ദേവാസുരം തുടങ്ങിയ ചിത്രങ്ങളിൽ ഇദ്ദേഹം അവതരിപ്പിച്ച കഥാപാത്രങ്ങള്‍ അനശ്വരവും അവിസ്‌മരണീയവുമാണ്‌. അടൂർ ഗോപാലകൃഷ്‌ണന്റെ "നിഴൽക്കൂത്തി'ലെ കാളിയപ്പന്‍ എന്ന ആരാച്ചാരുടെ വേഷം വിസ്‌മയിപ്പിക്കുന്ന അഭിനയപാടവത്തോടെയാണ്‌ ഉണ്ണിക്കൃഷ്‌ണന്‍ കാഴ്‌ചവച്ചത്‌. സ്വാഭാവികമായ അഭിനയത്തിലൂടെ പ്രശസ്‌തനായ ഇദ്ദേഹം "സർവംസഹ' എന്ന ചലച്ചിത്രത്തിനും ഒരു ആൽബത്തിനും ഗാനരചന നിർവഹിച്ചിട്ടുണ്ട്‌. 1995-ലും (കഥാപുരുഷന്‍) 1996-ലും (തൂവൽക്കൊട്ടാരം) മികച്ച സഹനടനുള്ള അവാർഡും 2002-ൽ മികച്ച നടനുള്ള (നിഴൽക്കൂത്തിലെ അഭിനയത്തിന്‌) കേരള സംസ്ഥാന ചലച്ചിത്ര അവാർഡ്‌ ഉണ്ണിക്കൃഷ്‌ണന്‍ നേടിയിട്ടുണ്ട്‌. 2006 മേയ്‌ 27-ന്‌ ഒടുവിൽ ഉണ്ണിക്കൃഷ്‌ണന്‍ അന്തരിച്ചു.
