This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഓക്‌സൈമുകള്‍
സര്‍വ്വവിജ്ഞാനകോശം സംരംഭത്തില്‍ നിന്ന്
ഓക്‌സൈമുകള്‍
Oximes
ആൽഡിഹൈഡ്‌, കീറ്റോണ്‍ എന്നിങ്ങനെയുള്ള കാർബൊണൈൽ-യൗഗികങ്ങള്‍ (CO-ഗ്രൂപ്പുള്ള ഓർഗാനിക യൗഗികങ്ങള്‍) ഹൈഡ്രാക്‌സിലമീനുമായി പ്രതിപ്രവർത്തിച്ചു ലഭ്യമാക്കുന്ന പദാർഥങ്ങള്‍. ആൽഡിഹൈഡിൽ നിന്നുകിട്ടുന്നവ ആൽഡോക്‌സൈം എന്നും കീറ്റോണിൽനിന്നു കിട്ടുന്നവ കിറ്റോക്‌സൈം എന്നും വ്യവഹരിക്കപ്പെടുന്നു.
CH3 . CHO + H2N .OH ® CH3CH = N .OH + H2O (അസറ്റാൽഡിഹൈഡ്‌) (അസറ്റാൽഡോക്‌സൈം) (CH3)2CO + H2N .OH ® (CH3)2C = N . OH + H2O (അസറ്റോണ്‍) (അസറ്റോക്‌സൈം)
ആൽഡിഹൈഡ്‌ അല്ലെങ്കിൽ കീറ്റോണ്‍ ആൽക്കഹോളിൽ അലിയിച്ചശേഷം ഹൈഡ്രാക്‌സിലമീന്‍ ഹൈഡ്രാക്ലോറൈഡിന്റെ സാന്ദ്രജലീയലായനി ചേർത്ത്‌ പിന്നീട്‌ സാന്ദ്രസോഡിയം കാർബണേറ്റ്‌ ലായനിയും കലർത്തി ചില മണിക്കൂറുകള്‍ സൂക്ഷിച്ചുവയ്‌ക്കുകയോ വാട്ടർബാത്തിൽവച്ച്‌ ചെറിയതോതിൽ ചൂടാക്കുകയോ ചെയ്യുമ്പോള്‍ ആൽക്കഹോളംശം ബാഷ്‌പീഭവിച്ചു പോയശേഷം ഓക്‌സൈം ക്രിസ്റ്റലുകള്‍ വിന്യസ്‌തങ്ങളായിരിക്കുന്നതു കാണാം. ഈഥർ ഉപയോഗിച്ച്‌ ഓക്‌സൈമിനെ നിഷ്‌കർഷണം (extraction)ചെയ്യാം. താഴ്‌ന്ന ഓക്‌സൈമുകള്‍ മിക്കതും മണമില്ലാത്ത ബാഷ്‌പശീലയൗഗികങ്ങളാണ്‌. ജലലേയങ്ങളാണ്‌. ഉയർന്ന അംശങ്ങള്‍ ജലത്തിൽ അല്‌പലേയങ്ങളാണ്‌. ആൽഡോക്‌സൈമും കീറ്റോക്‌സൈമും തമ്മിൽ ഏറ്റവും പ്രധാനമായ വ്യത്യാസം, ആദ്യത്തേത്‌ അസറ്റൈൽ ക്ലോറൈഡുമായി പ്രതിപ്രവർത്തിച്ച്‌ സയനൈഡുകളുണ്ടാക്കുമ്പോള്‍ രണ്ടാമത്തേത്‌ ഐസോമെറിക പരിവർത്തനത്തിനു വിധേയമാവുന്നു (ബാക്‌മാന്‍ പ്രതിപ്രവർ ത്തനം).
1. CH3CH : N . OH ® CH3 CN + H2O (മെഥിൽ സയനൈഡ്‌) CH3 2. CH3 - C = N . OH ® CH3CO . NH . CH3 (മെഥിൽ അസറ്റമൈഡ്‌)
ഓക്‌സൈമുകള്‍ നിഷ്‌പ്രയാസം ലഭ്യമാക്കാവുന്നതുകൊണ്ടും അവയ്‌ക്കു നിശ്ചിതമായ ദ്രവണാങ്കങ്ങളുള്ളതുകൊണ്ടും ആൽഡിഹൈഡുകളെയും കീറ്റോണുകളെയും അഭിനിർധാരണം (detection) ചെയ്യുന്നതിന്‌ അവ വളരെ പ്രയോജനപ്പെടുന്നു. ചില ഓക്‌സൈമുകള്‍ക്ക്‌ വ്യാപാരികപ്രയോജനം ഉള്ളതിനാലും സ്റ്റീരിയോ ഐസൊമെറിസത്തിന്റെ താത്ത്വികപഠനത്തിൽ പ്രാധാന്യമുള്ളതിനാലും ഈയിനം പദാർഥങ്ങള്‍ ശാസ്‌ത്രജ്ഞരുടെ ശ്രദ്ധയെ ആകർഷിച്ചുകൊണ്ടിരിക്കുന്നവയാണ്‌.
(ഡോ. കെ.പി. ധർമരാജയ്യർ)
