This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഒഖോട്‌സ്‌ക്‌ കടൽ
സര്‍വ്വവിജ്ഞാനകോശം സംരംഭത്തില്‍ നിന്ന്
ഒഖോട്‌സ്‌ക്‌ കടൽ
Okhotsk Sea
പസിഫിക്കിന്റെ വടക്കുപടിഞ്ഞാറരികിൽ, ഏഷ്യാവന്‍കരയിലെ അമൂർ നദീമുഖം മുതൽ പെന്‍ഷീനാ നദിയുടെ പതനസ്ഥാനം വരെയുള്ള മേഖലയ്‌ക്കും സഖാലിന്‍ ദ്വീപിനും കിഴക്കായി സ്ഥിതിചെയ്യുന്ന സമുദ്രഭാഗം. ഒഖോട്‌സ്‌ക്‌ കടലിന്റെ കിഴക്കതിര്‌ കംചാത്‌കാ ഉപദ്വീപും കുരീൽ ദ്വീപുകളും, തെക്കതിര്‌ ഹൊക്കെയ്‌ഡോ ദ്വീപുമാണ്‌. 15,89,840 ച.കി.മീ. വിസ്‌തീർണമുള്ള ഈ കടലിന്റെ ഏറ്റവും കൂടിയ ആഴം 3,376 മീ. ആണ്‌. ശൈത്യമേഖലയിൽ സ്ഥിതിചെയ്യുന്ന ഈ കടലിൽ ഒക്‌ടോബർ, നവംബർ മാസങ്ങളിൽ വെള്ളം ഉറഞ്ഞു തുടങ്ങുന്നു; മാർച്ച്‌ ആകുമ്പോഴേക്കും പൂർണമായും ഹിമാച്ഛാദിതമായിത്തീരും. ജൂണ്‍ മാസത്തോടെ ഈ ഹിമപാളികള്‍ പൂർണമായും ഉരുകുന്നു; സഖാലിൽ ഉള്‍ക്കടലിൽ മാത്രം വന്‍കരയുടെ സാമീപ്യംമൂലം ആഗസ്റ്റ്‌ മാസത്തോളം മഞ്ഞു മൂടിക്കാണാം.
ഒഖോട്‌സ്‌ക്‌ കടലിന്റെ കിഴക്കരികിൽ കുരീൽ ദ്വീപുകള്‍ക്കിടയിലൂടെ കടന്നുവരുന്ന പസിഫിക്‌ ജലം പല ശാഖകളിലായി പിരിഞ്ഞ്‌ വടക്കോട്ടൊഴുകുന്നു. ഈ കടലിന്റെ പടിഞ്ഞാറരികിൽ നീരൊഴുക്ക്‌ തെക്കോട്ടാണ്‌; വന്‍കരയിൽ നിന്നും ഒഴുകിവീഴുന്ന നദികള്‍ ഈ ഒഴുക്കുകളെ ശക്തിപ്പെടുത്തുന്നു.
റഷ്യയിൽ പ്രതിവർഷം ബന്ധിക്കപ്പെടുന്ന മത്സ്യശേഖരത്തിലെ 10 ശതമാനം ഈ കടലിൽ നിന്നാണ്‌ ലഭിക്കുന്നത്‌. സാൽമണ്‍, ഹെറിങ്‌ എന്നീ സമ്പത്‌പ്രധാനങ്ങളായ മത്സ്യങ്ങളോടൊപ്പം കടൽഞണ്ടും വന്‍തോതിൽ പിടിക്കപ്പെടുന്നു. വടക്കേ തീരത്തെ മഗാദാന്‍, സഖാലിന്‍ ദ്വീപിന്റെ തെക്കരികിലുള്ള കോർസകോവ്‌ എന്നിവയാണ്‌ ഈ കടലിലെ പ്രധാന തുറമുഖങ്ങള്‍. ടാറ്റാർ, സോയ എന്നീ കടലിടുക്കുകള്‍ വഴി ഒഖോട്‌സ്‌ക്‌ കടൽ ജപ്പാന്‍ കടലുമായി ബന്ധിക്കപ്പെട്ടിരിക്കുന്നു.
എണ്ണപ്രകൃതിവാതകശേഖരങ്ങളുടെ അനേകം മേഖലകള്‍ ഒഖോട്‌സ്‌ക്‌ കടലിൽ കണ്ടെത്തിയിട്ടുണ്ട്‌. 1.2 ബില്യണ്‍ ടണ്‍ എണ്ണയും 1.5 ബില്യന്‍ കുബിക്‌ മീറ്റർ പ്രകൃതിവാതകവും ഇവയിലുള്ളതായി കണക്കാക്കപ്പെടുന്നു.
